വയനാട്: സിസ്റ്റര് ലൂസി കളപ്പുരയ്ക്കെതിരെ അപവാദപ്രചാരണം നടത്തിയ മാനന്തവാടി രൂപതാ പിആര്ഒ ഫാദര് നോബിളിനെ ഒന്നാം പ്രതിയാക്കി വെള്ളമുണ്ട പൊലീസ് കേസെടുത്തു. സിസ്റ്റര് ലൂസി നല്കിയ പരാതിയിലാണ് കേസ്. സ്ത്രീത്വത്തെ അപമാനിക്കുന്ന രീതിയില് അപവാദപ്രചാരണം നടത്തി, അപകീര്ത്തികരമായ വ്യാജപ്രചാരണം നടത്തി എന്നീ കുറ്റങ്ങളാണ് ഫാദര്. നോബിള് പാറയ്ക്കലിനെതിരായി ചുമത്തിയിരിക്കുന്നത്.
കേസിലാകെ ആറ് പ്രതികളാണുള്ളത്. മദര് സുപ്പീരിയറും പ്രതിപ്പട്ടികയിലുള്പ്പെട്ടിട്ടുണ്ട്. കേസുമായി ബന്ധപ്പെട്ട് സിസ്റ്റര് ലൂസിയുടെ മൊഴി ഉടന് സ്വീകരിക്കുമെന്ന് വെള്ളമുണ്ട പൊലീസ് വ്യക്തമാക്കി.
വാര്ത്തയുമായി ബന്ധപ്പെട്ട് സിസ്റ്റര് ലൂസി കളപ്പുരയെ കാണാന് എത്തിയ രണ്ടു പ്രദേശിക മാധ്യമ പ്രവര്ത്തകര് കാരയ്ക്കാമല മഠത്തിലേക്ക് വരുന്ന സിസിടിവി ദൃശ്യങ്ങളാണ് മാനന്തവാടി രൂപത പിആര്ഒയും വൈദികനുമായ ഫാദര് നോബിള് തോമസ് പാറക്കല് സമൂഹമാധ്യമങ്ങളില് പ്രചരിപ്പിച്ചത്.
