വെള്ളറട: യുവതിയെ കൊന്ന് കുഴിച്ചിട്ട കേസില്‍ പ്രതിയായ സൈനികനെ കസ്റ്റഡിയില്‍ വാങ്ങുന്നതിന് പോലീസ് സംഘം ഡല്‍ഹിയിലേക്ക് പുറപ്പെട്ടു. പ്രതിയായ സൈനികന്‍ അഖില്‍ ഡല്‍ഹിയില്‍ സൈനിക കസ്റ്റഡിയിലാണ്. കൊലപാതകവിവരം തിരുവനന്തപുരത്തിലെ ഉന്നതപോലീസ് നേതൃത്വം ഡല്‍ഹിയിലെ സൈനിക ഓഫിസില്‍ അറിയിച്ചതിനെ തുടര്‍ന്നാണ് സൈനിക കസ്റ്റഡിയില്‍ സൂക്ഷിച്ചിട്ടുള്ളത്. അമ്പൂരി തട്ടാമുക്കില്‍ പുതുതായി പണിയുന്ന വീടിനു പിന്നിലെ പുരയിടത്തില്‍ ബുധനാഴ്ചയാണ് യുവതിയുടെ മൃതദേഹം ജീര്‍ണിച്ച നിലയില്‍ കണ്ടെത്തിയത്. പൂവാര്‍ പുത്തന്‍കടയില്‍ രാജന്റെ മകള്‍ രാഖി മോളുടെ (25) മൃതദേഹമാണ് കണ്ടത്തിയത്. തട്ടാമുക്ക് സ്വദേശിയും സൈനികനുമായ അഖില്‍ എസ്. നായരുടെ വീടിനു പിന്നിലെ പുരയിടത്തില്‍ നിന്നാണു മൃതദേഹം ആര്‍ഡിഒയുടെ സാന്നിധ്യത്തില്‍ ഇന്നലെ പുറത്തെടുത്തത്. മൃതദേഹത്തിന് 20 ദിവസം പഴക്കമുണ്ടെന്നു പോലീസ് പറഞ്ഞു. ജൂണ്‍ 21 മുതല്‍ യുവതിയെ കാണാനില്ലെന്നുകാട്ടി ബന്ധുക്കള്‍ പൂവാര്‍ പോലീസില്‍ പരാതി നല്‍കിയിരുന്നു. അന്വേഷണത്തില്‍ യുവതി അന്പൂരി സ്വദേശി അഖിലുമായി പ്രണയത്തിലാണെന്നും മനസിലായി. അതിനിടെ യുവതിയെ യുവാക്കള്‍ നെയ്യാറ്റിന്‍കര വഴി കാറില്‍ കൊണ്ടുവന്നതായി തെളിയുകയും അഖിലിന്റെ സുഹൃത്തിനെ ചോദ്യം ചെയ്യുകയും സുഹൃത്ത് നല്‍കിയ സൂചന അനുസരിച്ച് മൃതദേഹം കണ്ടെത്തുകയുമായിരുന്നു. അഖിലിന്റെ വിവാഹം നിശ്ചയിച്ചതറിഞ്ഞതിനെ തുടര്‍ന്നുണ്ടായ തര്‍ക്കമാണ് കൊലപാതകത്തില്‍ കലാശിച്ചത് എന്നാണ് പോലീസിന്റെ നിഗമനം. കൊലപാതകത്തിന് കൂട്ടു നിന്ന ആദര്‍ശും പോലീസ് കസ്റ്റഡിയിലാണ്.
യുവതിയെ കൊന്ന് കുഴിച്ചു മൂടിയ സംഭവം: പ്രതിയായ സൈനികനെ കൊണ്ടുവരാന്‍ പോലീസ് ഡല്‍ഹിയിലേക്ക്
പുതിയ വാർത്തകൾ
Discussion about this post