മുംബൈ: മുംബൈ സ്ഫോടനത്തിന്റെ മുഖ്യ സൂത്രധാരനായ യാക്കൂബ് മേമന്റെ വധശിക്ഷ ജൂലൈ 30നു നടപ്പാക്കിയേക്കുമെന്നു റിപ്പോര്ട്ട്. വധശിക്ഷയ്ക്കെതിരേ മേമന് നല്കിയ ഹര്ജി 21നു സുപ്രീം കോടതി തീര്പ്പാക്കും. ഹര്ജി തള്ളിയാല് നാഗ്പൂര് ജയിലില് 30നു രാവിലെ ഏഴിനു മേമനെ തൂക്കിലേറ്റുമെന്നാണു വാര്ത്ത.
മേമനെ തൂക്കിലേറ്റുന്നതോടെ 1993-ലെ മുംബൈ സ്ഫോടനവുമായി ബന്ധപ്പെട്ടു നടപ്പാക്കുന്ന ആദ്യത്തെ വധശിക്ഷയായിരിക്കും നടപ്പിലാവുന്നത്. ഇപ്പോള് മേമന്റെ അപേക്ഷ സുപ്രീം കോടതി സ്വീകരിക്കാന് സാധ്യതയില്ലെന്നാണ് ഉന്നത സര്ക്കാര് വൃത്തങ്ങള് നല്കുന്ന സൂചന. കഴിഞ്ഞ ഏപ്രിലില് വധശിക്ഷ ചോദ്യം ചെയ്തു മേമന് നല്കിയ ഹര്ജി സുപ്രീം കോടതി തള്ളിയിരുന്നു. ഇതേത്തുടര്ന്നു മഹാരാഷ്ട്ര സര്ക്കാര് ശിക്ഷ നടപ്പാക്കാനുള്ള നടപടികള് ആരംഭിച്ചെങ്കിലും മേമന്റെ ഹര്ജിയില് കോടതി രണ്ടു തവണ വധശിക്ഷ നടപ്പാക്കുന്നതിനു താത്കാലിക സ്റ്റേ നല്കിയിരുന്നു.
ശിക്ഷ നടപ്പാക്കുന്നതിനു മഹാരാഷ്ട്ര മുഖ്യമന്ത്രി ദേവേന്ദ്ര ഫട്നാവിസ് അനുമതി നല്കിയെന്നാണു ദേശീയ മാധ്യമങ്ങള് റിപ്പോര്ട്ടു ചെയ്യുന്നത്. ശിക്ഷയെക്കുറിച്ചു കുടുംബാംഗങ്ങളെ അറിയിക്കാനും നിര്ദ്ദേശം നല്കിയിട്ടുണ്ട്. കഴിഞ്ഞ വര്ഷം മേമന്റെ ദയാഹര്ജി രാഷ്ട്രപതി പ്രണാബ് മുഖര്ജിയും തള്ളിയിരുന്നു.
53 വയസുകാരനായ യാക്കൂബ് അബ്ദുള് റസാഖ് മേമനെ 2007-ലാണു മുംബൈ ടാഡ കോടതി വധശിക്ഷയ്ക്കു വിധിക്കുന്നത്. 1993-ലെ മുംബൈ സ്ഫോടന പരമ്പരയില് 257 പേര് മരിക്കുകയും 700 ഓളം പേര്ക്കു പരിക്കേല്ക്കുകയും ചെയ്തു. നഗരത്തിലെ 13 സ്ഥലങ്ങളിലാണു സ്ഫോടനം നടത്തിയത്.
