സമാധാനത്തിന് ഏറ്റവും വലിയ ഭീഷണി ഭീകരത : രാഷ്ട്രപതി

August 15, 2010 ദേശീയം,മറ്റുവാര്‍ത്തകള്‍

ന്യൂഡല്‍ഹി: അക്രമത്തിന്റെ പാത ഉപേക്ഷിച്ച് ചര്‍ച്ചയ്ക്ക് തയ്യാറാകാന്‍ രാഷ്ട്രപതി പ്രതിഭാപാട്ടീല്‍ മാവോവാദികളോട് ആഹ്വാനം ചെയ്തു. സ്വാതന്ത്ര്യദിനത്തലേന്ന് രാഷ്ട്രത്തെ അഭിസംബോധന ചെയ്യുകയായിരുന്നു അവര്‍.ആഗോള സമാധാനത്തിന് ഏറ്റവും വലിയ ഭീഷണി ഭീകരതയാണെന്ന് പറഞ്ഞ രാഷ്ട്രപതി, അതിനെ പരാജയപ്പെടുത്താന്‍ എല്ലാരാജ്യങ്ങളും ഒന്നിക്കണമെന്നും ഭീകരര്‍ക്ക് താവളങ്ങളും സാമ്പത്തിക സഹായവും ലഭിക്കുന്നില്ലെന്ന് ഉറപ്പുവരുത്തണമെന്നും പറഞ്ഞു.

മാവോവാദി ആക്രമണം രൂക്ഷമായ പ്രദേശങ്ങളില്‍ ക്രിയാത്മകമായ വികസനശ്രമങ്ങളുണ്ടാവണം. അവരെ വികസനത്തിന്റെ വഴിയിലേക്ക് കൊണ്ടുവരാന്‍ എല്ലാവരും മുന്നോട്ടുവരുമെന്ന് രാഷ്ട്രപതി പ്രതീക്ഷ പ്രകടിപ്പിച്ചു.
കഠിനാധ്വാനത്തോടെയും ക്ഷമയോടെയുമുള്ള പ്രവൃത്തികളാണ് രാഷ്ട്രനിര്‍മാണത്തിന് ആവശ്യം. ഒരേലക്ഷ്യവും പ്രശ്‌നങ്ങള്‍ക്ക് നേരെ ഒറ്റക്കെട്ടായി നില്‍ക്കാനുള്ള മനഃസ്ഥിതിയും ഉണ്ടാവണം. മാവോവാദിപ്രശ്‌നം പരിഹരിക്കാന്‍ അനുരഞ്ജനത്തിന്റെ മാര്‍ഗമാണ് വേണ്ടത്. ചര്‍ച്ചയാണ് ഇതിനുള്ള ഏറ്റവും നല്ലവഴി. മറ്റുള്ളവരെ ശ്രദ്ധയോടെ കേട്ടും പരസ്​പര വീക്ഷണങ്ങളെ ബഹുമാനിച്ചും പരസ്​പരം മനസ്സിലാക്കിയും മുന്നിലുള്ള പ്രശ്‌നങ്ങളെ അഭിമുഖീകരിക്കാന്‍ നമുക്കുകഴിയും- രാഷ്ട്രപതി പറഞ്ഞു.

ലോകസമാധാനത്തിനും സുസ്ഥിതിക്കും സുരക്ഷയ്ക്കും ഭീഷണി ഭീകരതയാണ്. ലോകത്തിന്റെ അഭിവൃദ്ധിക്ക് സമാധാനം അത്യന്താപേക്ഷിതമാണ്. ഇതിന് എല്ലാ ലോകരാഷ്ട്രങ്ങളും യോജിച്ചു നില്‍ക്കണം- അവര്‍ ആഹ്വാനം ചെയ്തു.

നയങ്ങള്‍ ആസൂത്രണം ചെയ്യുകയും നടപ്പാക്കുകയും ചെയ്യുന്ന സര്‍ക്കാര്‍ അധികാരത്തെ ഉത്തരവാദിത്വത്തോടെ ഉപയോഗിക്കണം. അഴിമതിയെ വെച്ചുപൊറുപ്പിക്കാതിരിക്കുകയും പൊതുജന സേവനത്തിന് ഉന്നത മാനദണ്ഡങ്ങള്‍ പുലര്‍ത്തുകയും ചെയ്താല്‍ കാര്യക്ഷമമായ ഭരണം സാധ്യമാകും. ഇത് വികസനവും വളര്‍ച്ചയും ഇരട്ടിയാക്കും- രാഷ്ട്രപതി ചൂണ്ടിക്കാട്ടി.
ഭൗതികതയ്ക്ക് പ്രാധാന്യം വര്‍ധിച്ചുകൊണ്ടിരിക്കുന്ന സാഹചര്യത്തില്‍ എല്ലാവരും നിയമം അനുസരിക്കുകയും ധാര്‍മിക ഉന്നതിക്കായി പ്രയത്‌നിക്കുകയും വേണം. ശക്തമായ കുടുംബബന്ധങ്ങള്‍ ഇല്ലാതായിക്കൊണ്ടിരിക്കുന്നു. സാമൂഹിക മനസ്സാക്ഷിയും തകര്‍ച്ചയിലാണ്. ചില സാമൂഹിക തിന്മകള്‍ നിലനില്‍ക്കുന്നു. ഇതിന് മാറ്റമുണ്ടാകണം – അവര്‍ പറഞ്ഞു.

കൂടുതല്‍ വാര്‍ത്തകള്‍ - ദേശീയം