* ഡിസംബറിനുള്ളില്‍ 50,000 പട്ടയം വിതരണം ചെയ്യും
* പാട്ടകുടിശ്ശിക അടയ്ക്കാത്തവര്‍ക്കെതിരെ കര്‍ശന നടപടി
തിരുവനന്തപുരം: സംസ്ഥാനത്തെ പട്ടയവിതരണം ഊര്‍ജിതമാക്കുമെന്നും ഒരു വര്‍ഷത്തിനുള്ളില്‍ ഒരു ലക്ഷം പട്ടയം കൂടി വിതരണം ചെയ്യുമെന്നും റവന്യുമന്ത്രി ഇ. ചന്ദ്രശേഖരന്‍. തിരുവന്തപുരത്ത് ഐ. എല്‍. ഡി. എമ്മില്‍ ജില്ലാകളക്ടര്‍മാരുടേയും റവന്യു ഉദ്യോഗസ്ഥരുടെയും അവലോകനയോഗത്തില്‍ പങ്കെടുത്ത ശേഷം മാധ്യമങ്ങളോടു സംസാരിക്കുകയായിരുന്നു അദ്ദേഹം.
ഈ വര്‍ഷം ഡിസംബറിനുള്ളില്‍ 50,000 പേര്‍ക്ക് പട്ടയം നല്‍കും. അടുത്ത മേയ് മാസത്തിനുള്ളില്‍ ബാക്കിയുള്ളവ വിതരണം ചെയ്യും. സംയുക്ത പരിശോധന കഴിഞ്ഞ് അനുവദിച്ചു കിട്ടിയ 28588 ഹെക്ടറില്‍ 17113 ഹെക്ടര്‍ ഭൂമി വിതരണം ചെയ്തു. 11473 ഹെക്ടറിന്റെ പട്ടയമാണ് ഇനി വിതരണം ചെയ്യേണ്ടത്. ഇടുക്കി, എറണാകുളം, തൃശ്ശൂര്‍, പത്തനംതിട്ട, പാലക്കാട് ജില്ലകളിലാണ് പ്രധാനമായും പട്ടയം വിതരണം ചെയ്യുന്നത്. ലാന്‍ഡ് ട്രൈബ്യൂണലുകളില്‍ നിലവിലുള്ള കേസുകളില്‍ ഉടന്‍ പരിഹാരം കാണും. കേസുകള്‍ തീര്‍പ്പാക്കുന്നതിന് വടക്കന്‍ ജില്ലകളില്‍ ആറ് സ്പെഷ്യല്‍ ട്രൈബ്യൂണലുകള്‍ അനുവദിച്ചിട്ടുണ്ട്.
സംസ്ഥാനത്തെ മുപ്പതിനായിരത്തില്‍പരം ഹെക്ടര്‍ ഭൂമി വിവിധ ആവശ്യങ്ങള്‍ക്കായി സ്ഥാപനങ്ങള്‍ക്കും പാട്ടവ്യവസ്ഥയില്‍ നല്‍കിയിട്ടുണ്ട്. ഇതില്‍ കാലാവധി കഴിഞ്ഞിട്ടും പുതുക്കാത്തവരില്‍ നിന്നും കുടിശ്ശിക അടയ്ക്കാത്തവരില്‍ നിന്നും ഭൂമി തിരിച്ചു പിടിക്കും. 1155 കോടി രൂപ കുടിശ്ശിക ലഭിക്കാനുണ്ട്. 697 പേരാണ് പാട്ടക്കുടിശ്ശിക വരുത്തിയിട്ടുള്ളത്. പുതുക്കാന്‍ താല്പര്യമുള്ളവര്‍ക്ക് അതിനവസരം നല്‍കും. പുറമ്പോക്ക് ഭൂമിയിലെ കൈയേറ്റം ഒഴിപ്പിക്കല്‍ നടപടികളുമായി മുന്നോട്ടു പോകും. ഡിജിറ്റലൈസേഷന്‍ നടപടികള്‍ വേഗത്തില്‍ പൂര്‍ത്തീകരിക്കും. റവന്യൂ വിജിലന്‍സിന്റേയും ഇന്റേണല്‍ ഇന്‍സ്‌പെക്ഷന്‍ വിങ്ങിന്റേയും പ്രവര്‍ത്തനം ശക്തിപ്പെടുത്തുമെന്നും മന്ത്രി പറഞ്ഞു.
റവന്യുവകുപ്പില്‍ അടുത്ത ഒരു വര്‍ഷം മുന്‍ഗണന നല്കി നടപ്പിലാക്കേണ്ട പ്രവര്‍ത്തനങ്ങള്‍ കളക്ടര്‍മാരുമായി മന്ത്രി ചര്‍ച്ച ചെയ്തു. പ്രിന്‍സിപ്പല്‍ സെക്രട്ടറി ഡോ. വി. വേണു, ലാന്‍ഡ് റവന്യൂ കമ്മീഷണര്‍ സി. എ. ലത, ഐ. എല്‍. ഡി. എം. ഡയറക്ടര്‍ പി. ജി. തോമസ്, കളക്ടര്‍മാര്‍, സബ്കളക്ടര്‍മാര്‍, ആര്‍. ഡി. ഒമാര്‍, റവന്യു ഉദ്യോഗസ്ഥര്‍ തുടങ്ങിയവര്‍ സംബന്ധിച്ചു.
Discussion about this post