തിരുവനന്തപുരം: മഞ്ചേരി മെഡിക്കല് കോളേജ് ആശുപത്രിയില് ആളുമാറി ശസ്ത്രക്രിയ നടത്തിയ സംഭവത്തില് ഡോക്ടറെ സസ്പെന്ഡ് ചെയ്യാന് ആരോഗ്യമന്ത്രി കെ.കെ. ശൈലജ ഉത്തരവിട്ടു. മൂക്കിലെ ദശമാറ്റാന് ശസ്ത്രക്രിയയ്ക്ക് എത്തിയ ഏഴുവയസ്സുകാരന് ഹെര്ണിയക്കുള്ള ശസ്ത്രക്രിയ നടത്തുകയായിരുന്നു.
കരുവാരക്കുണ്ട് കേരള എസ്റ്റേറ്റ് തയ്യില് മജീദിന്റെ മകന് മുഹമ്മദ് ഡാനിഷിനെ(7) മൂക്കിലെ ദശമാറ്റാന് ശസ്ത്രക്രിയക്കും മണ്ണാര്ക്കാട് അമ്പാഴക്കോട് ഉണ്ണിക്കൃഷ്ണന്റെ മകന് ധനുഷിനെ (6) ഹെര്ണിയ ശസ്ത്രക്രിയക്കും പ്രവേശിപ്പിച്ചിരുന്നു. ചൊവ്വാഴ്ച രാവിലെ എട്ടിന് ഇരുവരെയും തിയേറ്ററില് പ്രവേശിപ്പിച്ചു. ഇ.എന്.ടി. ഡോക്ടര്മാര് ഡാനിഷിനെ ശസ്ത്രക്രിയ നടത്താന് തിരക്കിയപ്പോഴാണ് ആളുമാറിയ വിവരം അറിഞ്ഞത്.
പത്തരയോടെ തിയേറ്ററിനു പുറത്തേക്ക് കുട്ടിയെ എത്തിച്ചപ്പോഴാണ് വയറ്റില് ശസ്ത്രക്രിയ നടത്തിയത് രക്ഷിതാക്കളുടെ ശ്രദ്ധയില്പ്പെട്ടത്. കുട്ടിയുടെ വയറ്റില് എന്തിനാണ് ശസ്ത്രക്രിയ നടത്തിയതെന്നു ഡോക്ടറോട് തിരക്കിയപ്പോള് ഹെര്ണിയ ശ്രദ്ധയില്പ്പെട്ടതിനാലായിരുന്നു എന്നായിരുന്നു മറുപടി. തുടര്ന്ന് വീണ്ടും തിയേറ്ററിലേക്ക് കയറ്റുകയും കുട്ടിയുടെ മൂക്കിന് ശസ്ത്രക്രിയ നടത്തുകയുംചെയ്തു. കുട്ടിയുടെ നില തൃപ്തികരമാണ്.
Discussion about this post