കുട്ടനാട്; ശുചീകരണ പ്രവര്‍ത്തനങ്ങള്‍ക്ക് ഒരു കോടി: മുഖ്യമന്ത്രി

July 4, 2013 കേരളം

തിരുവനന്തപുരം: കാലവര്‍ഷക്കെടുതിയില്‍ വെളളക്കെട്ടുണ്ടായ കുട്ടനാട്ട് മേഖലയില്‍ ശുചീകരണ പ്രവര്‍ത്തനങ്ങള്‍ നടത്തുന്നതിന് വാര്‍ഡൊന്നിന് പരമാവധി 10,000 രൂപ നിരക്കില്‍ നല്‍കും. തദ്ദേശ സ്ഥാപനങ്ങളുടെ സഹകരണത്തോടെ നടത്തുന്ന ശുചീകരണ പ്രവര്‍ത്തനങ്ങള്‍ക്ക് ആരോഗ്യ വകുപ്പായിരിക്കും മേല്‍നോട്ടം വഹിക്കുക.

മുഖ്യമന്ത്രി ഉമ്മന്‍ചാണ്ടിയുടെ അദ്ധ്യക്ഷതയില്‍ തിരുവനന്തപുരത്ത് ചേര്‍ന്ന യോഗത്തിലാണ് ഈ തീരുമാനമെടുത്തത്. ഇതിനായി ഒരു കോടി രൂപ നല്‍കും. കാര്‍ഷിക മേഖലയിലുണ്ടായ നാശനഷ്ടങ്ങള്‍ക്ക് 6.82 ലക്ഷം രൂപ നല്‍കും. പമ്പിംഗ് സബ്‌സിഡിയായി 3.18 ലക്ഷം രൂപ നല്‍കാനും തീരുമാനമായി. മടവീഴ്ചയില്‍ പൂര്‍ണ്ണമായും വീട് തകര്‍ന്ന സംഭവത്തില്‍ വീട്ടുടമയ്ക്ക് ആറര ലക്ഷം രൂപ നഷ്ടപരിഹാരം നല്‍കും. ആര്‍.ബ്ലോക്ക് കായലിലെ വെളളം പമ്പു ചെയ്യുന്നതിന് 30 ലക്ഷം രൂപയും കടല്‍ ഭിത്തി പുനരുദ്ധാരണത്തിന് നേരത്തേയനുവദിച്ച രണ്ടര കോടിക്കു പുറമെ ഒന്നര കോടി രൂപയും നല്‍കും. നെല്ല് സംഭരണ കുടിശ്ശികയ്ക്കായി അനുവദിച്ച 68 കോടി രൂപ കര്‍ഷകര്‍ക്ക് ചൊവ്വാഴ്ചയ്ക്കകം കൊടുത്തുതീര്‍ക്കും. ദേശീയ പാതകളുടെ കേടുപാടുകള്‍ തീര്‍ക്കാന്‍ 5.18 ലക്ഷം രൂപയും പി.ഡബ്ല്യു.ഡി., പഞ്ചായത്ത് റോഡുകളുടെ പുനരുദ്ധാരണത്തിന് 10 കോടി രൂപയും നല്‍കാനും തീരുമാനമായി. കുട്ടനാട് മേഖലയില്‍ ഇപ്പോള്‍ പ്രവര്‍ത്തിക്കുന്ന 48 ദുരിതാശ്വാസ ക്യാമ്പുകള്‍ വാസസ്ഥലങ്ങളിലെ വെളളമിറങ്ങുംവരെ തുടരാനും യോഗം തീരുമാനിച്ചു.

മന്ത്രിമാരായ കെ.പി.മോഹനന്‍, കെ.സി.ജോസഫ്, പി.ജെ.ജോസഫ്, എം.എല്‍.എ. മാരായ പി.സി.വിഷ്ണുനാഥ്, മോന്‍സ് ജോസഫ്, തോമസ് ചാണ്ടി, ചീഫ് സെക്രട്ടറി ഇ.കെ.ഭരത്ഭൂഷണ്‍, വകുപ്പ് സെക്രട്ടറിമാര്‍ തുടങ്ങിയവര്‍ യോഗത്തില്‍ പങ്കെടുത്തു.

കൂടുതല്‍ വാര്‍ത്തകള്‍ - കേരളം