തിരുവനന്തപുരം: ഭൂജല ഉപഭോഗം ക്രമീകരിക്കുകയും നിയന്ത്രിക്കുകയും ചെയ്യുന്നതിന്റെ ഭാഗമായി സംസ്ഥാനത്ത് കുഴല്‍ക്കിണര്‍ നിര്‍മ്മിക്കുന്ന എല്ലാ തരത്തിലുള്ള റിഗ്ഗുകള്‍ക്കും സര്‍ക്കാര്‍ രജിസ്‌ട്രേഷന്‍ നിര്‍ബന്ധമാക്കിയതായി ഭൂജലവകുപ്പ് ഡയറക്ടര്‍ അറിയിച്ചു.
കുഴല്‍ക്കിണര്‍ നിര്‍മ്മിക്കുന്ന ജോലി ഏറ്റെടുക്കുന്ന സ്ഥാപനങ്ങള്‍/ഏജന്‍സികള്‍ ഭൂജല വകുപ്പില്‍ അന്‍പതിനായിരം രൂപ ഫീസ് അടച്ച് രജിസ്റ്റര്‍ ചെയ്യണം. ഒരു സ്ഥാപനത്തിന്/ഏജന്‍സിക്ക് റിഗ്ഗ് ഒന്നിന് പതിനായിരം രൂപ നിരക്കില്‍ ഫീസ് നല്‍കി പരമാവധി മൂന്ന് റിഗ്ഗുകള്‍ വരെ രജിസ്റ്റര്‍ ചെയ്യാം. കുഴല്‍ക്കിണര്‍ നിര്‍മ്മാണ രംഗത്ത് മൂന്ന് വര്‍ഷത്തെ പ്രവൃത്തി പരിചയമുള്ള സ്ഥാപനങ്ങള്‍ക്കോ/ഏജന്‍സികള്‍ക്കോ മാത്രമേ രജിസ്‌ട്രേഷന്‍ നല്‍കുകയുള്ളൂ. 2016 ജനുവരി ഒന്നു മുതല്‍ രജിസ്‌ട്രേഷനുള്ള അപേക്ഷാഫോറം നല്‍കിത്തുടങ്ങും. ജനുവരി 31 ന് മുമ്പ് രജിസ്‌ട്രേഷനുള്ള അപേക്ഷ ഭൂജല വകുപ്പില്‍ നല്‍കണം. 2016 ജനുവരി 31 ന് ശേഷം രജിസ്റ്റര്‍ ചെയ്യാതെ കുഴല്‍ക്കിണര്‍ നിര്‍മ്മിക്കുന്ന ജോലിയില്‍ ഏര്‍പ്പെടുന്ന എല്ലാത്തരം റിഗ്ഗുകള്‍ക്കും ഇരുപത്തി അയ്യായിരം രൂപ വീതം പിഴ ഈടാക്കും. 2016 ജനുവരി 31 ന് ശേഷം രജിസ്‌ട്രേഷന്‍ ഇല്ലാത്ത റിഗ്ഗുകള്‍ ഉപയോഗിച്ച് സംസ്ഥാനത്ത് കുഴല്‍ക്കിണര്‍ നിര്‍മ്മിക്കുന്നത് പൂര്‍ണ്ണമായി നിരോധിച്ചിട്ടുണ്ട്. റിഗ്ഗ് രജിസ്‌ട്രേഷനുമായി ബന്ധപ്പെട്ട വിശദമായ വിവരം ഭൂജല വകുപ്പ് ജില്ലാ ഓഫീസുകളില്‍ നിന്നും ലഭിക്കുമെന്ന് ഡയറക്ടര്‍ അറിയിച്ചു.
Discussion about this post