പ്രധാനമന്ത്രി നാളെ കൊച്ചിയിലെത്തും

September 11, 2012 കേരളം

കൊച്ചി: കൊച്ചി മെട്രോ റെയിലിന്റെ ശിലാസ്ഥാപന ചടങ്ങിലും എമേര്‍ജിംഗ് കേരള നിക്ഷേപക സംഗമത്തിലും പങ്കെടുക്കാന്‍ പ്രധാനമന്ത്രി ഡോ. മന്‍മോഹന്‍ സിംഗ് നാളെ കൊച്ചിയിലെത്തും. എമേര്‍ജിംഗ് കേരളയുടെ പശ്ചാത്തലത്തില്‍ ഈയാഴ്ചത്തെ മന്ത്രിസഭാ യോഗം ഇന്നു വൈകുന്നേരം ആറിന് എറണാകുളം ഗസ്റ് ഹൗസില്‍ ചേരും. നാളെയും മറ്റന്നാളും പ്രത്യേക മന്ത്രിസഭാ യോഗവും ഉണ്ടാകും. കേരള പത്രപ്രവര്‍ത്തക യൂണിയന്റെ സുവര്‍ണ ജൂബിലി ആഘോഷത്തിന്റെ ഉദ്ഘാടനം നിര്‍വഹിക്കുന്നതും പ്രധാനമന്ത്രിയാണ്.

നാളെ 11.25നു പ്രത്യേക വിമാനത്തില്‍ നാവിക വിമാനത്താവളത്തിലെത്തുന്ന പ്രധാനമന്ത്രിക്ക് ഔദ്യോഗിക സ്വീകരണം നല്‍കും. തുടര്‍ന്നു റോഡ്മാര്‍ഗം ഹോട്ടല്‍ ലേ മെറിഡിയനിലെത്തുന്ന പ്രധാനമന്ത്രി എമേര്‍ജിംഗ് കേരളയുടെ ഉദ്ഘാടനം നിര്‍വഹിക്കും. ലേ മെറിഡിയനില്‍നിന്നു വെല്ലിംഗ്ടണ്‍ ഐലന്‍ഡിലെ താജ് വിവാന്റയിലെത്തും. 3.05നു വിവാന്റയില്‍നിന്നു നാവിക വിമാനത്താവളത്തിലെത്തുന്ന അദ്ദേഹം ഹെലികോപ്ടറില്‍ തൃശൂരിലേക്കു യാത്ര തിരിക്കും. കലാമണ്ഡലത്തിലെ ചടങ്ങിനുശേഷം 5.25നു കൊച്ചിയില്‍ തിരിച്ചെത്തും. രാത്രി വിശ്രമം താജ് വിവാന്റയിലാണ് നിശ്ചയിച്ചിട്ടുള്ളത്.

13നു രാവിലെ 9.40നു വിവാന്റയില്‍നിന്നു മറൈന്‍ഡ്രൈവിലേക്കു റോഡ്മാര്‍ഗമെത്തുന്ന പ്രധാനമന്ത്രി 10.35നു കൊച്ചി മെട്രോ റെയില്‍ പദ്ധതിക്കു തറക്കല്ലിടും. മറൈന്‍ഡ്രൈവില്‍നിന്നു ഷണ്‍മുഖം റോഡ്, പാര്‍ക്ക് അവന്യൂ, ഫോര്‍ഷോര്‍ റോഡ് വഴി ഫൈന്‍ ആര്‍ട്സ് ഹാളിലെത്തുന്ന പ്രധാനമന്ത്രി 10.55ന് കേരള പത്രപ്രവര്‍ത്തക യൂണിയന്റെ സുവര്‍ണജൂബിലി ആഘോഷം ഉദ്ഘാടനം ചെയ്യും. 11.50നു നാവിക വിമാന ത്താവളത്തിലാണു പ്രധാന മന്ത്രി ക്കു യാത്രയയപ്പ്. പ്രധാനമന്ത്രിയെ വരവേല്‍ക്കുന്നതിനുള്ള ഒരുക്കങ്ങള്‍ പൂര്‍ത്തിയാക്കിയതായി ജില്ലാ കളക്ടര്‍ പി.ഐ. ഷേക്ക് പരീതും സിറ്റി ജില്ലാ പോലീസ് ചീഫ് ഇന്‍ ചാര്‍ജ് ഗോപാലകൃഷ്ണപിള്ള യും അറിയിച്ചു.

കൂടുതല്‍ വാര്‍ത്തകള്‍ - കേരളം