തിരുവനന്തപുരം: യുവാക്കളില് വര്ദ്ധിച്ചു വരുന്ന മദ്യം, മയക്കുമരുന്ന് എന്നിവയുടെ ഉപഭോഗത്തിനെതിരെ കൂട്ടായ ശ്രമത്തിലൂടെയുടെയുള്ള ബോധവത്കരണം ഊര്ജിതപ്പെടുത്തണമെന്ന് എഡിഎം വി ആര് വിനോദ് അഭിപ്രായപ്പെട്ടു. മയക്കുമരുന്ന് ഉപയോഗത്തിനെതിരെ കളക്ടറേറ്റില് വിളിച്ചു ചേര്ത്ത സന്നദ്ധ സംഘടനകളുടെയും ഉദേ്യാഗസ്ഥരുടെയും യോഗത്തില് അദ്ധ്യക്ഷത വഹിക്കുകയായിരുന്നു അദ്ദേഹം.
സ്കൂള്-കോളേജ് വിദ്യാര്ത്ഥികളില് വര്ദ്ധിച്ചു വരുന്ന ലഹരി ഉപഭോഗത്തിന് അറുതി വരുത്തുവാന് മാതാപിതാക്കളുടെയും സ്കൂള്-കോളേജ് അധികാരികളുടെയും ഒരുമിച്ചുള്ള പ്രവര്ത്തനം ആവശ്യമാണെന്ന് യോഗം ചൂണ്ടിക്കാട്ടി. ലഹരിവസ്തുക്കളുടെ ഉത്ഭവസ്ഥാനവും വിതരണകേന്ദ്രങ്ങളും കണ്ടുപിടിച്ച് ഇല്ലായ്മ ചെയ്യുന്നതിന് ശക്തമായ നടപടികള് സ്വീകരിക്കാന് യോഗം തീരുമാനിച്ചു. അന്യസംസ്ഥാന തൊഴിലാളികള്ക്കിടയില് ലഹരിയുടെ ഉപഭോഗം കൂടുന്നത് കണക്കിലെടുത്ത് ബോധവത്കരണപ്രവര്ത്തനങ്ങള് അവര്ക്കിടയില് വ്യാപിപ്പിക്കും. മെഡിക്കല് സ്റ്റോറുകള് വഴി മരുന്നുകള് വിതരണം ചെയ്യുമ്പോള് ഡോക്ടറുടെ കുറിപ്പടി നിര്ബന്ധമാക്കേണ്ടതിന്റെ ആവശ്യകതയും യോഗം ചൂണ്ടിക്കാട്ടി. പാന്മസാല പോലുള്ള ലഹരിവസ്തുക്കള്ക്കെതിരെ പോലീസ്- എക്സൈസ് വകുപ്പുകള് സംയുക്തമായി സംഘടിപ്പിക്കുന്ന റെയ്ഡുകള് തുടരും.
Discussion about this post