കോഴിക്കോട്: രാജ്യത്ത് ലഹരി ഉപഭോഗത്തില് കേരളം രണ്ടാം സ്ഥാനത്തെന്ന് എക്സൈസ് കമ്മീഷണര് ഋഷിരാജ് സിംഗ്. വ്യാജവാറ്റുള്പ്പെടെയുള്ള 22,000 കേസുകളാണ് കഴിഞ്ഞ എട്ടുമാസത്തിനകം സംസ്ഥാനത്ത് രജിസ്റ്റര് ചെയ്തെന്നും ലഹരിഉപയോഗത്തിനെതിരെ 3700 കേസുകളും 280ടണ് പാന് മസാലയും സംസ്ഥാനത്ത് നിന്ന് ഈ കാലയളവില് പിടികൂടിയിട്ടുണ്ടെന്നും അദ്ദേഹം പറഞ്ഞു. സംസ്ഥാന ലഹരി വര്ജ്ജനമിഷന്റെ ആഭിമുഖ്യത്തില് നടപ്പാക്കുന്ന വിമുക്തി മിഷന്റെ ജില്ലാ തല ഉദ്ഘാടനത്തോടനുബന്ധിച്ച് വിഷയാവതരണം നടത്തി സംസാരിക്കുകയായിരുന്നു അദ്ദേഹം.
യുവാക്കള്ക്കിടയില് എയിഡ്സ് പോലുള്ള രോഗങ്ങള് വ്യാപിക്കുന്നത് ലഹരി ഉപയോഗത്തിലൂടെയാണ്. സംസ്ഥാനത്ത് ഓരോ വര്ഷവും രണ്ടരലക്ഷം ആളുകളാണ് വായില് ക്യാന്സര് വന്ന് ചികിത്സ തേടുന്നത്. പോലീസിനും എക്സൈസിനും ലഹരി ഉപയോഗം കുറയ്ക്കാനേ കഴിയൂവെന്നും അതു പൂര്ണമായും നിര്ത്തണമെങ്കില് കുട്ടികളും രക്ഷിതാക്കളും അധ്യാപകരും വിചാരിക്കണമെന്നും അദ്ദേഹം പറഞ്ഞു. 8 മുതല് 18 വരെ പ്രായത്തിലുള്ള 70 ശതമാനം കുട്ടികളും ഒരിക്കലെങ്കിലും ലഹരി ഉപയോഗിച്ചിട്ടുണ്ടെന്ന അവസ്ഥയാണ് ഇന്ന് സംസ്ഥാനത്ത് നിലനില്ക്കുന്നതെന്നും അദ്ദേഹം കൂട്ടിച്ചേര്ത്തു.
കുടുംബങ്ങള് തകര്ക്കുന്ന ലഹരി ഉപഭോഗം സമൂഹത്തെ വഴിതെറ്റിക്കുകയാണെന്ന് പരിപാടി ഉദ്ഘാടനം ചെയ്ത മേയര് തോട്ടത്തില് രവീന്ദ്രന് പറഞ്ഞു. മദ്യം നിരോധിച്ചതുകൊണ്ട് കാര്യമില്ല. അത്തരം സാഹചര്യങ്ങളില് അനധികൃത മദ്യശാലകള് രൂപപ്പെടും. അതുകൊണ്ട് ബോധവത്ക്കരണത്തിലൂടെ മാത്രമേ ഇന്നത്തെ സമൂഹത്തെ ശരിയായ ദിശയിലേക്ക് കൊണ്ടുവരാന് സാധിക്കൂവെന്നും അദ്ദേഹം പറഞ്ഞു. സ്റ്റേഡിയത്തില് നിന്നാരംഭിച്ച ഘോഷയാത്രയില് വിവിധ പഞ്ചായത്തുകളില് നിന്നും കുടുംബശ്രീകളില് നിന്നുമായി ആയിരങ്ങള് പങ്കെടുത്തു.
Discussion about this post