തിരുവനന്തപുരം: സംസ്ഥാനത്തെ 240 തദ്ദേശ സ്വയംഭരണ സ്ഥാപനങ്ങളുടെ വാര്ഡ് വിഭജന കരട് വിജ്ഞാപനങ്ങളിന്മേല് ഒട്ടാകെ 3008 ആക്ഷേപങ്ങള് ലഭിച്ചതായി ഡീലിമിറ്റേഷന് സെക്രട്ടറി അറിയിച്ചു. ആക്ഷേപങ്ങളും അഭിപ്രായങ്ങളും സമര്പ്പിക്കുന്നതിനുള്ള സമയപരിധി ജൂണ് 15 വരെ ആയിരുന്നു.
ജില്ല തിരിച്ചുള്ള കണക്ക് ചുവടെ. തിരുവനന്തപുരം – 326, കൊല്ലം – 420, പത്തനംതിട്ട – 90, ആലപ്പുഴ – 46, കോട്ടയം – 81, ഇടുക്കി – 44, എറണാകുളം – 181, തൃശ്ശൂര് – 83, പാലക്കാട് – 256, മലപ്പുറം – 435, കോഴിക്കോട് – 345, വയനാട് -162, കണ്ണൂര് – 367, കാസര്ഗോഡ് – 172. ആക്ഷേപങ്ങളില് അന്വേഷണം നടത്തുന്നതിന് ജില്ലാതല ഉദ്യോഗസ്ഥരെ ചുമതലപ്പെടുത്തിയിട്ടുണ്ട്.
അന്വേഷണ ഉദ്യോഗസ്ഥര് തദ്ദേശ സ്വയംഭരണ സ്ഥാപന സെക്രട്ടറിമാരില് നിന്നും ആക്ഷേപം സമര്പ്പിച്ചവരില് നിന്നും വിവരശേഖരണവും സ്ഥലം പരിശോധനയും നടത്തി ജില്ലാ തെരഞ്ഞെടുപ്പ് ഉദ്യോഗസ്ഥന് റിപ്പോര്ട്ട് സമര്പ്പിക്കും. ജില്ലാ തെരഞ്ഞെടുപ്പ് ഉദ്യോഗസ്ഥന് റിപ്പോര്ട്ടുകള് ക്രോഡീകരിച്ച് ശുപാര്ശ സഹിതം കമ്മിഷന് സമര്പ്പിക്കും. അന്വേഷണ റിപ്പോര്ട്ടും ആക്ഷേപങ്ങളും അഭിപ്രായങ്ങളും സമര്പ്പിച്ച വ്യക്തികളെ നേരില് കേട്ട് ലഭിക്കുന്ന വിവരങ്ങളും കണക്കിലെടുത്ത് കമ്മിഷന് അന്തിമ ഉത്തരവ് പുറപ്പെടുവിക്കുമെന്ന് കമ്മിഷന് സെക്രട്ടറി അറിയിച്ചു.
Discussion about this post