വിശാഖപട്ടണം: സീതാറാം യെച്ചൂരിയെ സിപിഎമ്മിന്റെ പുതിയ ജനറല് സെക്രട്ടറിയായി തെരഞ്ഞെടുത്തു. ജനറല് സെക്രട്ടറി സ്ഥാനത്തേയ്ക്ക് ശക്തമായി രംഗത്തുണ്ടായിരുന്ന എസ്.രാമചന്ദ്രന്പിള്ള പിന്മാറിയതോടെയാണ് വോട്ടെടുപ്പില്ലാതെ യെച്ചൂരി സിപിഎമ്മിന്റെ ന്തേൃത്വത്തിലെത്തുന്നത്. മത്സരിക്കാനും തയാറാണെന്ന് യെച്ചൂരി പ്രഖ്യാപിച്ചതോടെ മത്സരത്തിനില്ലെന്ന് അറിയിച്ച് എസ്ആര്പി പിന്മാറുകയായിരുന്നു.
കേരള ഘടകവും നിലവിലെ ജനറല് സെക്രട്ടറി പ്രകാശ് കാരാട്ടും എസ്ആര്പിക്ക് വേണ്ടി ശക്തമായി വാദിച്ചെങ്കിലും ഫലമുണ്ടായില്ല. ഭൂരിപക്ഷം സംസ്ഥാന ഘടകങ്ങളുടെയും കേന്ദ്ര കമ്മിറ്റിയിലെ ഭൂരിപക്ഷത്തിന്റെയും പിന്തുണ ഉറപ്പാക്കിയ യെച്ചൂരി മത്സരിക്കാനും തയാറായാണ് രംഗത്തുണ്ടായിരുന്നത്. ഇതോടെ യെച്ചൂരിയെ എതിര്ത്ത് നിന്ന കേരളത്തിലെ ഔദ്യോഗിക പക്ഷവും നിലപാട് മയപ്പെടുത്തി. പോളിറ്റ് ബ്യൂറോ അംഗം എം.എ.ബേബിയും യെച്ചൂരി ജനറല് സെക്രട്ടറിയാകുന്നതിനെ അനുകൂലിച്ചു.
നിലവിലെ ജനറല് സെക്രട്ടറി പ്രകാശ് കാരാട്ട് എസ്ആര്പിയുടെ പേരാണ് നിര്ദ്ദേശിച്ചിരുന്നത്. തുടര്ന്നാണ് ഇക്കാര്യത്തില് രൂക്ഷമായ തര്ക്കങ്ങള് ഉടലെടുത്തത്. ജനറല് സെക്രട്ടറി സ്ഥാനത്തേയ്ക്ക് വോട്ടെടുപ്പ് നടക്കുമെന്ന സ്ഥിതി വരെ ഒരുഘട്ടത്തില് എത്തിയിരുന്നു. തുടര്ന്ന് മണിക് സര്ക്കാര് ഉള്പ്പടെയുള്ള മുതിര്ന്ന നേതാക്കള് ഇടപെട്ടാണ് സമവായം ഉണ്ടാക്കിയത്.
സിപിഎമ്മിന്റെ അഞ്ചാം ജനറല് സെക്രട്ടറിയാണ് യെച്ചൂരി. രാജ്യസഭയിലെ സിപിഎം കക്ഷി നേതാവ് കൂടിയായ യെച്ചൂരി പാര്ട്ടിയുടെ ചിരിക്കുന്ന മുഖമായാണ് അറിയപ്പെടുന്നത്. 1952 ഓഗസ്റ്റ് 12ന് സര്വേശ്വര സോമയാജലുവിന്റെയും കല്പ്പാക്കത്തിന്റെയും മകനായി ഹൈദരാബാദിലായിരുന്നു അദ്ദേഹത്തിന്റെ ജനനം. സ്കൂള് വിദ്യാഭ്യാസത്തിനു ശേഷം ഡല്ഹിയില് സെന്റ് സ്റ്റീഫന്സ് കോളജില് നിന്നും ഡിഗ്രി കരസ്ഥമാക്കി. 1975ല് ജവഹര്ലാല് നെഹ്റു സര്വകലാശാലയില് നിന്നും ഇക്കണോമിക്സില് മാസ്റ്റര് ബിരുദം നേടി.
1974ല് എസ്എഫ്ഐയിലൂടെയാണ് യെച്ചൂരിയുടെ രാഷ്ട്രീയ ജീവിതം തുടങ്ങുന്നത്. തുടര്ന്ന് ജെഎന്യുവില് എത്തി. അടിയന്തരാവസ്ഥ കാലത്ത് അറസ്റ്റിലായ യെച്ചൂരി പിന്നീട് മുഴുവന് സമയവും പൊതുപ്രവര്ത്തകനായി. ഇതിനിടെ ഡോക്ടറേറ്റും പൂര്ത്തിയാക്കാന് കഴിഞ്ഞില്ല. മൂന്ന് തവണ ജെഎന്യുവില് വിദ്യാര്ഥി യൂണിയന് പ്രസിഡന്റായും തെരഞ്ഞെടുക്കപ്പെട്ടിട്ടുണ്ട്.
1978ല് എസ്എഫ്ഐ അഖിലേന്ത്യ ജോയിന്റ് സെക്രട്ടറിയായി തെരഞ്ഞെടുക്കപ്പെട്ട യെച്ചൂരി അതെ വര്ഷം തന്നെ എസ്എഫ്ഐ അഖിലേന്ത്യ പ്രസിഡണ്ടായും തെരഞ്ഞെടുക്കപ്പെട്ടു. 1985ല് സിപിഎം കേന്ദ്ര കമ്മിറ്റിയിലേക്ക് തെരഞ്ഞെടുക്കപ്പെട്ട അദ്ദേഹം 1992 മുതല് പോളിറ്റ് ബ്യൂറോ അംഗമാണ്.
മറ്റ് രാഷ്ട്രീയ കക്ഷികളിലെ നേതാക്കളുമായും നല്ല ബന്ധം പുലര്ത്തുന്ന യെച്ചൂരി പാര്ട്ടിയുടെ ജനകീയ മുഖമായാണ് അറിയപ്പെടുന്നത്. വാഗ്മിയും നയതന്ത്രജ്ഞനുമായി അറിയപ്പെടുന്ന അദ്ദേഹം മാവോയിസ്റ്റുകളെ ജനതിപത്യത്തിന്റെ പാതയിലേക്ക് നയിക്കുന്നതിന് മുന്നിട്ടിറങ്ങിയും ജനശ്രദ്ധ നേടി.
Discussion about this post