ആലുവ : ആലുവ മണപ്പുറത്തെ ശിവക്ഷേത്രത്തില് വെള്ളം കയറിയതിനെ തുടര്ന്ന് അടിഞ്ഞ ചെളി നീക്കം ചെയ്യാത്തത് ഭക്തരെ ബുദ്ധിമുട്ടിലാക്കിയിട്ടും ദേവസ്വം ബോര്ഡിന് കുലുക്കമില്ല. കഴിഞ്ഞ 21നാണ് ഭൂതത്താന്കെട്ട് ഡാം തുറന്നതിനാലും കനത്ത മഴയെ തുടര്ന്നും പെരിയാര് കര കവിഞ്ഞ് മണപ്പുറത്തെ ശിവക്ഷേത്രത്തില് വെള്ളം കയറിയത്. തൊട്ടടുത്ത ദിവസം തന്നെ പെരിയാറിലെ ജലനിരപ്പ് സാധാരണ നിലയിലായെങ്കിലും ക്ഷേത്ര കോമ്പൗണ്ടില് അടിഞ്ഞ ചെളി ഇതുവരെ നീക്കം ചെയ്തിട്ടില്ല. മണപ്പുറത്തിന്റെ ഭൂനിരപ്പില് നിന്നും മൂന്നടിയോളം താഴെയാണ് ക്ഷേത്രം. അതിനാല് വെള്ളത്തോടൊപ്പം കയറുന്ന മാലിന്യങ്ങള് ക്ഷേത്രത്തില് കെട്ടികിടക്കും. ഇക്കുറി മറ്റ് മാലിന്യങ്ങളൊന്നും ഉണ്ടായില്ലെങ്കിലും ചെളി ധാരാളം ഉണ്ടായി. ചെളി നീക്കം ചെയ്തില്ലെങ്കില് ചെറിയ മഴ പെയ്താല് പോലും ഭക്തര്ക്ക് കോമ്പൗണ്ടിലേക്ക് ഇറങ്ങാന് കഴിയില്ല. കഴിഞ്ഞ ദിവസങ്ങളില് തുടര്ച്ചയായി ലഭിച്ച വെയിലില് ചെളി വിണ്ട് നില്ക്കുകയാണ്.എന്നിട്ടും നീക്കം ചെയ്യാത്ത ദേവസ്വം ബോര്ഡിന്റെ നടപടിയില് ഭക്തര്ക്ക് ശക്തമായ പ്രതിഷേധമുണ്ട്. ചെളി നീക്കം ചെയ്യാന് എത്രയും വേഗം നടപടിയുണ്ടാകണമെന്ന് ബി.ജെ.പി ആലുവ ടൗണ് പ്രസിഡന്റ് എ.സി. സന്തോഷ് കുമാര്, കര്ഷക മോര്ച്ച ജില്ലാ സെക്രട്ടറി രാജീവ് മുതിരക്കാട് എന്നിവര് ആവശ്യപ്പെട്ടു.
Discussion about this post