മൗലികവാദം തടയുന്നതില്‍ കമ്യൂണിറ്റി പോലീസിംഗിന് മുഖ്യപങ്ക് വഹിക്കാനാകും: സ്പീക്കര്‍ പി. ശ്രീരാമകൃഷ്ണന്‍

March 18, 2017 കേരളം

തിരുവനന്തപുരം: മൗലികവാദം തടയുന്നതില്‍ കമ്യൂണിറ്റി പോലീസിംഗിന് അത്ഭുതങ്ങള്‍ സൃഷ്ടിക്കാനാകുമെന്നും, പൊലീസിംഗിലെ പൊതുപങ്കാളിത്തം സുരക്ഷിതത്വബോധവും സഹവര്‍ത്തിത്വവും വളര്‍ത്തുമെന്നും നിയമസഭാ സ്പീക്കര്‍ പി. ശ്രീരാമകൃഷ്ണന്‍ അഭിപ്രായപ്പെട്ടു. കോവളത്ത് നടന്ന കമ്മ്യൂണിറ്റി പോലീസിങ് ദേശീയ സമ്മേളനത്തിന്റെ സമാപനസമ്മേളനം ഉദ്ഘാടനം ചെയ്തുസംസാരിക്കുകയായിരുന്നു അദ്ദേഹം.

ചാണക്യന്റെ അര്‍ഥശാസ്ത്രത്തില്‍ 2300 വര്‍ഷം മുമ്പ് കമ്യൂണിറ്റി പോലീസിംഗിന്റെ പ്രസക്തി ചൂണ്ടിക്കാട്ടിയിട്ടുണ്ട്. ജനങ്ങളും കച്ചവടക്കാരും വിദ്യാര്‍ഥികളുമായി പോലീസ് സമ്പ്രദായത്തിന്റെ ആശയവിനിമയത്തിന്റെ ആവശ്യകതയാണ് അദ്ദേഹം പറഞ്ഞത്. എല്ലാവിധത്തിലുമുള്ള വികാസമായിരിക്കണം ജനാധിപത്യം. പുരോഗമനപരമായ ജനാധിപത്യസമ്പ്രദായത്തില്‍ പരമ്പരാഗത പോലീസ് ശൈലികള്‍ മാത്രം പിന്തുടരുന്നത് ഉചിതമാകില്ല. സമൂഹവും പോലീസും തമ്മിലുള്ള അര്‍ഥപൂര്‍ണമായ ഇടപെടലിന് വഴിവെക്കുന്ന കമ്മ്യൂണിറ്റി പോലീസിംഗ്, സുരക്ഷിതമായ ജനാധിപത്യ അടിത്തറ ഒരുക്കാന്‍ അനിവാര്യമാണ്. നിയമങ്ങള്‍ ഏകപക്ഷീയമായി അടിച്ചേല്‍പ്പിക്കുന്ന പരമ്പരാഗത പോലീസ്‌ശൈലിക്ക് ഇതൊരു ബദലാണ്. യാന്ത്രികമായ പഴയശൈലിയെ കൂടുതല്‍ ജനാധിപത്യവത്കരിക്കാന്‍ ഇത് സഹായിക്കും. ജനമൈത്രീ സുരക്ഷാപദ്ധതി ഒട്ടേറെ പുതിയ മേഖലകളില്‍ മികവറിയിച്ചിട്ടുണ്ട്. റോഡ് സുരക്ഷാ, ലഹരിക്കെതിരായ പോരാട്ടം, സ്ത്രീസുരക്ഷാ തുടങ്ങിയവ ഉദാഹരണങ്ങളാണ്. പോലീസെന്നാല്‍ അധികാരത്തിന്റെ കരാളഹസ്തങ്ങളാണെന്ന തോന്നലുണ്ടാക്കാതെ സൃഹൃത്തും, വഴികാട്ടിയുമാകണം. ജനമൈത്രീ കേന്ദ്രങ്ങള്‍ക്ക് ഇക്കാര്യത്തില്‍ വലിയ പങ്ക് വഹിക്കാനാകുന്നുണ്ട്. ഇന്നത്തെ സാഹചര്യത്തില്‍, യുവാക്കളും വിദ്യാര്‍ഥികളുമാണ് സാമൂഹ്യവിരുദ്ധപ്രവര്‍ത്തനങ്ങളിലേക്ക് വഴുതിവീഴാന്‍ ഏറെ സാധ്യതയുള്ളത്. തീവ്ര ആശയഗതികളിലേക്ക് വഴുതിവീഴുന്നവര്‍ പലരും ടെക്‌നോക്രാറ്റുകളും മറ്റുമാണ്. മൗലികവാദവും തീവ്രവാദവും സമൂഹത്തില്‍ പ്രശ്‌നമായി വളരുമ്പോള്‍ തടയിടുന്നതില്‍ കമ്മ്യൂണിറ്റി പോലീസിംഗിന് മികച്ച പങ്കുവഹിക്കാനാകുമെന്നും അദ്ദേഹം പറഞ്ഞു.

ഡോ. എ. സമ്പത്ത് എം.പി ചടങ്ങില്‍ അധ്യക്ഷത വഹിച്ചു. ചടങ്ങില്‍ പ്രമുഖ മാധ്യമപ്രവര്‍ത്തകന്‍ പ്രവീണ്‍ സ്വാമി, കോണ്‍ഫ്‌ളിക്ട് മാനേജ്‌മെന്റ് ഇന്‍സ്റ്റിറ്റ്യൂട്ട് എക്‌സിക്യൂട്ടീവ് ഡയറക്ടര്‍ അജയ് സാഹ്‌നി എന്നിവര്‍ സംബന്ധിച്ചു. ദക്ഷിണമേഖലാ എ.ഡി.ജി.പി ഡോ.ബി. സന്ധ്യ സ്വാഗതവും ഡി.ഐ.ജി ഷെഫീന്‍ അഹമ്മദ് നന്ദിയും പറഞ്ഞു.

കൂടുതല്‍ വാര്‍ത്തകള്‍ - കേരളം