തിരുവനന്തപുരം: പൊതുവിദ്യാഭ്യാസത്തിന്റെ അക്കാദമിക് തലം അന്താരാഷ്ട്ര നിലവാരത്തിലേക്ക് ഉയര്ത്തുകയാണ് സര്ക്കാരിന്റെ പ്രധാന ലക്ഷ്യമെന്ന് വിദ്യാഭ്യാസമന്ത്രി പ്രൊഫ.സി.രവീന്ദ്രനാഥ് പറഞ്ഞു. പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി അധ്യാപകവിദ്യാഭ്യാസം ഏകദിന ശാക്തീകരണ ശില്പശാല പൂജപ്പുര എസ്.സി.ഇ.ആര്.ടിയില് ഉദ്ഘാടനം ചെയ്യുകയായിരുന്നു അദ്ദേഹം.
നിലവിലുള്ള ഘടനയില് കാലാനുസൃതമായ മാറ്റം വരുത്തി പൊതുവിദ്യാഭ്യാസത്തെ ശക്തിപ്പെടുത്തേണ്ടതുണ്ട്. പൊതുവിദ്യാഭ്യാസ മേഖലയുടെ ഭൗതിക സാഹചര്യങ്ങള് മാറേണ്ടതുണ്ട്. ഇതിനായി മാസ്റ്റര്പ്ളാന് അടക്കം തയ്യാറായി വരികയാണ്. കലാ,കായിക രംഗങ്ങളില് മാന്വല് പരിഷ്കരണം നടത്തുന്നതിനായി ചര്ച്ചകള് നടത്തും. അധ്യാപക കേന്ദ്രീകൃത വിദ്യാഭ്യാസത്തില്നിന്ന് ശിശുകേന്ദ്രീകൃത വിദ്യാഭ്യാസത്തിലേക്ക് എങ്ങനെ മാറാമെന്ന് ചര്ച്ച ചെയ്യണമെന്ന് മന്ത്രി പറഞ്ഞു.
പരമ്പരാഗത അധ്യാപക പരിശീലനമൂശ വിട്ട്, ഭാവനാപരമായി പരിശീലന പരിപാടികളെ കാണണമെന്ന് ചടങ്ങില് മുഖ്യാതിഥിയായിരുന്ന ധനമന്ത്രി ഡോ. ടി.എം.തോമസ് ഐസക് പറഞ്ഞു. വിഷയം പഠിപ്പിക്കല് മാത്രമല്ല എല്ലാത്തിനെയും തുറന്ന മനസ്സോടെ കാണാന് അധ്യാപകരെ പ്രേരിപ്പിക്കുകകൂടിയാണ് പരിശീലനത്തിന്റെ ലക്ഷ്യം. പുതിയ സങ്കേതങ്ങള് ഉപയോഗിക്കാനുള്ള ആഭിമുഖ്യവും താത്പര്യവും അധ്യാപകര്ക്ക് ഉണ്ടാകണം. വിദ്യാഭ്യാസം ഐടി അധിഷ്ഠിതമായപ്പോള് ആവേശകരമായ ഒരുപാട് മാറ്റങ്ങള് അധ്യാപകരിലും വിദ്യാര്ഥികളിലും ഉണ്ടായതായും മന്ത്രി പറഞ്ഞു.
എ.പ്രദീപ് കുമാര് എ.എല്.എ അധ്യക്ഷനായി. പൊതുവിദ്യാഭ്യാസ വകുപ്പ് സെക്രട്ടറി ഡോ.ഉഷ ടൈറ്റസ്, എം.ജി സര്വകലാശാല മുന് വൈസ് ചാന്സലര് ഡോ.രാജന് ഗുരുക്കള്, എസ്.സി.ഇ.ആര്.ടി ഡയറക്ടര് ഡോ.ജെ.പ്രസാദ്, കേരള സര്വകലാശാല മുന് വൈസ് ചാന്സലര് ഡോ.ജയകൃഷ്ണന്, സര്വശിക്ഷാ അഭിയാന് ഡയറക്ടര് ഡോ.എ.പി.കുട്ടികൃഷ്ണന്, ഐടി അറ്റ് സ്കൂള് ഡയറക്ടര് അന്വര് സാദത്ത് തുടങ്ങിയവര് സംസാരിച്ചു. വിദ്യാഭ്യാസ വിദഗ്ധരും ക്ഷണിക്കപ്പെട്ട സംഘടനാ പ്രതിനിധികളും വിവിധ വകുപ്പ് മേധാവികളും ശില്പശാലയില് പങ്കെടുത്തു.
ഗണിതശാസ്ത്രത്തില് മിടുക്കരായ വിദ്യാര്ഥികള്ക്ക് നിരന്തര പരിശീലനവും പ്രോത്സാഹനവും നല്കുന്ന എസ്.സി.ഇ.ആര്.ടിയുടെ ന്യൂമാറ്റ്സ് പദ്ധതിയുടെ സഹായത്തോടെ ദേശീയ ഗണിതശാസ്ത്ര ഒളിമ്പ്യാഡിന് അര്ഹത നേടിയ അലന് ജോസഫ്, നിരഞ്ജന, ഗോപിക എന്നീ വിദ്യാര്ഥികള്ക്ക് ചടങ്ങില് മന്ത്രി ഡോ.തോമസ് ഐസക് ഉപഹാരങ്ങള് നല്കി.
Discussion about this post