തിരുവനന്തപുരം: എല്ലാ ജയിലുകളിലും തടവുകാര്ക്ക് വിദ്യാഭ്യാസം നല്കുന്നതിന് പ്രാധാന്യം നല്കണമെന്ന് ഗവര്ണര് ജസ്റ്റിസ് പി. സദാശിവം പറഞ്ഞു. പ്രിസണ്സ് ആന്റ് കറക്ഷണല് സര്വീസസ് വകുപ്പ് കറക്ഷണല് അഡ്മിനിസ്ട്രേഷന്റെ ഭാവി കേരളത്തില് എന്ന വിഷയത്തില് സംഘടിപ്പിച്ച ദ്വിദിന സെമിനാറിന്റെ സമാപന സമ്മേളനം ഉദ്ഘാടനം ചെയ്യുകയായിരുന്നു ഗവര്ണര്.
അക്കാദമികവും ആരോഗ്യപരവും സാംസ്കാരികവും സാമൂഹികവുമായ വിദ്യാഭ്യാസമാണ് നല്കേണ്ടത്. ഗ്രന്ഥശാലകള് ജയിലുകളുടെ അവിഭാജ്യഘടകമാകണം. യോഗ്യതയും പരിശീലനവും ലഭിച്ച ജീവനക്കാരുടെ നിയമനം ജയില് പരിഷ്കരണത്തിന് അത്യന്താപേക്ഷിതമാണെന്നും ഗവര്ണര് പറഞ്ഞു.
മറ്റു സംസ്ഥാനങ്ങള്ക്ക് കേരളം നല്കിയ പല മാതൃകകളില് ഒന്നാണ് 2010ലെ സമഗ്രമായ ജയില് നിയമമെന്ന് അധ്യക്ഷത വഹിച്ച വ്യവസായ മന്ത്രി എ.സി. മൊയ്തീന് പറഞ്ഞു. ജയിലുകള് പീഡനകേന്ദ്രങ്ങളാണെന്ന സങ്കല്പം മാറി, തിരുത്തല് കേന്ദ്രങ്ങളായി പരിണമിച്ചിട്ടുണ്ടെന്നും മന്ത്രി പറഞ്ഞു. മുന് ഡി.ജി.പി അലക്സാണ്ടര് ജേക്കബ്, പ്രിസണ്സ് ആന്റ് കറക്ഷണല് സര്വീസസ് ഡയറക്ടര് ജനറല് ആര്. ശ്രീലേഖ, ഐ.ജി. ഗോപകുമാര്, ഡി.ഐ.ജി പ്രദീപ് തുടങ്ങിയവര് സംസാരിച്ചു.
Discussion about this post