യൂറോപ്പില്‍ നിന്ന് കൊച്ചിയിലേക്ക് നേരിട്ട് വിമാന സര്‍വീസ് ആരംഭിക്കുന്നു

October 8, 2011 രാഷ്ട്രാന്തരീയം

ബര്‍ലിന്‍: യൂറോപ്പില്‍ നിന്ന് കൊച്ചിയിലേക്ക് നേരിട്ട് വിമാന സര്‍വീസ് ആരംഭിക്കുന്നതിന്റെ ഭാഗമായി ജര്‍മനിയുടെ ദേശീയ വിമാന സര്‍വീസായ ലുഫ്ത്താന്‍സാ എയര്‍ലൈന്‍സ് അധികൃതര്‍ കൊച്ചിയിലെത്തി പ്രാരംഭ ചര്‍ച്ച നടത്തി. കമ്പനിയുടെ സൗത്ത് ഏഷ്യ ഡയറക്ടര്‍ അക്‌സല്‍ ഹില്‍ഗേഴ്‌സ് ആണ് നെടുമ്പാശേരി വിമാനത്താവളത്തിലെത്തി സിയാല്‍ അധികൃതരുമായി ചര്‍ച്ച നടത്തിയത്. സിയാല്‍ കമ്പനി ഉന്നത ഉദ്യോഗസ്ഥരെ കൂടാതെ കൊച്ചിന്‍ ചേംബര്‍ ഓഫ് കൊമേഴ്‌സ്, ട്രാവല്‍, ടൂറിസം, ഹോട്ടല്‍ തുടങ്ങിയവയുടെ പ്രതിനിധികളും ചര്‍ച്ചയില്‍ പങ്കെടുത്തു.

ഇതോടെ യൂറോപ്പില്‍ നിന്ന് കൊച്ചിയിലേക്ക് നേരിട്ട് സര്‍വീസ് ആരംഭിക്കാന്‍ ലുഫ്ത്താന്‍സയ്ക്ക് താല്പര്യമുണ്ടെന്ന് കമ്പനി വ്യക്തമാക്കി. അടുത്ത നടപടിയെന്നോണം ജര്‍മനിയില്‍ നിന്ന് ലുഫ്ത്താന്‍സായുടെ ഉന്നതതല സംഘം കൊച്ചിയിലെത്തി സിയാല്‍/സര്‍ക്കാര്‍ പ്രതിനിധികളുമായി വിശദമായ ചര്‍ച്ചകള്‍ നടത്തുമെന്ന് ഉറപ്പായി. ഈ ചര്‍ച്ചയെ തുടര്‍ന്നായിരിയ്ക്കും സര്‍വീസ് തുടങ്ങുന്നനെക്കുറിച്ചുള്ള അന്തിമ തീരുമാനം ഉരുത്തിരിയുക. നെടുമ്പാശേരി വിമാനത്താവളത്തിലെ സൗകര്യങ്ങളും മറ്റു സംവിധാനങ്ങളും അക്‌സല്‍ ഹില്‍ഗേഴ്‌സ് കണ്ടു മനസ്സിലാക്കിയത് പദ്ധതിയുടെ ഒരു പ്‌ളസ് പോയിന്റായി കണക്കാക്കാം. .

നിലവില്‍ യൂറോപ്പില്‍ നിന്ന് കൊച്ചിയിലേക്കും അതുപോലെതന്നെ തിരിച്ചും പ്രതിവാരം 2000/3000 ആളുകള്‍ യാത്രചെയ്യുന്നുണ്ടെന്നാണ് ഔദ്യോഗിക കണക്കുകള്‍ പറയുന്നത്. ഇതനുസരിച്ച് യൂറോപ്പില്‍ നിന്ന് കൊച്ചിയിലേക്ക് നിത്യേനയോ അല്ലെങ്കില്‍ ആഴ്ചയില്‍ കുറഞ്ഞത് മൂന്നു സര്‍വ്വീസെങ്കിലും നടത്താന്‍ സാധിച്ചാല്‍ യൂറോപ്യന്‍ മലയാളികളുടെ ഇതുവരെയുള്ള മുറവിളിയ്ക്ക് ഒരുപരിധിവരെ പരിഹാരമാവും.

കൂടുതല്‍ വാര്‍ത്തകള്‍ - രാഷ്ട്രാന്തരീയം