തിരുവനന്തപുരം: മനുഷ്യരും വന്യജീവികളുമായുള്ള സംഘര്ഷം ഒഴിവാക്കാന് മികച്ച ബോധവത്കരണം ആവശ്യമാണെന്നും അത് സ്കൂളുകളില്നിന്ന് ആരംഭിക്കണമെന്നും ഗവര്ണര് ആരിഫ് മൊഹമ്മദ് ഖാന് പറഞ്ഞു. പ്രകൃതിവിഭവങ്ങളുടെ മൂല്യവും അവ സംരക്ഷിക്കേണ്ടതിന്റെ ആവശ്യകതയെയും കുറിച്ച് ബോധവത്കരിക്കുകയാണ് വനസംരക്ഷണത്തില് ഏറെ പ്രധാനമെന്നും ഗവര്ണര് പറഞ്ഞു. സംസ്ഥാന വനം-വന്യജീവിവകുപ്പിന്റെ ആഭിമുഖ്യത്തില് വന്യജീവിവാരാഘോഷത്തിന്റെ സമാപനസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
പ്രകൃതിസംരക്ഷണം നമ്മുടെ ജീവിതത്തിലെ ഓരോ നിമിഷത്തിലും ഏറെ ഒഴിച്ചുകൂടാനാവാത്തത് ആയിരിക്കുന്നു. വനനശീകരണം ധാരാളം പാരിസ്ഥിതിക പ്രശ്നങ്ങള്ക്ക് കാരണമാകുന്നു. ആനകളുടെ പുനരധിവാസം ഉള്പ്പെടെയുള്ള കാര്യങ്ങളില് സംസ്ഥാനത്തിന്റെ താത്പര്യം പ്രത്യേക പരാമര്ശമര്ഹിക്കുന്നതായും ഗവര്ണര് പറഞ്ഞു.
വനംവകുപ്പ് ആസ്ഥാനത്ത് നടന്ന ചടങ്ങില് വനം, മൃഗസംരക്ഷണം, ക്ഷീരവികസനം, മൃഗശാല വകുപ്പ് മന്ത്രി കെ.രാജു അധ്യക്ഷനായിരുന്നു. വന്യജീവിസംരക്ഷണത്തോടൊപ്പം മനുഷ്യനും സമാധാനപൂര്ണമായ ജീവിതം ഉറപ്പുവരുത്താന് സര്ക്കാരിന് ബാധ്യതയുണ്ടെന്ന് മന്ത്രി പറഞ്ഞു. വനസംരക്ഷണത്തിന് സര്ക്കാര് സംവിധാനങ്ങള് മാത്രം വിചാരിച്ചാല്പ്പോര. ജനങ്ങള്തന്നെ അതിന് മുന്നിട്ടിറങ്ങണം. വനസംരക്ഷണം വന്യജീവികള്ക്കുവേണ്ടി മാത്രമല്ല, നമ്മുടെ നിലനില്പ്പിനുവേണ്ടിയുമാണെന്ന തിരിച്ചറിവ് എല്ലാവര്ക്കും ഉണ്ടാകണം.
പ്രിന്സിപ്പല് ചീഫ് ഫോറസ്റ്റ് കണ്സര്വേറ്ററും ഫോറസ്റ്റ് ഫോഴ്സ് മേധാവിയുമായ പി.കെ.കേശവന് സ്വാഗതവും പ്രിന്സിപ്പല് ചീഫ് ഫോറസ്റ്റ് കണ്സര്വേറ്ററും ചീഫ് വൈല്ഡ് ലൈഫ് വാര്ഡനുമായ സുരേന്ദ്രകുമാര് നന്ദിയും പറഞ്ഞു. പ്രിന്സിപ്പല് ചീഫ് ഫോറസ്റ്റ് കണ്സര്വേറ്റര് (പ്ളാനിങ് ആന്ഡ് ഡെവലപ്മെന്റ്) ദേവേന്ദ്രകുമാര് വര്മ റിപ്പോര്ട്ട് അവതരിപ്പിച്ചു.
വാരാഘോഷത്തോട് അനുബന്ധിച്ച് നടത്തിയ വന്യജിവി ഫോട്ടോഗ്രഫി, പോസ്റ്റര് ഡിസൈനിങ് മത്സരങ്ങളിലെ വിജയികള്ക്കുള്ള സമ്മാനദാനവും വനംവകുപ്പിന്റെ പ്രസിദ്ധീകരണമായ അരണ്യം വിശേഷാല്പ്പതിപ്പിന്റെ പ്രകാശനവും ഗവര്ണര് നിര്വഹിച്ചു.
Discussion about this post