സവിത്രീവ്രത യജ്ഞം : നിര്‍ജയ ചടങ്ങ് നടത്തി

September 30, 2013 കേരളം

കൊച്ചി: അഖില കേരള തന്ത്രി സമാജം മധ്യമേഖലാ സമ്മേളനത്തിനായി എറണാകുളത്തപ്പന്‍ ഗ്രൗണ്ടില്‍ നടത്തുന്ന സാവിത്രീവ്രത യജ്ഞത്തിന്റെ നിര്‍ജയ ചടങ്ങ് നടത്തി. യജ്ഞത്തിന്റെ പരിപൂര്‍ണ വിജയത്തിനായി ദേവിയെ മാതൃരൂപത്തില്‍ പൂജിച്ച് ആദരിക്കുന്നതാണ് നിര്‍ജയ ചടങ്ങ്. പഞ്ചഭൂതങ്ങളുടെ അനുഗ്രഹത്തിനുവേണ്ടി സമംഗളം യജ്ഞ പൂര്‍ത്തീകരണത്തിനായി പ്രകൃതി മാതാവിനെ പൂജിക്കുക എന്നതാണ് സങ്കല്പം. നിര്‍ജയ ചടങ്ങില്‍ പഞ്ചമാതൃക്കളുടെ പാദപൂജ ചെയ്ത് വസ്ത്ര, ഫല, താംബൂല സഹിതം ദാനം ചെയ്ത് സര്‍വ പാപങ്ങളും തീര്‍ത്ത് അനുഗ്രഹിക്കുന്നതിനായി പ്രാര്‍ത്ഥിച്ചു.

ചേന്നാസ് നാരായണന്‍ നമ്പൂതിരിപ്പാട് ചടങ്ങുകള്‍ക്ക് മുഖ്യ കാര്‍മികത്വം നല്‍കി. പുലിയന്നൂര്‍ ശശി നമ്പൂതിരിപ്പാട്, പുലിയന്നൂര്‍ മുരളി നാരായണന്‍ നമ്പൂതിരിപ്പാട്, പുലിയന്നൂര്‍ പ്രശാന്ത് നാരായണന്‍ നമ്പൂതിരിപ്പാട് എന്നിവര്‍ സഹകാര്‍മികത്വം വഹിച്ചു. സാവിത്രീവ്രത യജ്ഞത്തിന്റെ ഭാഗമായി ഞായറാഴ്ച വൈകീട്ട് 5 മണിക്ക്, യജ്ഞപ്രസാദമായി നല്‍കുന്ന ഫലവൃക്ഷത്തൈകളെ, ഓഷധികളുടെ അധിദേവതയായ സോമനെ സങ്കല്‍പ്പിച്ച് വൃക്ഷ പൂജ ചെയ്യും. മള്ളിയൂര്‍ മഹാഗണപതി ക്ഷേത്രം തന്ത്രി മനയത്താറ്റ് ആര്യന്‍ നമ്പൂതിരിപ്പാട് മുഖ്യ കാര്‍മികനാവും. യജ്ഞത്തിനായുള്ള ആചാര്യ കുണ്ഡത്തിന്റെ ശിലാന്യാസം കഴിഞ്ഞ ദിവസം നടത്തി. വേദി പുണ്യാഹം ചെയ്ത് ശുദ്ധി വരുത്തി ദര്‍ഭ, പുറ്റുമണ്ണ്, പഞ്ചഗവ്യം തുടങ്ങിയ ദ്രവ്യങ്ങള്‍ ഉപയോഗിച്ച് ശുദ്ധിവരുത്തി. പത്മപീഠത്തില്‍ ഭൂമി പൂജ ചെയ്ത് പഞ്ചഭൂതങ്ങളില്‍ പ്രഥമ അംശമായ ഭൂമിദേവിയെ വന്ദിച്ചു. ഗണപതിയെ അവില്‍,മലര്‍, ശര്‍ക്കര, കദളിപ്പഴം എന്നീ നിവേദ്യങ്ങളാല്‍ പ്രസാദിപ്പിച്ച് വിഘ്‌നനിവാരണം നടത്തി. 52 അടി നീളവും 17 അടി വീതിയും 20 അടി ഉയരവുമുള്ളതാണ് യജ്ഞവേദി. ഇവിടെ ആചാര്യകുണ്ഡം സ്ഥാപിച്ചു. പ്രിന്‍സിപ്പല്‍ ചീഫ് ഫോറസ്റ്റ് കണ്‍സര്‍വേറ്റര്‍ ഡോ. ബി.എസ്. കൊറിയാ, ഡോ. എന്‍.സി. ഇന്ദുചൂഡന്‍, അഹാഡസ് തുടങ്ങിയവര്‍ ചടങ്ങില്‍ സംബന്ധിക്കും.

കൂടുതല്‍ വാര്‍ത്തകള്‍ - കേരളം