ശ്രീരാമനവമി രഥയാത്ര മാര്‍ച്ച് 27ന് ശ്രീമൂകാംബികാക്ഷേത്രത്തില്‍നിന്ന് ആരംഭിക്കും

March 23, 2013 കേരളം,പ്രധാന വാര്‍ത്തകള്‍

തിരുവനന്തപുരം: ചേങ്കോട്ടുകോണം ശ്രീരാമദാസാശ്രമത്തിന്റെ ആഭിമുഖ്യത്തില്‍ നടക്കുന്ന ശ്രീരാമനവമി ഹിന്ദുമഹാസമ്മേളനത്തിന്റെ മുന്നോടിയായുളള ശ്രീരാമനവമി രഥയാത്രകള്‍ മാര്‍ച്ച് 27ന് കൊല്ലൂര്‍ ശ്രീ മൂകാംബികാ ദേവീക്ഷേത്രസന്നിധിയില്‍നിന്ന് ആരംഭിക്കും.  ശ്രീ മൂകാംബികാദേവിയുടെ ശ്രീകോവിലില്‍നിന്ന് മുഖ്യതന്ത്രി പകര്‍ന്നു നല്‍കുന്ന ജ്യോതി കേരളത്തിലേക്കുള്ള രഥത്തില്‍ ശ്രീരാമദാസാശ്രമം അദ്ധ്യക്ഷന്‍ സ്വാമി ബ്രഹ്മപാദാനന്ദസരസ്വതിയും മഹാരാഷ്ട്രയിലേക്കുള്ള രഥത്തില്‍ സ്വാമി കൃഷ്ണാനന്ദസരസ്വതിയും പ്രതിഷ്ഠിച്ചുകൊണ്ട് രഥയാത്രകളുടെ പ്രയാണത്തിന് തുടക്കംകുറിക്കും. രാമായണത്തിന്റെ ആദ്ധ്യാത്മികമായ ആന്തരികസത്ത ജനഹൃദയങ്ങളിലെത്തിക്കുക എന്ന സന്ദേശവുമായാണ് രഥയാത്ര നടത്തുന്നത്.

വാര്‍ത്താസമ്മേളനത്തില്‍ ശ്രീരാമനവമി മഹോത്സവം ജനറല്‍ കണ്‍വീനര്‍ ബ്രഹ്മചാരി പ്രവിത് കുമാര്‍ സംസാരിക്കുന്നു. പബ്ലിസിറ്റി കണ്‍വീനര്‍ ടി.മായാമോഹന്‍ സമീപം.

വാര്‍ത്താസമ്മേളനത്തില്‍ ശ്രീരാമനവമി മഹോത്സവം ജനറല്‍ കണ്‍വീനര്‍ ബ്രഹ്മചാരി പ്രവിത് കുമാര്‍ സംസാരിക്കുന്നു. പബ്ലിസിറ്റി കണ്‍വീനര്‍ ടി.മായാമോഹന്‍ സമീപം.

ക്ഷേത്ര മാതൃകയില്‍ നിര്‍മ്മിച്ചിട്ടുള്ള ശ്രീരാമ രഥങ്ങളില്‍ പഞ്ചലോഹനിര്‍മ്മിതമായ ശ്രീരാമസീത ആഞ്ജനേയ വിഗ്രഹം, ശ്രീരാമപാദുകം, ചൂഡാരത്‌നം, ശ്രീരാമദാസാശ്രമ സ്ഥാപകാചാര്യന്‍ ബ്രഹ്മശ്രീ നീലകണ്ഠ ഗുരുപാദരുടെയും ജഗദ്ഗുരു സ്വാമി സത്യാനന്ദസരസ്വതിയുടെയും ഛായാചിത്രങ്ങള്‍ എന്നിവ നിത്യാരാധനയ്ക്കും ദര്‍ശനത്തിനുമായി ഉണ്ടാകും.

മാര്‍ച്ച് 27ന് ദക്ഷിണ കര്‍ണ്ണാടകം, 28ന് കാസര്‍ഗോഡ്, 29ന് കണ്ണൂര്‍, 30ന് വയനാട്, മാര്‍ച്ച് 31 ഏപ്രില്‍ 1 കോഴിക്കോട്, 2, 3 മലപ്പുറം, 4,5 പാലക്കാട്, 6ന് തൃശൂര്‍, 7ന് എറണാകുളം, 8ന് ആലപ്പുഴ, 9ന് കോട്ടയം,10, 11 ഇടുക്കി, 12ന് പത്തനംതിട്ട, 13,14 കൊല്ലം, 15ന് തിരുവനന്തപുരം വഴി കന്യാകുമാരി എന്നീ ജില്ലകളിലും 16ന് കന്യാകുമാരിയില്‍നിന്ന് തിരികെയെത്തി തിരുവനന്തപുരത്തും പര്യടനം നടത്തും. രഥയാത്ര ശ്രീരാമനവമി ദിവസമായ ഏപ്രില്‍ 19ന് ചേങ്കോട്ടുകോണം ശ്രീരാമദാസാശ്രമത്തില്‍ സമാപിക്കും.

എല്ലാ ജില്ലകളിലും രഥായാത്ര സമാപനകേന്ദ്രത്തിലും ശ്രീരാമനവമി ഹിന്ദുമഹാസമ്മേളനങ്ങള്‍ നടക്കും. മന്ത്രിമാര്‍, വിവിധ ഹൈന്ദവ സംഘടനനേതാക്കള്‍, ആദ്ധ്യാത്മികാചാര്യന്മാര്‍, വിവിധ മഠങ്ങളിലെ സന്ന്യാസി ശ്രേഷ്ഠന്മാര്‍, രാഷ്ട്രീയ സാമൂഹ്യ സാംസ്‌ക്കാരിക നായകന്മാര്‍ തുടങ്ങിയവര്‍ സമ്മേളനങ്ങളില്‍ പങ്കെടുക്കും. ഏപ്രില്‍ 18 മുതല്‍ 28 വരെ ചേങ്കോട്ടുകോണം ശ്രീരാമദാസാശ്രമത്തില്‍  ശ്രീരാമനവമി ഹിന്ദു മഹാസമ്മേളനവും ശ്രീരാമായണ നവാഹയജ്ഞവും ശ്രീരാമനവമി ആഘോഷങ്ങളുടെ ഭാഗമായി സംഘടിപ്പിച്ചിട്ടുണ്ട്. തിരുവനന്തപുരം പ്രസ്‌ക്ലബ്ബില്‍ നടന്ന വാര്‍ത്താസമ്മേളനത്തില്‍  ശ്രീരാമനവമി മഹോത്സവം ജനറല്‍ കണ്‍വീനര്‍ ബ്രഹ്മചാരി പ്രവിത് കുമാര്‍, പബ്ലിസിറ്റി കണ്‍വീനര്‍ ടി.മായാമോഹന്‍ എന്നിവര്‍ പങ്കെടുത്തു.

കൂടുതല്‍ വാര്‍ത്തകള്‍ - കേരളം