കൊച്ചി വിമാനം തിരുവനന്തപുരത്തെത്തി; യാത്രക്കാര്‍ പ്രതിഷേധിച്ചു

October 19, 2012 പ്രധാന വാര്‍ത്തകള്‍

* യാത്രക്കാര്‍ വിമാനം റാഞ്ചാന്‍ ശ്രമിച്ചെന്ന് പൈലറ്റ് പരാതി നല്‍കി

* വിമാനം കൊച്ചിയിലെത്തിയപ്പോള്‍ ആറ് യാത്രക്കാരെ തടഞ്ഞുവച്ചു

* യാത്രക്കാര്‍ക്കെതിരെ കേസെടുക്കില്ലെന്ന് ഡി.ജി.പി

തിരുവനന്തപുരം: എയര്‍ ഇന്ത്യ എക്‌സ്പ്രസിന്റെ അബുദാബി-കൊച്ചി വിമാനം മോശം കാലാവസ്ഥയെതുടര്‍ന്ന്  തിരുവനന്തപുരത്ത് ഇറക്കിയത് വന്‍ പ്രതിഷേധത്തിനിടയാക്കി. കാലാവസ്ഥ മെച്ചമായാല്‍ വിമാനം നെടുമ്പാശേരിയിലേയ്ക്ക് പോകുമെന്ന് യാത്രക്കാരെ അറിയിച്ചിരുന്നുവെങ്കിലും പിന്നീട് തീരുമാനം മാറ്റിയതിനെത്തുടര്‍ന്നാണ് യാത്രക്കാര്‍ പ്രതിഷേധിച്ചത്.

ഇതിനിടെ യാത്രക്കാര്‍ വിമാനം റാഞ്ചാന്‍ ശ്രമംനടത്തിയെന്ന പൈലറ്റിന്റെ സന്ദേശം പരിഭ്രാന്തിപരത്തി. ഡ്യൂട്ടി സമയം കഴിഞ്ഞ പൈലറ്റ് വിമാനത്തിനു പുറത്തിറങ്ങാന്‍ ശ്രമിച്ചതോടെ  യാത്രക്കാര്‍ കോക്പിറ്റിലേയ്ക്കുകയറി പ്രതിഷേധിച്ചതിനെതുടര്‍ന്നാണ് പൈലറ്റ് ഇത്തരത്തില്‍ സന്ദേശം നല്‍കിയതെന്നാണ് സൂചന. പോലീസ് സ്ഥലത്തെത്തി യാത്രക്കാരെ അറസ്റ്റുചെയ്യാന്‍ ശ്രമിച്ചത് പ്രശ്നം കൂടുതല്‍ വഷളാക്കി. തുടര്‍ന്ന് പരിശോധനനടത്തിയ എയര്‍പോര്‍ട്ട് അതോറിറ്റി സുരക്ഷാപ്രശ്‌നങ്ങള്‍ ഒന്നുമില്ലെന്ന് ഡി.ജി.സി.എയ്ക്ക് റിപ്പോര്‍ട്ട് നല്‍കി. പ്രശ്നം നടന്ന ഇത്രയും സമയം യാത്രക്കാര്‍ക്ക് ഭക്ഷണമൊ വെള്ളമോ നല്‍കാന്‍ തയ്യാറായില്ലെന്നും പരാതിയുണ്ട്. സ്ത്രീകളും കുട്ടികളും ഉള്‍പ്പടെ നൂറ്റി അന്‍പതോളം യാത്രക്കാരാണ് വിമാനത്തിലുണ്ടായിരുന്നത്.

ഉച്ചയ്ക്ക് രണ്ട് മണിയോടെ കൊച്ചിയിലേക്ക് യാത്രയാരംഭിച്ച വിമാനം വൈകീട്ട് 3.15 ഓടെ നെടുമ്പാശ്ശേരിയിലിറങ്ങി. നെടുമ്പാശ്ശേരിയില്‍ ഇറങ്ങിയ വിമാനത്തിലെ ആറ് യാത്രക്കാരെ വിമാനത്താവളത്തില്‍ തടഞ്ഞുവച്ചു. വൈകീട്ട് 4.15 ഓടെയാണ് ഇവരെ വിട്ടയച്ചത്. അഷറഫ്, അബ്ദുള്‍ഖാദര്‍, റാഷീദ്, അഗസ്റ്റിന്‍, മനോജ്, തോംസണ്‍ എന്നിവരെയാണ് വിമാനത്താവളത്തില്‍ തടഞ്ഞുവച്ചത്. രണ്ടു യാത്രക്കാര്‍ക്ക് പോലീസില്‍ നിന്ന് മര്‍ദ്ദനമേറ്റെന്നും യാത്രക്കാര്‍ പറഞ്ഞു.

കൂടുതല്‍ വാര്‍ത്തകള്‍ - പ്രധാന വാര്‍ത്തകള്‍