തിരുവനന്തപുരം: സമഗ്ര ട്രോമ കെയര് സംവിധാനത്തിന്റെ ഭാഗമായ കനിവ് 108 സൗജന്യ ആംബുലന്സ് സര്വീസിന്റെ പ്രവര്ത്തനങ്ങള് ഏകോപിപ്പിക്കുന്നതിനായി സജ്ജമാക്കിയിരുക്കുന്നത് വിപുലമായ കോള് സെന്റര്. എഴുപതിലധികം എമര്ജന്സി റെസ്പോണ്സ് ഉദ്യോഗസ്ഥരടങ്ങുന്ന കോള്സെന്ററിന്റെ പ്രവര്ത്തനോദ്ഘാടനം ടെക്നോപാര്ക്കില് ആരോഗ്യമന്ത്രി കെ.കെ. ശൈലജ നിര്വഹിച്ചു.
കേരളത്തിന്റെ ആരോഗ്യമേഖലയില് അഭിമാനകരമായ പദ്ധതിക്കാണ് തുടക്കം കുറിച്ചിരിക്കുന്നതെന്നും കേരള മോഡല് ട്രോമ കെയര് സംവിധാനം രൂപപ്പെടുത്തിയെടുക്കുമെന്നും മന്ത്രി പറഞ്ഞു. മൂവായിരത്തിലധികം അപകട മരണങ്ങളാണ് പ്രതിവര്ഷം സംസ്ഥാനത്ത് നടക്കുന്നത്. പെട്ടെന്ന് ചികിത്സ ലഭ്യമാക്കിയാല് മരണസംഖ്യയും അപകടം മൂലം അംഗവൈകല്യങ്ങളുണ്ടാകുന്ന അവസ്ഥകളും കുറയ്ക്കാനാകും. ഇത് ലക്ഷ്യമിട്ടാണ് സമഗ്ര ട്രോമ കെയര് പദ്ധതിക്ക് സര്ക്കാര് തുടക്കം കുറിച്ചിരിക്കുന്നത്. ഇതിനായി ലെവല് വണ് തലത്തിലുള്ള പരിശീലന കേന്ദ്രങ്ങള് തിരുവനന്തപുരത്തും കോഴിക്കോടും ഉടന് പ്രവര്ത്തനമാരംഭിക്കും. മറ്റു മെഡിക്കല് കോളേജുകളില് ലെവല് 2 തലത്തിലുള്ള പരിശീലന കേന്ദ്രം ആരംഭിക്കും.
കോള് സെന്റര് 24 മണിക്കൂറും പ്രവര്ത്തിക്കും. 108 എന്ന ടോള്ഫ്രീ നമ്പറിനു പുറമെ ആന്ഡ്രോയ്ഡ് ഫോണുകളില് സൗജന്യമായി ഡൗണ്ലോഡ് ചെയ്യാവുന്ന മൊബൈല് ആപ്പും തയ്യാറാക്കിയിട്ടുണ്ട്. അപകടം സംബന്ധിച്ച് കോള്സെന്ററില് ലഭ്യമാകുന്ന വിവരം പ്രത്യേകം തയ്യാറാക്കിയ സോഫ്റ്റ്വെയറില് രേഖപ്പെടുത്തും. മൂന്ന് മിനിട്ടിനുള്ളില് സംഭവ സ്ഥലം മനസ്സിലാക്കി ആംബുലന്സിന്റെ സേവനം ഉറപ്പുവരുത്തും. നഗരപരിധിയില് 15 ഉം ഗ്രാമപ്രദേശങ്ങളില് 20 ഉം ഇടുക്കി, വയനാട് പോലുള്ള മലയോര മേഖലകളില് അരമണിക്കൂറിനുള്ളിലും എത്തുന്ന രീതിയിലാണ് ആംബുലന്സുകളുടെ വിന്യാസവും പ്രവര്ത്തനവും സജ്ജമാക്കിയിരിക്കുന്നത്.
കേന്ദ്രീകൃത കോള്സെന്ററില് അപകടം സംബന്ധിച്ച വിവരമെത്തിയാല് സംഭവസ്ഥലത്തിന് ഏറ്റവും അടുത്തുള്ള ആംബുലന്സിനെ നിയോഗിക്കാന് കോള് സെന്ററിലെ ഉദ്യോഗസ്ഥര്ക്കാകും. ഇതിനു പുറമെ തെറ്റായ ഫോണ്വിളികള് നിയന്ത്രിക്കാനും ഒരേ സ്ഥലത്ത് നിന്ന് ആവര്ത്തിച്ചുണ്ടാകുന്ന ഫോണ്വിളി വിലയിരുത്തി ക്രമപ്പെടുത്തുന്നതിനും പ്രത്യകം സംവിധാനമുണ്ട്.
അടിയന്തര സാഹചര്യമുണ്ടായാല് തരണം ചെയ്യുന്നതിനാവശ്യമായ മാര്ഗ്ഗനിര്ദ്ദേശങ്ങള് ആംബുലന്സിലെ എമര്ജന്സി മെഡിക്കല് ടെക്നീഷ്യന് വഴി അപകടത്തില്പ്പെട്ട വ്യക്തിക്കോ സേവന ദാതാവിനോ നല്കാനാവുന്ന കോള് കോണ്ഫറന്സിംഗ് സംവിധാനവും ഉള്പ്പെടുത്തിയിട്ടുണ്ട്.
Discussion about this post