തിരുവനന്തപുരം: കൊല നടത്തുന്നതിനുള്ള പരിശീലനം നല്‍കുന്ന സംഘടനയാണ് എസ്ഡിപിഐ എന്ന് മുഖ്യമന്ത്രി പിണറായി വിജയന്‍. ആളുകളെ എങ്ങനെ എളുപ്പത്തില്‍ കൊല്ലമെന്നാണ് പരിശീലനം. എസ്ഡിപിഐയുടെ പ്രവര്‍ത്തനങ്ങളെ ഗൗരവമായി പരിശോധിക്കുമെന്നും അദ്ദേഹം പറഞ്ഞു. നിയമസഭയിലാണ് മുഖ്യമന്ത്രി എസ്ഡിപിഐക്കെതിരെ ആഞ്ഞടിച്ചത്. പോലീസിന്റെ ഭാഗത്ത് വീഴ്ച വന്നെങ്കില്‍ കര്‍ശന നടപടിയെടുക്കുമെന്നും മുഖ്യമന്ത്രി കൂട്ടിച്ചേര്‍ത്തു.
കോഴിക്കോട് കുറ്റിയാടി വേളത്ത് യൂത്ത് ലീഗ് പ്രവര്‍ത്തകന്‍ നസറുദ്ദീന്‍ കുത്തേറ്റു മരിച്ച സംഭവത്തിലാണ് മുഖ്യമന്ത്രിയുടെ പ്രതികരണം. ലീഗ് പ്രവര്‍ത്തകന്റെ മരണം രാഷ്ട്രീയ വിരോധം മൂലമാണ്. കേസുമായി ബന്ധപ്പെട്ട് രണ്ടു പേര്‍ അറസ്റ്റിലായി. സ്ഥലത്ത് സ്ഥിതിഗതികള്‍ നിയന്ത്രണവിധേയമായെന്നും മുഖ്യമന്ത്രി പറഞ്ഞു.
അതേസമയം, എസ്ഡിപിഐക്കെതിരെ മുസ്‌ലിം ലീഗ് നേതാക്കളില്‍ ചിലരും രംഗത്തെത്തി.എസ്ഡിപിഐ ഭീകരസംഘടനയാണ്. എസ്ഡിപിഐയുടെ പ്രവര്‍ത്തനം രാജ്യത്തിന് അപകടമാണ്. ഐഎസിന് ആളെ കൂട്ടുന്നവരാണ് എസ്ഡിപിഐയെന്നും പാറയ്ക്കല്‍ അബ്ദുള്ള എംഎല്‍എ പറഞ്ഞു.
നിയമസഭ നിര്‍ത്തിവച്ച് വിഷയം ചര്‍ച്ച ചെയ്യണമെന്ന് ആവശ്യപ്പെട്ടു പ്രതിപക്ഷം അടിയന്തരപ്രമേശയത്തിന് നോട്ടീസ് നല്‍കി. എസ്ഡിപിഐയോട് മുഖ്യമന്ത്രിക്ക് മൃദുസമീപനമെന്ന് പ്രതിപക്ഷ നേതാവ് രമേശ് ചെന്നിത്തല കുറ്റപ്പെടുത്തി.
Discussion about this post