പത്തനംതിട്ട: കേരളത്തിലെ ജലസ്രോതസുകളെയാകെ വീണ്ടെടുക്കുവാനുള്ള പരിശ്രമങ്ങള്ക്ക് പ്രചോദനമാണ് വരട്ടാറിന്റെ പുനരുജ്ജീവന പ്രവര്ത്തനങ്ങളെന്ന് മുഖ്യമന്ത്രി പിണറായി വിജയന്. ആദിപമ്പവരട്ടാര് പുനഃരുജ്ജീവന പദ്ധതിയുടെ രണ്ടാംഘട്ട പ്രവര്ത്തനം ഉദ്ഘാടനം ചെയ്തുമായി ബന്ധപ്പെട്ട ഫേയ്സ്ബുക്ക് പോസ്റ്റിലാണ് അദ്ദേഹം ഇക്കാര്യം എഴുതിയത്.
വരട്ടാറില് മാത്രമായി പരിമിതപ്പെടുത്താവുന്ന ഒരു പ്രവര്ത്തനമല്ല ഇതെന്നാണ് സര്ക്കാരിന്റെ കാഴ്ചപ്പാട്. കേരളത്തിലെ നാല്പത്തിനാല് നദികളും അതിന്റെ പ്രൗഢിയോടെ ഒഴുകുന്നു എന്നുറപ്പുവരുത്താന് പോരുന്ന തരത്തില് കേരളമാകെ ഇത്തരം കൂട്ടായ്മകള് ഉണ്ടാകണം. രാഷട്രീയവും സാമുദായികവും സാമ്പത്തികവുമായ അതിര്വരമ്പുകള്ക്കപ്പുറത്തുളള ജനപങ്കാളിത്തമാണ് ആദിപമ്പയെയും വരട്ടാറിനെയും വീണ്ടെടുക്കാന് സഹായിച്ചത്. വരട്ടാറിനെ അതിന്റെ പഴയകാല പ്രതാപത്തോടെ തന്നെ വീണ്ടെടുക്കാന് നാട് ഒറ്റക്കെട്ടായി രംഗത്തിറങ്ങി. സര്ക്കാര് ധനസഹായത്തേക്കാള് വിലപ്പെട്ടത് ജനങ്ങളുടെ പങ്കാളിത്തവും മേല്നോട്ടവുമാണ് എന്നാണിതു തെളിയിക്കുന്നത്. പ്രകൃതിയെ സംരക്ഷിച്ചുകൊണ്ടു മാത്രമേ അതിന്റെ ഭാഗമായ മനുഷ്യനും നിലനില്ക്കാനാകൂ എന്ന കാഴ്ചപ്പാട് ജനങ്ങളില് രൂപപ്പെടുത്തുന്നതിനുളള ഇടപെടലുകളാണ് സര്ക്കാര് നടത്തുന്നത്. ഈ ബോധം സൃഷ്ടിക്കുന്നതില് ഏറെ മുന്നോട്ടുപോകാന് ഹരിതകേരളം മിഷന് ചുരുങ്ങിയ കാലയളവില് കഴിഞ്ഞിട്ടുണ്ട്. അതിന്റെ തെളിവായാണ് ആദിപമ്പവരട്ടാര് വീണ്ടെടുക്കല് പോലുളള നദീസംരക്ഷണപ്രവര്ത്തനങ്ങളെ സര്ക്കാര് വിലയിരുത്തുന്നതെന്നും മുഖ്യമന്ത്രി ഫേയ്സ്ബുക്ക് കുറിപ്പില് എഴുതി.
നദി വീണ്ടെടുത്ത ശേഷം ആദ്യമായി നടന്ന വരട്ടാര് ജലോത്സവത്തിന്റെ വീഡിയോയും, അഞ്ചാം ക്ലാസ് വിദ്യാര്ഥിയായ ആദിത്യ വരച്ച വരട്ടാറിന്റെ ചിത്രം തനിക്കു നല്കിയതിന്റെ ഫോട്ടോയും ഫേയ്സ്ബുക്കില് മുഖ്യമന്ത്രി പങ്കുവച്ചിട്ടുണ്ട്.
Discussion about this post