തിരുവനന്തപുരം: തെരുവുനായ്ക്കളെ വന്ധ്യംകരിക്കുന്നതിന് കൂടുതല് ഡോക്ടര്മാരുടെ സേവനം ഉറപ്പുവരുത്താന് നഗരകാര്യ, ന്യൂനപക്ഷ ക്ഷേമവകുപ്പുമന്ത്രി മഞ്ഞളാംകുഴി അലിയുടെ അധ്യക്ഷതയില് ചേര്ന്ന ഉന്നതതല യോഗം തീരുമാനിച്ചു. ഡെപ്യൂട്ടേഷന് വ്യവസ്ഥയിലും കരാര് അടിസ്ഥാനത്തിലും ഡോക്ടര്മാരെ നിയമിക്കുന്നതിനും തീരുമാനമായി. സംസ്ഥാനത്തുടനീളം പദ്ധതി വ്യാപിപ്പിക്കുന്നതിനും അദ്ദേഹം നിര്ദ്ദേശം നല്കി.
സെപ്തംബര് ഒന്നുമുതല് തെരുവുനായ്ക്കളെ വന്ധ്യംകരിക്കുന്നത് കൂടതുല് ഊര്ജ്ജിതപ്പെടുത്തും. പ്രതിദിനം 80 എന്ന നിരക്കില് പിടികൂടാനും വന്ധ്യംകരിക്കാനുമാണ് ഉദ്ദേശിക്കുന്നത്. നിയമസഭാ പരിസരം, എം.എല്.എ.ഹോസ്റ്റല്, പാളയം, മെഡിക്കല് കോളേജ് തുടങ്ങിയ ഭാഗങ്ങളില് നിന്ന് ഇതിനകം പട്ടികളെ പിടികൂടി. മൃഗസംരക്ഷണ വകുപ്പിന്റെയും തിരുവനന്തപുരം സായിഗ്രാം ഓര്ഫനേജ് ട്രസ്റ്റിന്റെയും സഹകരണത്തോടെ സംസ്ഥാനത്ത് ആദ്യമായി നടപ്പാക്കിയ പദ്ധതിയില് യോഗം സംതൃപ്തി പ്രകടിപ്പിച്ചു. നഗരകാര്യമന്ത്രിയുടെ ചേമ്പറില് ചേര്ന്ന യോഗത്തില് മന്ത്രിമാര്ക്ക് പുറമേ മൃഗസംരക്ഷണ വകുപ്പ് ഡയറക്ടര് ഡോ.ശശി, നഗരകാര്യ ജോയിന്റ് ഡയറക്ടര് പയസ്, കെ.എസ്.യു.ഡി.പി. പ്രോജക്ട് ഡയറക്ടര് യു.വി.ജോസ്, സായിഗ്രാം ട്രസ്റ്റ് എക്സിക്യുട്ടീവ് ഡയറക്ടര് കെ.എന്.ആനന്ദ്കുമാര് തുടങ്ങിയവര് പങ്കെടുത്തു. തുടര്ന്ന് വന്ധ്യംകരണം നടക്കുന്ന ജില്ലാ മൃഗാശുപത്രി സന്ദര്ശിച്ച് പ്രവര്ത്തനം വിലയിരുത്തി.
മൃഗാശുപത്രികളില് ഇതിനായി കൂടുതല് സൗകര്യങ്ങള് ചെയ്യുമെന്ന് മന്ത്രി അറിയിച്ചു. നായ്ക്കളെ പിടിച്ചുകൊണ്ടുപോകുന്നതിനുള്ള വാഹനം, പ്രത്യേക കൂട് എന്നിവ സജ്ജീകരിക്കാനും നിര്ദ്ദേശം നല്കി.
Discussion about this post