തിരുവനന്തപുരം : സംസ്ഥാനത്ത് കൂടുതല് സഹകരണ ബാങ്കുകളിലേക്ക് അന്വേഷണം വ്യാപിപ്പിക്കാന് ലക്ഷ്യമിട്ട് സിബിഐ. ഇതിന്റെ ഭാഗമായി വടക്കന് കേരളത്തിലെ 50ലേറെ ബാങ്കുകളുടെ പട്ടിക പ്രത്യേക അന്വേഷണ സംഘം തയ്യാറാക്കി.
നോട്ട് നിരോധന കാലയളവില് കോടിക്കണക്കിന് രൂപയുടെ കള്ളപ്പണം വെളുപ്പിച്ച കുറ്റത്തിന് കൊല്ലം ജില്ലയില് ആറ് സഹകരണ ബാങ്കുകള്ക്കെതിരെ നടപടിയെടുത്തതിന് തൊട്ട് പിന്നാലെയാണ് സിബിഐയുടെ പുതിയ നീക്കം. വടക്കന് ജില്ലയിലെ 50ലേറെ സഹകരണ ബാങ്കുകളില് വ്യാപക ക്രമക്കേട് നടന്നതായാണ് സിബിഐ കണ്ടെത്തിയിരിക്കുന്നത്.
കണ്ണൂര്, കാസര്ഗോട്, കോഴിക്കോട്, മലപ്പുറം ജില്ലകളിലായി പ്രവര്ത്തിക്കുന്ന ഇവയിലൂടെ കോടികളാണ് വെളുപ്പിച്ചെടുത്തതെന്ന് തെളിയിക്കുന്ന രേഖകള് സിബിഐയുടെ പക്കലുണ്ട്. പല നിക്ഷേപകരും അറിയാതെ അവരുടെ അക്കൗണ്ടുകള് വഴിയായിരുന്നു തിരിമറി. ഇവ കൂടാതെ സംസ്ഥാനത്തൊട്ടാകെ 170 ബാങ്കുകള് കൂടി സിബിഐ നിരീക്ഷണത്തിലാണ്.
സിപിഎം നിയന്ത്രണത്തിലുള്ള ബാങ്കുകളാണ് പ്രധാനമായും പ്രതിപ്പട്ടികയിലുള്ളതെന്നാണ് റിപ്പോര്ട്ട്. കോഴിക്കോട് സിഎംപി നേതൃത്വത്തിലുള്ള ഒരു ബാങ്കിലും ക്രമക്കേട് കണ്ടെത്തിയിട്ടുണ്ട്. കൃത്യമായ തെളിവുകള് ലഭിച്ച പശ്ചാത്തലത്തില് വരും ദിവസങ്ങളില് തുടര്നടപടികള് കൈക്കൊള്ളാനാണ് സിബിഐ നീക്കം. ബാങ്ക് ഉദ്യോഗസ്ഥരെയും അധികൃതരെയും ചോദ്യം ചെയ്യുന്നതിനൊപ്പം അറസ്റ്റുള്പ്പെടെയുള്ള നടപടികളിലേക്കും സിബിഐ നീങ്ങിയേക്കും.
അതേസമയം നോട്ട് നിരോധന കാലയളവില് എന്ഫോഴ്സ്മെന്റ് അധികൃതരെ തടഞ്ഞ മാതൃകയില് പ്രതിഷേധം ഉണ്ടായേക്കുമെന്ന കണക്ക് കൂട്ടലില് മുന്കരുതല് നടപടികളും സിബിഐ സ്വീകരിച്ചിട്ടുണ്ട്.
Discussion about this post