തിരുവനന്തപുരം: കണ്‍സ്യൂമര്‍ഫെഡിന്റെ സഹകരണ ഓണം വിപണിയുടെ സംസ്ഥാനതല ഉദ്ഘാടനം ആഗസ്റ്റ് ആറിന് വൈകുന്നേരം നാല് മണിക്ക് എല്‍.എം.എസ്. കോമ്പൗണ്ടില്‍ മുഖ്യമന്ത്രി ഉമ്മന്‍ ചാണ്ടി നിര്‍വ്വഹിക്കും. സഹകരണ വകുപ്പ് മന്ത്രി സി.എന്‍.ബാലകൃഷ്ണന്റെ അദ്ധ്യക്ഷതയില്‍ നടക്കുന്ന ചടങ്ങില്‍ ആരോഗ്യ ദേവസ്വം വകുപ്പ് മന്ത്രി വി.എസ്.ശിവകുമാര്‍ മുഖ്യാതിഥിയായിരിക്കും.
കെ.മുരളീധരന്‍ എം.എല്‍.എ. മുഖ്യപ്രഭാഷണം നടത്തും. മേയര്‍ കെ.ചന്ദ്രിക ആദ്യവില്‍പന നടത്തും. സഹകരണ വകുപ്പ് സെക്രട്ടറി കെ.ശ്രീനിവാസ്, സഹകരണ സംഘം രജിസ്ട്രാര്‍ ലളിതാംബിക, സംസ്ഥാന സഹകരണ സംഘം പ്രസിഡന്റ് കുര്യന്‍ ജോയി, നഗരസഭ അംഗം ലീലാമ്മ ഐസക്, നഗരസഭ പ്രതിപക്ഷ നേതാവ് ജോണ്‍സണ്‍ ജോസഫ്, കണ്‍സ്യൂമര്‍ഫെഡ് എക്‌സിക്യുട്ടീവ് ഡയറക്ടര്‍ മോളി സ്റ്റാന്‍ലി എന്നിവര്‍ ചടങ്ങില്‍ ആശംസ അര്‍പ്പിക്കും. ആഗസ്റ്റ് ഏഴ് മുതല്‍ സെപ്തംബര്‍ ആറ് വരെ ഒരു മാസം നീണ്ടു നില്‍ക്കുന്ന ഓണം വിപണന മേളയില്‍ 13 ഇനം നിത്യോപയോഗ സാധനങ്ങള്‍ 50 ശതമാനം വരെ വിലകുറച്ച് വില്‍ക്കും. ഒരു കുടുംബത്തിന് ഒരാഴ്ചത്തേക്ക് പച്ചരി രണ്ട് കിലോയും മറ്റു അരി ഇനങ്ങളില്‍ ഏതെങ്കിലും ഒന്നിന് ആറ് കിലോയും നല്‍കും. പഞ്ചസാര, കടല, വന്‍പയര്‍, തുവരപ്പരിപ്പ്, മുളക് എന്നിവ ഓരോ കിലോ വീതവും വെളിച്ചെണ്ണ ഒരു ലിറ്ററും ചെറുപയര്‍, ഉഴുന്ന്, മല്ലി എന്നിവ അര കിലോഗ്രാം വീതവും നല്‍കും. റേഷന്‍ കാര്‍ഡ് ഉള്ളവര്‍ക്കു കൂടുതല്‍ അംഗങ്ങള്‍ ഉള്ള വലിയ കുടുംബങ്ങള്‍ക്ക് ആനുപാതികമായ അളവില്‍ സാധനങ്ങള്‍ കൂട്ടി നല്‍കും.
Discussion about this post