പുതിയ ജനമൈത്രി പോലീസ് സ്റേഷനുകളില്‍ അഞ്ചുവീതം തസ്തികകള്‍ അനുവദിക്കും – മുഖ്യമന്ത്രി

February 25, 2013 പ്രധാന വാര്‍ത്തകള്‍

0തിരുവനന്തപുരം: ജനമൈത്രി പോലീസ് പദ്ധതി പുതുതായി നടപ്പാക്കുന്ന പോലീസ് സ്റേഷനുകളില്‍ അഞ്ച് തസ്തികകള്‍ വീതം അനുവദിക്കുമെന്ന് മുഖ്യമന്ത്രി ഉമ്മന്‍ ചാണ്ടി പറഞ്ഞു. ജനമൈത്രി സുരക്ഷാപദ്ധതി സംസ്ഥാനതല സെമിനാര്‍ തിരുവനന്തപുരത്ത് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

സംസ്ഥാനത്ത് നടപ്പാക്കിയ ജനമൈത്രി പോലീസ് സംവിധാനം മറ്റു സംസ്ഥാനങ്ങളും മാതൃകയാക്കുകയാണ്. കുറ്റകൃത്യങ്ങളുണ്ടാവുന്ന സാഹചര്യമൊഴിവാക്കുകയാണ് കുറ്റകൃത്യങ്ങളുണ്ടായശേഷം നേരിടുന്നതിനേക്കാള്‍ അഭികാമ്യമെന്ന് മുഖ്യമന്ത്രി പറഞ്ഞു. ഇക്കാര്യത്തില്‍ ജനമൈത്രി പോലീസ് നല്‍കുന്ന സംഭാവനകള്‍ വിലമതിക്കാനാവാത്തതാണെന്നും അദ്ദേഹം പറഞ്ഞു.

സംസ്ഥാനത്ത് കുറ്റകൃത്യങ്ങളുടെ നിരക്ക് കുറയ്ക്കാന്‍ ജനമൈത്രി പോലീസിന് കഴിയണമെന്ന് ചടങ്ങില്‍ അധ്യക്ഷത വഹിച്ച ആഭ്യന്തരമന്ത്രി തിരുവഞ്ചൂര്‍ രാധാകൃഷ്ണന്‍ പറഞ്ഞു. രജിസ്റര്‍ ചെയ്യുന്ന കേസുകളുടെ എണ്ണത്തെ അടിസ്ഥാനമാക്കിയല്ല, തുടര്‍ നടപടികളുടെ വേഗത നോക്കിയാണ് ക്രമസമാധാനനിലയെ വിലയിരുത്തേണ്ടതെന്നും അദ്ദേഹം ചൂണ്ടിക്കാട്ടി. പരിസ്ഥിതി സംരക്ഷണം, വൃദ്ധജന പരിപാലനം തുടങ്ങി എല്ലാ ജനകീയ വിഷയങ്ങളിലും ഫലപ്രദമായി ആദ്യം പ്രതികരിക്കുന്ന സംഘമായി ജനമൈത്രി പോലീസ് മാറണമെന്നും അദ്ദേഹംപറഞ്ഞു.

ചടങ്ങില്‍ ആരോഗ്യ-ദേവസ്വം വകുപ്പ് മന്ത്രി വി.എസ്. ശിവകുമാര്‍ മുഖ്യപ്രഭാഷണം നടത്തി. എം.എ. വാഹിദ് എം.എല്‍.എ, സംസ്ഥാന പോലീസ് മേധാവി കെ.എസ്. ബാലസുബ്രഹ്മണ്യം, എ.ഡി.ജി.പി. ബി. സന്ധ്യ, ഡോ സെലിന്‍ സണ്ണി തുടങ്ങിയവര്‍ പങ്കെടുത്തു. ജനമൈത്രി പോലീസ് വാര്‍ത്താപത്രികയുടെ പ്രകാശനം മന്ത്രി തിരുവഞ്ചൂര്‍ രാധാകൃഷ്ണന്‍ മന്ത്രി വി.എസ്. ശിവകുമാറിന് നല്‍കി നിര്‍വഹിച്ചു.

കൂടുതല്‍ വാര്‍ത്തകള്‍ - പ്രധാന വാര്‍ത്തകള്‍