ശബരിമല: ശബരിമല തീര്‍ഥാടകര്‍ക്ക് ആവശ്യമായ സൗകര്യമൊരുക്കുന്നതില്‍ ജില്ലാ ഭരണകൂടം മാതൃകാപരമായ പദ്ധതികള്‍ നടപ്പാക്കിയെന്ന് ദേവസ്വം ബോര്‍ഡ് പ്രസിഡന്‍റ് പ്രയാര്‍ ഗോപാലകൃഷ്ണന്‍. കടകളിലും, ഹോട്ടലുകളിലും അമിതവില ഈടാക്കുന്നത് അറിയിക്കാനായി ഏര്‍പ്പെടുത്തിയ ടോള്‍ഫ്രീ മ്പര്‍ പമ്പയില്‍ ഉദ്ഘാടനം ചെയ്യുകയായിരുന്നു അദ്ദേഹം.
പമ്പയിലെയും സന്നിധാനത്തെയും പ്ലാസ്റ്റിക് മാലിന്യങ്ങള്‍ നീക്കംചെയ്യാനായി ജില്ലാ ഭരണകൂടം നടപ്പിലാക്കിയ മിഷന്‍ഗ്രീന്‍ ശബരിമല പദ്ധതി വിജയകരമായി മുന്നോട്ടുപോവുകയാണ്. വിദ്യാര്‍ഥികള്‍ ഉള്‍പ്പടെയുള്ളവര്‍ പദ്ധതിക്കായി സന്നദ്ധ സേവനത്തിനിറങ്ങിയതും അഭിനന്ദനാര്‍ഹമാണെന്നും അദ്ദേഹം പറഞ്ഞു.
ശബരിമല തീര്‍ഥാടകര്‍ക്ക് സൗകര്യമൊരുക്കുന്നതുമായി ബന്ധപ്പെട്ട് 20 പുതിയ പദ്ധതികള്‍ ആവിഷ്കരിച്ചതായി ചടങ്ങില്‍ അധ്യക്ഷത വഹിച്ച ജില്ലാ കളക്ടര്‍ എസ്.ഹരികിഷോര്‍ പറഞ്ഞു. അടിയന്തര വൈദ്യസഹായ കേന്ദ്രങ്ങളുടെ എണ്ണം 14 ല്‍നിന്ന് 24 ആയി വര്‍ധിപ്പിക്കാന്‍ കഴിഞ്ഞിട്ടുണ്ടെന്നും ഡിസംബര്‍ ഒന്നിനു ശേഷം എരുമേലി വഴിയുള്ള പരമ്പരാഗത കാനനപാതയിലും അടിയന്തര വൈദ്യസഹായ കേന്ദ്രം ആരംഭിക്കുമെന്നും കളക്ടര്‍ അറിയിച്ചു.
അയ്യപ്പഭക്തരുടെ സുരക്ഷയ്ക്കും ശുചിത്വത്തിനുമാണ് ദേവസ്വം ബോര്‍ഡ് മുന്‍ഗണന നല്‍കുന്നതെന്ന് ചടങ്ങില്‍ മുഖ്യപ്രഭാഷണം നടത്തിയ ദേവസ്വം ബോര്‍ഡംഗം അജയ്തറയില്‍ പറഞ്ഞു. പൂര്‍ണമായും ശുചീകരിച്ച കുടിവെള്ളം തീര്‍ഥാടകര്‍ക്ക് വിതരണം ചെയ്യാന്‍ ദേവസ്വം ബോര്‍ഡ് നടപടിയെടുക്കും. സന്നിധാനത്ത് കുപ്പിവെള്ളത്തിന്‍റെ ഉപയോഗം പൂര്‍ണമായും നിയന്ത്രിക്കാന്‍ ശ്രമിക്കും. മകരവിളക്കിനുശേഷം സന്നദ്ധ സംഘടനകളുടെ സഹായത്തോടെ ശബരിമല പൂങ്കാവനം ശുചിയാക്കാന്‍ നടപടിയായിട്ടുണ്ടെന്ന് അജയ്തറയില്‍ പറഞ്ഞു. പമ്പാ ഡ്യൂട്ടി മജിസ്ട്രേറ്റ് സി.ജയന്‍, അസിസ്റ്റന്‍റ് കളക്ടര്‍ വി.ആര്‍ പ്രേംകുമാര്‍, സന്നദ്ധ സംഘടനാ പ്രതിനിധികള്‍ എന്നിവര്‍ സംസാരിച്ചു.
Discussion about this post