തിരുവനന്തപുരം: സംസ്ഥാനത്തിന്റെ താല്പര്യങ്ങള് സംരക്ഷിക്കുന്നതിനാകണം പ്രാമുഖ്യം നല്കേണ്ടതെന്ന് മുഖ്യമന്ത്രി ഉമ്മന്ചാണ്ടി. പാര്ലമെന്റിന്റെ ബജറ്റ് സമ്മേളനത്തിനു മുന്നോടിയായി തിരുവനന്തപുരം തൈക്കാട് ഗസ്റ്റ് ഹൗസില് വിളിച്ചു ചേര്ത്ത കേരളത്തില് നിന്നുള്ള എംപിമാരുടെ യോഗത്തില് ആമുഖ പ്രസംഗം നടത്തുകയായിരുന്നു അദ്ദേഹം.
സംസ്ഥാനത്തിന്റെ പൊതുവായ കാര്യങ്ങളില് രാഷ്ട്രീയം വേറെ, സംസ്ഥാന താല്പര്യങ്ങള്ക്കായുള്ള പ്രവര്ത്തനം വേറെ എന്ന പൊതു നിലപാടു സ്വീകരിച്ചാല് മാത്രമേ സംസ്ഥാനത്തിന് അഭിവൃദ്ധിയുണ്ടാവുകയുള്ളുവെന്നും മുഖ്യമന്ത്രി പറഞ്ഞു. കേരളം ഇന്ന് നേരിടുന്ന രണ്ട് പ്രധാന പ്രശ്നങ്ങള് കടലാക്രമണവും വന്യജീവി അക്രമണം മൂലമുള്ള നാശനഷ്ടങ്ങളുമാണ്. കേരളത്തിന് സാമ്പത്തിക പരിമിതി ഏറെയാണ്.പ്രകൃതി ദുരന്തങ്ങള് കഴിവിനപ്പുറമുള്ള കാര്യങ്ങളാണ്.ഇത്തരം സാഹചര്യങ്ങളില് സംസ്ഥാനത്തിന് മറ്റുള്ള സഹായങ്ങളും ആവശ്യമായി വരും. വനവും കൃഷിഭൂമിയുമായി ബന്ധപ്പെട്ട് കാട്ടുമൃഗങ്ങളുടെ അക്രമണം മൂലമുണ്ടാകുന്ന നാശനഷ്ടങ്ങളും ഏറെയാണ്. ഇത്തരം കാര്യങ്ങളില് സംസ്ഥാനത്തിന് ഒറ്റയ്ക്ക് ഒന്നും ചെയ്യാനാകില്ല.കേന്ദ്രത്തിന്റെ സഹായം കൂടി ഇക്കാര്യങ്ങളില് ആവശ്യമാണ്. ഇത് നേടിയെടുക്കാന് സംസ്ഥാനത്തുനിന്നുള്ള എംപിമാര് ഒറ്റക്കെട്ടായി ശ്രമിക്കണമെന്നും മുഖ്യമന്ത്രി പറഞ്ഞു.
മുഖ്യമന്ത്രിക്ക് പുറമേ സംസ്ഥാന മന്ത്രിസഭാംഗങ്ങളും, എന്.കെ.പ്രേമചന്ദ്രന്,ജോസ് കെ.മാണി ഉള്പ്പെടെയുള്ള എംപിമാരും മുന് കേന്ദ്രമന്ത്രിമാരും എംപിമാരുമായ എ.കെ.ആന്റണി, വയലാര് രവി, ഇ.അഹമ്മദ്, കൊടിക്കുന്നില് സുരേഷ്, കെ.സി.വേണുഗോപാല്, പ്രതിപക്ഷ എംപിമാരായ കെ.എന്.ബാലഗോപാല്, പി.കെ.ശ്രീമതി, എം.ബി.രാജേഷ്, ടി.എന്.സീമ, പി.കരുണാകരന്, ഇന്നസെന്റ് ഉള്പ്പെടെയുള്ളവരും ചീഫ് സെക്രട്ടറിയുള്പ്പെടെയുള്ള ഉദ്യോഗസ്ഥരും യോഗത്തില് പങ്കെടുത്തു.
Discussion about this post