ഹിന്ദുദേവതയുടെ പേരില്‍ ബിയര്‍: അമേരിക്കന്‍ കമ്പനി മാപ്പുപറഞ്ഞു

May 17, 2012 രാഷ്ട്രാന്തരീയം

വാഷിങ്ടണ്‍: ഹിന്ദുദേവതയായ കാളിയുടെ പേര് ബിയറിന് നല്‍കിയതില്‍ അമേരിക്കന്‍ കമ്പനി മാപ്പുപറഞ്ഞു. ‘കാളി മാ’ എന്ന് ബിയറിന് പേരിട്ടത് ഹിന്ദുക്കള്‍ക്കിടയില്‍ വ്യാപകപ്രതിഷേധത്തിന് ഇടയാക്കിയിരുന്നു. വിഷയം ഇന്ത്യയുടെ പാര്‍ലമെന്റിലും ഉന്നയിക്കപ്പെട്ടു.

ഓറിഗണിലെ പോര്‍ട്‌ലന്‍ഡിലുള്ള ബേണ്‍സൈഡ് ബ്രൂവിങ് കമ്പനിയാണ് ‘കാളി മാ’ എന്ന് ബിയറിന് പേരിട്ടത്. നാല് കൈയുള്ള കാളീദേവി ഛേദിക്കപ്പെട്ട മൂന്ന് തലകള്‍ക്കിടയില്‍ നില്‍ക്കുന്ന ചിത്രമുള്ള ലേബലും മദ്യക്കുപ്പിയില്‍ പതിച്ചിരുന്നു. ഇന്ത്യന്‍ സുഗന്ധ വ്യഞ്ജനങ്ങളുടെയും സ്‌കോച്ച് ബോണറ്റ് കുരുമുളകിന്റെയും രുചിയാണ് ഈ ബിയറിന്റെ പ്രത്യേകത.

ഹിന്ദുസമുദായത്തിന്റെ അഭ്യര്‍ഥനമാനിച്ച് ബിയര്‍ ഇറക്കുന്നത് മാറ്റിവെച്ചതായി കമ്പനി പ്രസ്താവനയില്‍ അറിയിച്ചു. ഏതെങ്കിലും വംശത്തെയോ വര്‍ഗത്തെയോ മതത്തെയോ മുറിപ്പെടുത്താന്‍ ഉദ്ദേശിച്ചല്ല മദ്യത്തിന് ‘കാളി മാ’ എന്ന് പേരിട്ടതെന്നും പ്രസ്താവന പറയുന്നു.

‘ഇന്ത്യാന ജോണ്‍സ് ആന്‍ഡ് ടെംപിള്‍ ഓഫ് ഡൂം’ എന്ന സിനിമയാണ് കാളി മാ എന്ന പേരിന് പ്രചോദനമായതെന്ന് ബേണ്‍സൈഡ് ബ്രൂവിങ് ഉടമകള്‍ പറഞ്ഞു. ബിയറിന്റെ പേര് മാറ്റി ഉടന്‍ പുറത്തിറക്കുമെന്നും അവര്‍ അറിയിച്ചു. ഈ വിഷയം ബി.ജെ.പി. കഴിഞ്ഞദിവസം പാര്‍ലമെന്റില്‍ ഉന്നയിച്ചിരുന്നു. ഹിന്ദുക്കളുടെ മതവികാരം വ്രണപ്പെടുത്തുന്ന ഈ വിഷയവുമായി ബന്ധപ്പെട്ട് യു.എസ്. അംബാസഡറെ വിളിച്ചുവരുത്തണമെന്നും പാര്‍ട്ടി ആവശ്യപ്പെട്ടിരുന്നു.

കൂടുതല്‍ വാര്‍ത്തകള്‍ - രാഷ്ട്രാന്തരീയം