തിരുവനന്തപുരം: മില്മ പാലിന് വില വര്ദ്ധിപ്പിച്ചു. ഒരു ലിറ്റര് പാലിന് നാലു രൂപ വീതമാണ് വില വര്ദ്ധിപ്പിച്ചിട്ടുളളത്. വര്ദ്ധിപ്പിക്കുന്ന തുകയില് നിന്ന് 3രൂപ35 പൈസ കര്ഷകര്ക്കു നല്കാനാണ് തീരുമാനം. കര്ഷകസംഘങ്ങള്ക്ക് നിലവില് ലഭിക്കുന്ന തുക കൂടാതെ 16 പൈസകൂടി വര്ദ്ധിച്ച് 32 പൈസ ലഭിക്കും.
വരള്ച്ച കാരണമാണ് വില വര്ദ്ധിപ്പിക്കുന്നതെന്നാണ് മില്മയുടെയും സര്ക്കാരിന്റെയും അവകാശവാദം. അതേസമയം ഒറ്റയടിക്ക് നാലു രൂപ വില വര്ദ്ധിപ്പിക്കുന്നത് സംസ്ഥാനത്തെ സാധാരണക്കാര്ക്ക് ഇരുട്ടടിയാവുകയാണ്.
പ്രതിദിനം എഴുപതിനായിരത്തിലധികം ലിറ്റര് പാലിന്റെ കുറവുണ്ടെന്നാണ് മില്മ പറയുന്നത്. രണ്ടര ലക്ഷം ലിറ്റര് പാല് സംസ്ഥാനത്തിനു പുറത്തു നിന്നു വാങ്ങിയിരുന്നിടത്ത് ഇപ്പോള് മൂന്നു ലക്ഷം ലിറ്ററാണ് വാങ്ങുന്നതെന്നും മില്മ അവകാശപ്പെടുന്നു. അതേസമയം ആഭ്യന്തര ഉത്പ്പാദനം വര്ദ്ധിപ്പിക്കുന്നതിനോ, കര്ഷകര്ക്ക് ക്ഷേമപദ്ധതികള് നടപ്പാക്കുന്നതിനോ മില്മയുടെയോ സര്ക്കാരിന്റെയോ ഭാഗത്തു നിന്ന് ഇതേവരെ നീക്കങ്ങളൊന്നും ഉണ്ടായിട്ടില്ല. ആഭ്യന്തര ഉല്പ്പാദനം വര്ദ്ധിപ്പിച്ച് പ്രതിസന്ധിക്കു പോംവഴി കാണേണ്ടയിടത്ത് അധികബാദ്ധ്യത പൂര്ണ്ണമായും സാധാരണക്കാരന്റെ തലയില് അടിച്ചേല്പ്പിക്കുന്ന നടപടിയാണ് സര്ക്കാര് സ്വീകരിക്കുന്നതെന്ന് ഇതിനോടകം ആക്ഷേപം ഉയര്ന്നു കഴിഞ്ഞു.
പുതിയ വിലവര്ദ്ധന ഈ മാസം 11 മുതല് പ്രാബല്യത്തില് വരുമെന്നാണറിയുന്നത്. മില്മയുടെ ശുപാര്ശയ്ക്ക് മന്ത്രിതല ചര്ച്ചയില് അംഗീകാരമായി. അന്തിമ തീരുമാനം ഉടന് തന്നെ മില്മയുടെ ഡയറക്ടര് ബോര്ഡ് യോഗത്തില് ഉണ്ടാകുമെന്നാണ് സൂചന.
Discussion about this post