തിരുവനന്തപുരം: സര്‍വകലാശാലകളില്‍ നിന്ന് കോളേജുകള്‍ക്ക് നല്‍കുന്ന ഉത്തരകടലാസ്സുകളുടെ വിതരണവും ഉപയോഗവും സംബന്ധിച്ച കണക്കുകള്‍ കൃത്യമായി സൂക്ഷിക്കുന്നതിനുളള സോഫ്റ്റ്വെയര്‍ അടിയന്തിരമായി വികസിപ്പിക്കണമെന്ന് ഉന്നത വിദ്യാഭ്യാസ വകുപ്പ് മന്ത്രി ഡോ.കെ.ടി.ജലീല്‍ സര്‍വകലാശാലകള്‍ക്ക് നിര്‍ദേശം നല്‍കി. ഉന്നതവിദ്യാഭ്യാസ വകുപ്പിന് അനുബന്ധമായി പ്രവര്‍ത്തിക്കുന്ന സര്‍വകലാശാലകളിലെ പി.വി.സി, പരീക്ഷാ ചുമതലയുളള സിന്‍ഡിക്കേറ്റ് മെമ്പര്‍, പരീക്ഷാ കണ്‍ട്രോളര്‍ എന്നിവരുമായി വീഡിയോ കോണ്‍ഫറന്‍സ് സംവിധാനം മുഖേന ആശയവിനിമയം നടത്തുകയായിരുന്നു മന്ത്രി. കുറ്റമറ്റ പരീക്ഷാസംവിധാനം വികസിപ്പിക്കുന്നതിലും പരീക്ഷാഫലം യഥാസമയം പ്രസിദ്ധീകരിക്കുന്നതിലും കണ്ണൂര്‍, സാങ്കേതിക സര്‍വകലാശാലകള്‍ നടത്തിയ മുന്നേറ്റങ്ങളെ മന്ത്രി പ്രശംസിച്ചു.
എല്ലാ സര്‍വകലാശാലകളിലും മുന്‍ വര്‍ഷങ്ങളെ അപേക്ഷിച്ച് ക്ലാസുകള്‍ വളരെ നേരത്തെ ആരംഭിച്ചു. അടുത്ത അധ്യായന വര്‍ഷം ജൂണ്‍ ഒന്നിന് തന്നെ ഒന്നാം സെമസ്റ്റര്‍ യു.ജി., പി.ജി. ക്ലാസുകള്‍ ആരംഭിക്കും. സര്‍വകലാശാലകള്‍ ഇതിനനുസൃതമായി അക്കാഡമിക് കലണ്ടര്‍ തയ്യാറാക്കണം. വിശദമായ ചര്‍ച്ചകള്‍ക്കൊടുവില്‍ സര്‍വകലാശാലകളുടെ പ്രവര്‍ത്തനം കൂടുതല്‍ കാര്യക്ഷമമാക്കാനുളള നിരവധി തീരുമാനങ്ങള്‍ കൈക്കൊണ്ടു.
പരീക്ഷാ വിജ്ഞാപനം ചെയ്യുമ്പോള്‍ തന്നെ ഓരോ വിഷയവും പഠിപ്പിക്കുന്ന മുഴുവന്‍ അധ്യാപകരുടെയും ലിസ്റ്റ് സര്‍വകലാശാലകള്‍ തയ്യാറാക്കണം. സഹകരിക്കാത്ത കോളേജുകള്‍ക്കെതിരെ കര്‍ശന നടപടിയെടുക്കും. പരീക്ഷാ ചുമതലകളില്‍ കൃത്യവിലോപം നടത്തുന്ന അധ്യാപകരുടെ വിവരങ്ങള്‍ സര്‍വകലാശാലകള്‍ യഥാസമയം സര്‍ക്കാരിനെ അറിയിക്കണം. ഇവരുടെ ശമ്പളം തടയുന്നതുള്‍പ്പെടെയുളള ശിക്ഷാനടപടികള്‍ കൈക്കൊള്ളും.
എക്സാമിനേഷന്‍ മാന്വല്‍ കാലോചിതമായി പരിഷ്‌കരിക്കണം. വരും വര്‍ഷങ്ങളില്‍ മുന്‍കൂര്‍ നിശ്ചയിക്കുന്ന തീയതികളില്‍ തന്നെ റീവാല്യുവേഷന്‍ ഉള്‍പ്പെടെയുളള എല്ലാ പരീക്ഷാ പ്രവര്‍ത്തനങ്ങളും പൂര്‍ത്തീകരിക്കും. ഈ വര്‍ഷം പഠനം പൂര്‍ത്തിയാക്കുന്ന എല്ലാ വിദ്യാര്‍ഥികളുടെയും സര്‍ട്ടിഫിക്കറ്റുകള്‍ സെപ്തംബര്‍ 30നും മുമ്പ് നാഷണല്‍ അക്കാഡമിക് ഡെപ്പോസിറ്ററിയില്‍ അപ്ലോഡ് ചെയ്യും. സര്‍ട്ടിഫിക്കറ്റുകള്‍ ആധികാരികമായും സുരക്ഷിതമായും കൈകാര്യം ചെയ്യുന്നതിന് ഇതുവഴി സാധിക്കും.
യു.ജി. പരീക്ഷകളെ പോലെ പി.ജി.പരീക്ഷാ നടപടികളും ഈ വര്‍ഷം മുതല്‍ നിശ്ചിത സമയപരിധിക്കുളളില്‍ പൂര്‍ത്തിയാക്കണമെന്ന് സര്‍വകലാശാലകള്‍ക്ക് മന്ത്രി നിര്‍ദേശം നല്‍കി. ചോദ്യ പേപ്പറുകള്‍ തയ്യാറാക്കുന്നതിലും, കൈകാര്യം ചെയ്യുന്നതിലും, വിതരണം ചെയ്യുന്നതിലും, കൂടുതല്‍ പ്രൊഫഷണലായ സമീപനം സര്‍വകലാശാലകള്‍ സ്വീകരിക്കും. പരീക്ഷയും മൂല്യനിര്‍ണ്ണയവും ഓണ്‍ലൈനായി നടത്തുന്നതിനുളള സാധ്യതകള്‍ അടിയന്തിരമായി പിരശോധിക്കുകയും വിദ്യാര്‍ഥികള്‍ക്ക് നല്‍കേണ്ടുന്ന എല്ലാ സേവനങ്ങളും ആഗസ്റ്റ് 30നു മമ്പ് ഇ-ഗവേണന്‍സ് സംവിധാനത്തില്‍ ലഭ്യമാക്കുകയും ചെയ്യണമെന്ന് യോഗം തീരുമാനിച്ചു.
ഉന്നത വിദ്യാഭ്യാസ വകുപ്പ് പ്രിന്‍സിപ്പല്‍ സെക്രട്ടറി ചുമതല വഹിക്കുന്ന എ.ഷാജഹാന്‍, ഉന്നത വിദ്യാഭ്യാസ വകുപ്പിലെ ഉയര്‍ന്ന ഉദ്യോഗസ്ഥര്‍ എന്നിവരും വീഡിയോ കോണ്‍ഫറന്‍സില്‍ പങ്കെടുത്തു.
Discussion about this post