ബന്ദിപ്പൂര്‍ വനമേഖലയിലെ രാത്രികാലയാത്ര നിരോധനത്തിന്റെ സമയംനീട്ടി

October 8, 2011 ദേശീയം

മൈസൂര്‍: ബന്ദിപ്പൂര്‍ വനമേഖലയിലെ രാത്രികാലയാത്ര നിരോധനത്തിന്റെ സമയം 9 മണിക്കൂറില്‍ നിന്ന് 12 മണിക്കൂറായി ദീര്‍ഘിപ്പിച്ചു. കഴിഞ്ഞ ദിവസം ഗുണ്ടല്‍പ്പേട്ടിനടുത്ത് ഒരു കുട്ടിയാന ചരക്ക് ലോറി ഇടിച്ച് ചെരിഞ്ഞതിനെ തുടര്‍ന്നാണ് നിരോധന സമയം നീട്ടിയത്. കര്‍ണാടക വനംമന്ത്രി സി.പി. യോഗേശ്വറാണ് ഇത് സംബന്ധിച്ച ഉത്തരവിട്ടത്. നിരോധനം ഇന്നു രാത്രി മുതല്‍ നിലവില്‍ വരും.

ബന്ദിപ്പൂര്‍ വനമേഖലയില്‍ ചരക്ക് ലോറിയിടിച്ച് കുട്ടിയാന ചെരിഞ്ഞിരുന്നു. രാത്രി യാത്രാ നിരോധന സമയം കര്‍ണാടക സര്‍ക്കാര്‍ ദീര്‍ഘിപ്പിച്ചത് കേരളത്തില്‍ നിന്ന് ബാംഗ്ലൂര്‍, മൈസൂര്‍ എന്നിവിടങ്ങളിലേക്കുള്ള യാത്രക്കാര്‍ക്ക് കൂടുതല്‍ ബുദ്ധിമുട്ടുണ്ടാക്കും. ആനയെ ഇടിച്ച് തെറിപ്പിച്ച ശേഷം ലോറി നിര്‍ത്താതെ പോവുകയാണുണ്ടായത്. ബുധനാഴ്ച രാത്രി മൈസൂര്‍ സുല്‍ത്താന്‍ ബത്തേരി റൂട്ടിലായിരുന്നു സംഭവം. ചരക്ക് ലോറിയുടെ െ്രെഡവറായ കോഴിക്കോട് സ്വദേശി അബ്ദുള്‍ അസീസിനെ  പോലീസ് കസ്റ്റഡിയിലെടുത്തിരുന്നു.

രാത്രി റോഡിന് തൊട്ടടുത്തുള്ള മൂളേഹോളേ നദിയില്‍നിന്ന് വെള്ളം കുടിച്ചതിനുശേഷം കാട്ടിലേക്ക് മടങ്ങുന്നതിനിടെ ലോറി ഇടിക്കുകയായിരുന്നു. ഇടിയുടെ ആഘാതത്തില്‍ ആനക്കുട്ടി അന്‍പത് അടിയോളം തെറിച്ചുപോയി. ശരീരഭാഗങ്ങള്‍ ഛിന്നഭിന്നമാവുകയും ചെയ്തു. ലോറിയുടെ പിന്നാലെയുണ്ടായിരുന്ന മറ്റൊരു വാഹനത്തിലെ യാത്രക്കാര്‍ സംഭവം ഉടന്‍ പോലീസില്‍ അറിയിച്ചു.

കൂടുതല്‍ വാര്‍ത്തകള്‍ - ദേശീയം