ചെന്നൈ: അനധികൃത സ്വത്തു സമ്പാദനക്കേസില്‍ കുറ്റവിമുക്തയായതിനാല്‍ ജയലളിത വീണ്ടും തമിഴ്‌നാട് മുഖ്യമന്ത്രിയാകും. വെള്ളിയാഴ്ച രാവിലെ ചേര്‍ന്ന എഐഎഡിഎംകെ നിയമസഭാകക്ഷിയോഗം ജയലളിതയെ നേതാവായി തെരഞ്ഞെടുത്തു. ഇതേ തുടര്‍ന്നു ഗവര്‍ണര്‍ ജയലളിതയെ സര്‍ക്കാരുണ്ടാക്കാന്‍ ക്ഷണിച്ചിട്ടുണ്ട്. സത്യപ്രതിജ്ഞ ശനിയാഴ്ച നടക്കും. മദ്രാസ് സര്‍വകലാശാലയിലെ സെന്റിനറി ഓഡിറ്റോറിയത്തില്‍ ശനിയാഴ്ച രാവിലെ 10:30 ന് സത്യപ്രതിജ്ഞാ ചടങ്ങു നടക്കും. കേന്ദ്രമന്ത്രിസഭയിലെ പ്രമുഖരാരെങ്കിലും ചടങ്ങില്‍ പങ്കെടുത്തേക്കുമെന്നാണു സൂചന. എംജിആര്‍, പെരിയാര്‍, പ്രതിമകളില്‍ പുഷ്പാര്‍ച്ചന നടത്തിയ ശേഷമാകും ജയലളിത സത്യപ്രതിജ്ഞയ്‌ക്കെത്തുക.
ജയലളിതയെ നിയസഭാകക്ഷി നേതാവായി തെരഞ്ഞെടുത്തതിനെ തുടര്‍ന്നു മുഖ്യമന്ത്രി ഒ. പനീര്‍ശെല്‍വം രാജിവച്ചു. ജയലളിതയെ പാര്‍ട്ടി നിയമസഭാകക്ഷി നേതാവായി തെരഞ്ഞെടുത്താല്‍ പനീര്‍ശെല്‍വം രാജിവയ്ക്കുമെന്ന് എഐഎഡിഎംകെ നേരത്തേ അറിയിച്ചിരുന്നു. 2014 സെപ്റ്റംബറില്‍ അഴിമതി നിരോധന നിയമപ്രകാരം ജയലളിത ജയിലില്‍ പോയതിനാലാണു പനീര്‍ശെല്‍വം മുഖ്യമന്ത്രി സ്ഥാനത്തെത്തിയത്.
66.55 കോടി രൂപയുടെ അനധികൃത സ്വത്തുസമ്പാദനക്കേസില്‍ വിചാരണക്കോടതി വിധിച്ച നാലു വര്‍ഷം തടവും 100 കോടി രൂപ പിഴയുമടങ്ങുന്ന ശിക്ഷയാണു ഹൈക്കോടതി റദ്ദാക്കിയത്. ഇതേ തുടര്‍ന്നാണു ജയയ്ക്കു വീണ്ടും മുഖ്യമന്ത്രി സ്ഥാനത്തേക്ക് തിരിച്ചെത്താനുള്ള വഴി തെളിഞ്ഞത്.
Discussion about this post