തിരുവനന്തപുരം: വെള്ളക്കരം കുത്തനെ കൂട്ടാനും മദ്യത്തിന്റെയും സിഗരറ്റിന്റെയും നികുതി കൂട്ടാനും മന്ത്രിസഭായോഗത്തില്‍ തീരുമാനമായി. വെള്ളക്കരം 50 ശതമാനമാണ് കൂട്ടിയത്. സാമ്പത്തിക പ്രതിസന്ധി മറികടക്കാനുള്ള നിര്‍ദേശത്തിന്റെ ഭാഗായിട്ടാണ് ഈ തീരുമാനം. പൂര്‍ത്തിയായ പദ്ധതികളിലെ താത്കാലിക ജീവനക്കാരെ പിരിച്ചുവിടാനും തീരുമാനമായി.
10,000 ലിറ്റര്‍ വരെ വെള്ളം ഉപയോഗിക്കുന്നവര്‍ക്ക് നിരക്ക് വര്‍ധനയില്ല. 10,000 ലിറ്ററിന് മുകളില്‍ ഒരോ കിലോ ലിറ്ററിനും രണ്ട് രൂപയാണ് വര്‍ധിപ്പിച്ചത്. ഇതോടെ അധികമായി ഉപയോഗിക്കുന്ന ഒരു കിലോലിറ്റര്‍ വെള്ളത്തിന് നാല് രൂപയായിരുന്നത് ആറ് രൂപയാകും. ജലവിഭവവകുപ്പ് മുന്നോട്ട് വച്ച നിര്‍ദേശം മന്ത്രിസഭാ യോഗം അംഗീകരിക്കുകയായിരുന്നു.
വിദേശമദ്യം, ബിയര്‍, വൈന്‍, സിഗരറ്റ് എന്നിവയ്ക്ക് അധികനികുതി ചുമത്തുന്നതിലൂടെ 1,000 കോടിരൂപ അധികമായി സമാഹരിക്കാമെന്നാണ് ധനവകുപ്പിന്‍റെ കണക്കുകൂട്ടല്‍. വിദേശമദ്യത്തിന് 20 ശതമാനം നികുതി കൂടിയേക്കുമെന്നാണ് സൂചന.
സ്റ്റാമ്പ് ഡ്യൂട്ടി വര്‍ധിപ്പിച്ചു. ആഡംബര വീടുകള്‍ക്കും ഒന്നിലധികം കാറുകള്‍ സ്വന്തമായുള്ളവര്‍ക്കും അധിക നികുതി ചുമത്താനുള്ള തീരുമാനം അടുത്ത മന്ത്രിസഭാ യോഗത്തില്‍ ചര്‍ച്ചചെയ്യും. ഭൂമിയുടെ ന്യായ വില വര്‍ധിപ്പിക്കുന്നതില്‍ തീരുമാനമെടുക്കാന്‍ മന്ത്രിസഭാ ഉപസമിതിയെ ചുമതലപ്പെടുത്തി.
Discussion about this post