തിരുവനന്തപുരം: ടോഗോയില് തടവിലായ നാലു മലയാളികളുടെ മോചനത്തിന് അടിയന്തര നടപടി സ്വീകരിക്കണമെന്ന് ആവശ്യപ്പെട്ട് മുഖ്യമന്ത്രി ഉമ്മന് ചാണ്ടി കേന്ദ്ര വിദേശകാര്യ മന്ത്രി സുഷമ സ്വരാജിന് കത്തയച്ചു. ഷാജി കെ.എ., തരുണ് ബാബു, നിതിന് ബാബു, ഗോഡ്വിന് ഒ.എ. എന്നിവരാണ് 2013 ജൂലൈ മുതല് നാലുവര്ഷത്തെ തടവിന് വിധിക്കപ്പെട്ട് ആഫ്രിക്കന് രാജ്യമായ ടോഗോയിലെ സെന്ട്രല് ജയിലില് കഴിയുന്നത്.
അരുണ് ചന്ദ്രന് എന്നൊരു ഏജന്റ് മുഖാന്തരം ഘാനയിലേക്കാണ് ഇവരെ ജോലിക്ക് റിക്രൂട്ട് ചെയ്തത്. എന്നാല് ടോഗോയില് എത്തിയ ഇവരെ ശരിയായ ജോബ് വിസയും വര്ക്ക് പെര്മിറ്റും ഇല്ലെന്ന കാരണത്താല് തടവിലാക്കുകയായിരുന്നുവെന്ന് മുഖ്യമന്ത്രി ചൂണ്ടിക്കാട്ടി. ഇവര്ക്ക് ആവശ്യമായ നിയമസഹായം നല്കാന് അഡ്വ. നിസാര് കൊച്ചേരിയെ ടോഗോയിലേക്ക് അയച്ചതായും മുഖ്യമന്ത്രിയുടെ ഓഫീസ് അറിയിച്ചു. ഇതിന്റെ ചെലവ് നോര്ക്ക വഹിക്കും.
Discussion about this post