തിരുവനന്തപുരം: എന്‍ഡോസള്‍ഫാന്‍ ദുരിതബാധിതര്‍ക്കായി നിലവിലുള്ള പദ്ധതികള്‍ക്ക് പുറമേ സാമൂഹ്യനീതി വകുപ്പിന്റെ ചുമതലയില്‍ സമഗ്ര പുനരധിവാസപദ്ധതി നടപ്പാക്കുന്നു. ഇതിന്റെ ഭാഗമായി 25 കോടി രൂപയുടെ പുനരധിവാസ ഗ്രാമം, കൃഷി ആരോഗ്യം തുടങ്ങിയ ഇതര വകുപ്പുകളുമായി ചേര്‍ന്ന് സ്ഥാപിക്കും. ഇതിനായി 25 ഏക്കര്‍ ഭൂമി സാമൂഹ്യനീതി വകുപ്പ് ഏറ്റെടുക്കും.
എന്‍ഡോസള്‍ഫാന്‍ ബാധിതര്‍ക്കുള്ള ആരോഗ്യ പരിരക്ഷ, പുനരധിവാസം, ദീര്‍ഘകാല ആവാസ പദ്ധതി തുടങ്ങിയവ ഉള്‍ക്കൊള്ളുന്ന സമഗ്ര പദ്ധതിയാണ് ഇത്. ഭോപ്പാല്‍ കോമ്പാസിറ്റ് റീജിയണല്‍ സെന്റര്‍ മാതൃകയില്‍ എന്‍ഡോസള്‍ഫാന്‍ ദുരിത ബാധിതര്‍ക്കുള്ള വൈദ്യ, പുനരധിവാസ സംവിധാനങ്ങള്‍ ഉള്‍ക്കൊള്ളുന്ന കോമ്പോസിറ്റ് റീജിയണല്‍ സെന്ററും പദ്ധതിയുടെ ഭാഗമാണ്. മാനസിക വെല്ലുവിളികള്‍ നേരിടുന്നവര്‍ക്കുളള സമഗ്ര അസിസ്റ്റഡ് ലിവിങ് പദ്ധതി നിര്‍ദ്ദിഷ്ട പുനരധിവാസ ഗ്രാമത്തിന്റെ ഭാഗമാണ്. പദ്ധതി രൂപരേഖ തയാറാക്കി സമര്‍പ്പിക്കുന്നതിന് 12 അംഗ വിദഗ്ദ്ധ സമിതി രൂപീകരിച്ചു. പഞ്ചായത്ത് സാമൂഹ്യനീതി വകുപ്പ് മന്ത്രി ഡോ.എം.കെ.മുനീര്‍, കൃഷിവകുപ്പ് മന്ത്രി കെ.പി.മോഹനന്‍ എന്നിവരുടെ സാന്നിധ്യത്തില്‍ തിരുവനന്തപുരത്ത് ചേര്‍ന്ന യോഗത്തില്‍ എം.എല്‍.എ. മാരായ ഇ.ചന്ദ്രശേഖരന്‍, കെ.കുഞ്ഞിരാമന്‍, ജില്ലാ പഞ്ചായത്ത് പ്രസിഡണ്ട് അഡ്വ.വി.ശ്യാമളാദേവി, സാമൂഹ്യനീതി വകുപ്പ് അഡീഷണല്‍ ചീഫ് സെക്രട്ടറി ഡോ.കെ.എം.ഏബ്രഹാം, ആരോഗ്യവകുപ്പ് സ്‌പെഷ്യല്‍ സെക്രട്ടറി ഡോ.എം.ബീന, സാമൂഹ്യനീതി വകുപ്പ് ഡയറക്ടര്‍ വി.എന്‍.ജിതേന്ദ്രന്‍, സാമൂഹ്യസുരക്ഷാ മിഷന്‍ എക്‌സിക്യൂട്ടീ്‌വ് ഡയറക്ടര്‍ ഡോ.ടി.പി.അഷ്‌റഫ് സംസ്ഥാന വികലാംഗ ക്ഷേമ കോര്‍പ്പറേഷന്‍ മാനേജിങ് ഡയറക്ടര്‍ ഡോ.റോഷന്‍ ബിജ്‌ലി എന്നിവര്‍ പങ്കെടുത്തു
