പത്തനംതിട്ട: നാളീകേരത്തില് നിന്ന് മൂല്യവര്ധിത ഉത്പന്നങ്ങള് നിര്മിക്കുന്നതിനുള്ള വലിയ സാധ്യത വന്വ്യവസായികള് കൈയടക്കും മുന്പ് കേരളത്തിലെ കൃഷിക്കാര് ഈ രംഗത്തേക്ക് കടന്നുവരണമെന്ന് മന്ത്രി വി.എസ്. സുനില് കുമാര് പറഞ്ഞു. കേരഗ്രാമം പദ്ധതിയുടെ ഉദ്ഘാടനം നിര്വഹിച്ച് സംസാരിക്കുകയായിരുന്നു അദ്ദേഹം.
നാളീകേരത്തില് നിന്നും മൂല്യവര്ധിത ഉത്പന്നങ്ങള് നിര്മിക്കുന്നതിനാവശ്യമായ സാങ്കേതികവിദ്യ കര്ഷകര്ക്ക് സര്ക്കാര് നല്കും. സാങ്കേതികവിദ്യ ചെലവേറിയതായതിനാല് കര്ഷകര്ക്ക് നേരിട്ട് വാങ്ങുന്നതിന് സാധിക്കില്ല.ഇതിനാവശ്യമായ ബജറ്റ് പ്രൊവിഷന് വ്യവസ്ഥ ചെയ്തിട്ടുണ്ട്. കാര്ഷിക മേഖലയുടെ വളര്ച്ചയ്ക്കായി വിവിധ പദ്ധതികളും വകുപ്പുകളും തമ്മില് ഏകോപിപ്പിച്ച് പ്രവര്ത്തിക്കും. പച്ചക്കറി വിലയുടെ കാര്യത്തില് ഇടപെടാന് കൃഷി വകുപ്പ് തീരുമാനിച്ചിട്ടുണ്ട്. സാധാരണയില്നിന്നു വ്യത്യസ്തമായി പച്ചക്കറി വില വര്ധിക്കുന്ന സാഹചര്യത്തിലാണ് തീരുമാനം. ഇതിന്റെ ഭാഗമായി ജനതകിറ്റ് പുറത്തിറക്കാന് ഹോര്ട്ടികോര്പ്പിന് നിര്ദേശം നല്കി. ഒരു വീട്ടിലേക്കാവശ്യമായ പച്ചക്കറി 50 രൂപയുടേയും 100 രൂപയുടേയും കിറ്റുകളാക്കി ലഭ്യമാക്കും. രണ്ടു ദിവസത്തനകം ഇത് ആരംഭിക്കുമെന്നും മന്ത്രി പറഞ്ഞു.
തെങ്ങു കൃഷിക്കായി 10 വര്ഷത്തെ പദ്ധതിയാണ് സര്ക്കാര് നടപ്പാക്കുന്നതിനായി ആലോചിക്കുന്നത്. തെങ്ങു നട്ടാല് നാളീകേരം ലഭിച്ചു തുടങ്ങുന്നതിന് 10 വര്ഷത്തോളം എടുക്കും. ഇതിന്റെ ഭാഗമായി ഉത്പാദനക്ഷമതയില്ലാത്ത തെങ്ങ് വെട്ടിമാറ്റി പകരം ഉത്പാദന ക്ഷമതയുള്ള തെങ്ങ് നടും. പൊക്കം കുറഞ്ഞതും ഗുണമേന്മയുള്ളതുമായ തെങ്ങായിരിക്കും നടുക. ഇതിനാവശ്യമായ നടപടികള് നടന്നു വരുകയാണ്. ഏറ്റവും നല്ല തെങ്ങിന് തൈകള് ഉത്പാദിപ്പിച്ചു തുടങ്ങിയിട്ടുണ്ട്. ഇത് വ്യാപകമായി ഉത്പാദിപ്പിക്കുന്നതിന് മൂന്നു വര്ഷമെങ്കിലും വേണ്ടി വരും. പത്തുവര്ഷം കൊണ്ട് ഒരു കോടിയോളം തെങ്ങിന് തൈകള് വച്ചു പിടിപ്പിക്കുകയാണ് ലക്ഷ്യമെന്നും അദ്ദേഹം പറഞ്ഞു.
Discussion about this post