കണ്ണൂര്‍ വിമാനത്താവളത്തിന്‌ തറക്കല്ലിട്ടു

December 17, 2010 കേരളം,മറ്റുവാര്‍ത്തകള്‍

കണ്ണൂര്‍: സംസ്‌ഥാനത്തെ നാലാമത്തെ വിമാനത്താവളത്തിനു മട്ടന്നൂര്‍ മൂര്‍ഖന്‍പറമ്പില്‍ മുഖ്യമന്ത്രി വി.എസ്‌.അച്യുതാനന്ദന്‍ തറക്കല്ലിട്ടു. മന്ത്രി കോടിയേരി ബാലകൃഷ്‌ണന്‍ സ്വാഗത ഭാഷണത്തോടെ തുടങ്ങിയ ചടങ്ങില്‍ കേന്ദ്ര വ്യോമയാനമന്ത്രി പ്രഫുല്‍ പട്ടേല്‍ അധ്യക്ഷത വഹിച്ചു. കേന്ദ്രമന്ത്രിമാരായ മുല്ലപ്പള്ളി രാമചന്ദ്രന്‍, ഇ അഹമ്മദ്‌, സംസ്‌ഥാന മന്ത്രിമാര്‍ തുടങ്ങിയവരും വിവിധ രാഷ്‌ട്രീയ പാര്‍ട്ടി പ്രതിനിധികളും ചടങ്ങില്‍ സന്നിഹിതരായിരുന്നു. അറുപത്‌ പേര്‍ക്കിരിക്കാവുന്ന വേദിയും പതിനായിരം പേര്‍ക്കുള്ള പന്തലുമാണ്‌ ഒരുക്കിയിരുന്നത്‌. പദ്ധതിയുടെ ചുറ്റുമതില്‍ നിര്‍മ്മാണ ഉദ്‌ഘാടനവും പുനരധിവസിപ്പിക്കുന്ന കുടുംബങ്ങള്‍ക്കുള്ള തീറാധാര കൈമാറ്റവും വിമാനത്താവള പ്രദേശത്ത്‌ വൃക്ഷതൈ വെച്ചു പിടിപ്പിക്കല്‍ കര്‍മ്മവും ഒപ്പം നടന്നു.
കേരളത്തിലെ ഏറ്റവും വലുതും ആധുനികവുമായ വിമാനത്താവളമാണു 2061 ഏക്കറില്‍ മൂര്‍ഖന്‍പറമ്പില്‍ ലക്ഷ്യമിടുന്നത്‌. 1287 ഏക്കര്‍ ഏറ്റെടുത്തു. രൂപരേഖയും അടങ്കലും തയാറാക്കാന്‍ കണ്‍സല്‍ട്ടന്‍സിയെ തീരുമാനിച്ചു. മികച്ച പുനരധിവാസ പാക്കേജ്‌ ഭൂമി ഏറ്റെടുക്കല്‍ പ്രക്രിയ എളുപ്പമാക്കി. മൂന്നുവര്‍ഷം കൊണ്ടു നിര്‍മാണം പൂര്‍ത്തിയാക്കാന്‍ ലക്ഷ്യമിടുന്ന വിമാനത്താവളത്തിന്‌ 1200 കോടി രൂപയാണു മതിപ്പു ചെലവ്‌. അതേസമയം തിരുവനന്തപുരം ഏവിയേഷന്‍ അക്കാദമിയുടെ ഒരു കേന്ദ്രം ഇവിടെ തുടങ്ങുന്ന കാര്യവും പരിഗണനയിലുണ്ട്‌. വിനോദസഞ്ചാരികളെയും വടകര മുതല്‍ കാസര്‍കോട്‌ വരെയും കുടകില്‍ നിന്നുമുള്ള ഗള്‍ഫ്‌ യാത്രക്കാരെയുമാണ്‌ ആദ്യഘട്ടത്തില്‍ പ്രതീക്ഷിക്കുന്നത്‌.
ഇത്‌ ഇന്ത്യയിലെ ആദ്യ പരിസ്‌ഥിതി സൗഹൃദ വിമാനത്താവളമായിരിക്കും, 3400 മീറ്റര്‍ റണ്‍വെ, സമാന്തരമായി ഇതേ നീളത്തില്‍ പാര്‍ക്കിങ്‌ ബേയിലേക്കുള്ള ടാക്‌സി ട്രാക്ക്‌, കണ്‍വന്‍ഷന്‍ സെന്റര്‍, വന്‍കിട വ്യാപാരകേന്ദ്രങ്ങള്‍, വിമാന അറ്റകുറ്റപ്പണിക്കുള്ള മെയിന്റനന്‍സ്‌ ഹാങ്ങര്‍ തുടങ്ങിയവയുമുണ്ടാകും. വിമാനം ഇറങ്ങാനും ഉയരാനും സാധിക്കുന്ന തരത്തിലായിരിക്കും ടാക്‌സി ട്രാക്കിന്റെ നിര്‍മാണം. ഒരേസമയം ആയിരം യാത്രക്കാരെ കൈകാര്യം ചെയ്യാവുന്ന തരത്തില്‍ രാജ്യാന്തര, ആഭ്യന്തര ടെര്‍മിനലുകള്‍ യോജിപ്പിച്ചായിരിക്കും.
വടക്കന്‍ മലബാറിന്റെ വിനോദസഞ്ചാര മേഖലയിലും കൈത്തറി കയറ്റുമതിയിലും വിമാനത്താവളം വലിയ മാറ്റമുണ്ടാക്കുമെന്നു കരുതുന്നു. വിമാനത്താവളത്തിനു വേണ്ടി സംസ്‌ഥാന സര്‍ക്കാര്‍ രൂപവല്‍ക്കരിച്ച കണ്ണൂര്‍ ഇന്റര്‍നാഷനല്‍ എയര്‍പോര്‍ട്ട്‌ ലിമിറ്റഡ്‌ (കിയാല്‍) എന്ന കമ്പനി ഓഹരി സമാഹരണത്തിനുള്ള ആദ്യഘട്ട പ്രവര്‍ത്തനങ്ങളിലാണ്‌. കമ്പനിയില്‍ സര്‍ക്കാരിനും പൊതുമേഖലയ്‌ക്കുമായി 51% ഓഹരിയും സ്വകാര്യ, സഹകരണ മേഖലയ്‌ക്ക്‌ 49% ഓഹരിയുമാണ്‌ ഉണ്ടാവുക.

കൂടുതല്‍ വാര്‍ത്തകള്‍ - കേരളം