കൊച്ചി: നിലവാരമില്ലാത്തതിന്റെ പേരില് അടച്ചുപൂട്ടിയ 418 ബാറുകളും വീണ്ടും പരിശോധിക്കണമെന്ന് ഹൈക്കോടതി ഉത്തരവിട്ടു. ഹൈക്കോടതി ഡിവിഷന് ബഞ്ചാണ് ഉത്തരവ് പുറപ്പെടുവിച്ചത്. പരിശോധനയ്ക്കായി നികുതി സെക്രട്ടറിയുടെയും എക്സൈസ് കമ്മീഷണറുടെയും നേതൃത്വത്തിലുള്ള സമിതിയെയും ഹൈക്കോടതി ചുമതലപ്പെടുത്തി. സര്ക്കാരിനെതിരേ ബാറുടമകള് നല്കിയ ഹര്ജിയിലാണ് ഉത്തരവ്. അതേസമയം, ബാറുകള് പരിശോധിക്കുന്നതിനോട് എതിര്പ്പില്ലെന്ന് സര്ക്കാര് കോടതിയില് വ്യക്തമാക്കിയിട്ടുണ്ട്. ലൈസന്സ് പുതുക്കി നല്കിയത് സുപ്രീം കോടതി നിര്ദേശം അനുസരിച്ചാണെന്നും സര്ക്കാര് അറിയിച്ചു.
അടച്ചിട്ടിരിക്കുന്ന 418 ബാറുകളും തുറക്കുന്നത് അനിശ്ചിതമായി മുന്നോട്ടുപോകാന് കഴിയില്ലെന്ന നിലപാടാണ് കോടതി അറിയിച്ചത്. മദ്യനയം രൂപീകരിക്കാന് സര്ക്കാരിന് ആറാഴ്ച സമയം നല്കിയിട്ടും നടപടിയുണ്ടായിട്ടില്ലെന്നും ഹര്ജിക്കാര് ചൂണ്ടിക്കാട്ടി. ഇതേത്തുടര്ന്ന്, 418 ബാറുകളും നിലവാരമില്ലാത്തവയാണെന്ന് എങ്ങനെയാണ് തിരിച്ചറിഞ്ഞതെന്ന് കോടതി എജിയോടു ചോദിച്ചു. 2006-ല് നടത്തിയ പരിശോധനയിലാണ് ബാറുകള്ക്ക് നിലവാരമില്ലാത്തതായി കണ്ടെത്തിയതെന്ന് സര്ക്കാര് കോടതിയെ അറിയിച്ചു. എന്നാല് എട്ടു വര്ഷം കഴിഞ്ഞ നിലയ്ക്ക് ബാറുകള് വീണ്ടും പരിശോധിക്കണമെന്ന ഹര്ജിക്കാരുടെ ആവശ്യം കോടതി അംഗീകരിക്കുകയായിരുന്നു.
നികുതി സെക്രട്ടറിയുടെയും എക്സൈസ് കമ്മീഷണറുടെയും നേതൃത്വത്തില് ബാറുകള് അതിവേഗം പരിശോധിച്ച് ഈമാസം 26-നകം റിപ്പോര്ട്ട് നല്കണമെന്നും ഹൈക്കോടതി നിര്ദേശം നല്കി. മദ്യനയം രൂപീകരിക്കുന്നതിന് സര്ക്കാരിന് 26 വരെ സമയം നല്കി.
Discussion about this post