പത്തനംതിട്ട: കേരളത്തിന്റെ ജീവിതക്രമത്തില്‍ നിന്ന് ഒരു ഘട്ടത്തില്‍ മാറിപ്പോയ കൃഷിയെ തിരിച്ചുകൊണ്ടു വരാന്‍ ഇപ്പോള്‍ ജനങ്ങള്‍ ഒറ്റക്കെട്ടായി പ്രവര്‍ത്തിക്കുകയാണെന്ന് കാര്‍ഷിക വികസന ക്ഷേമ വകുപ്പ് മന്ത്രി വി.എസ് സുനില്‍ കുമാര്‍ പറഞ്ഞു. കുന്നന്താനം ഗ്രാമപഞ്ചായത്ത് കമ്മ്യൂണിറ്റി ഹാളില്‍ കുന്നന്താനത്തിനെ സംസ്ഥാനത്തെ ആദ്യത്തെ സമ്പൂര്‍ണ്ണ ഹരിത സമൃദ്ധി വാര്‍ഡായി പ്രഖ്യാപിച്ചു സംസാരിക്കുകയായിരുന്നു അദ്ദേഹം. ഇതോടൊപ്പം കുന്നന്താനത്തിനെ ജില്ലയിലെ ആദ്യ സമ്പൂര്‍ണ്ണ തരിശുരഹിത ഗ്രാമപഞ്ചായത്തായും മന്ത്രി പ്രഖ്യാപിച്ചു.
അടിസ്ഥാനപരമായ വികസനം എന്നത് വരുംതലമുറയെ ലക്ഷ്യം വച്ച് നടത്തുന്ന കൃഷി, ജല, പരിസ്ഥിതി സംരക്ഷണ പ്രവര്‍ത്തനങ്ങളാണ്. ഈ വികസനമാണ് കൃഷിവകുപ്പും ഹരിത കേരള മിഷനും ചേര്‍ന്ന് കുന്നന്താനത്ത് നടപ്പാക്കിയത്. ഏഴ് ലക്ഷം ടണ്‍ പച്ചക്കറി ഉത്പാദിപ്പിച്ച കേരളം ഇന്ന് 12 ടണ്‍ പച്ചക്കറി ഉദ്പാദിപ്പിക്കുന്നു. ഇത് 16 ടണ്‍ എത്തിയാല്‍ കേരളം പച്ചക്കറി കൃഷിയില്‍ സമ്പൂര്‍ണ്ണ സ്വയം പര്യാപ്തത കൈവരിക്കുമെന്നും മന്ത്രി പറഞ്ഞു.
മാത്യു ടി.തോമസ് എം എല്‍ എ അധ്യക്ഷനായ ചടങ്ങില്‍ ജില്ലാ പഞ്ചായത്ത് പ്രസിഡന്റ് അന്നപൂര്‍ണ്ണാദേവി മുഖ്യപ്രഭാഷണം നടത്തി പഞ്ചായത്തിലെ മികച്ച കര്‍ഷകര്‍ക്കുള്ള പുരസ്‌ക്കാരം സമര്‍പ്പിക്കുകയും ചെയ്തു. കുന്നന്താനം കൃഷി ഓഫീസര്‍ പ്രീജാ പ്രേം റിപ്പോര്‍ട്ട് അവതരിപ്പിച്ചു. ം ജില്ലാ പഞ്ചായത്ത് അംഗം എസ്.വി സുബിന്‍ ഡോക്യുമെന്ററി സി.ഡി പ്രകാശനം ചെയ്തു.
ഹരിതകേരളം മിഷന്റെ ചലഞ്ച് 2020 ആക്ഷന്‍ പ്ലാനില്‍ ഉള്‍പ്പെടുത്തിയാണ് കുന്നന്താനത്തിനെ തരിശുരഹിതമാക്കുവാന്‍ തീരുമാനിച്ചത്. കൃഷിയോഗ്യമായ എല്ലാ ഭൂമിയിലും കൃഷി ചെയ്യുക എന്നതാണ് തരിശ് രഹിത പഞ്ചായത്ത് പദ്ധതിയിലൂടെ ലക്ഷ്യമിടുന്നത്. കൃഷി വകുപ്പ്, തദ്ദേശ സ്വയംഭരണ വകുപ്പ്, കുടുംബശ്രീ എന്നിവയുടെ സഹകരണത്തോടെയാണ് തരിശ് രഹിത പ്രവര്‍ത്തനങ്ങള്‍ നടത്തിയത്. കൃഷി ഓഫീസറുടെ നേതൃത്വത്തില്‍ പഞ്ചായത്തില്‍ നടത്തിയ സര്‍വേയിലൂടെ കണ്ടെത്തിയ 40 ഏക്കര്‍ തരിശ് ഭൂമി കൃഷിയോഗ്യമാക്കിയാണ് തരിശ് രഹിത കുന്നന്താനം യാഥാര്‍ഥ്യമായത്.
പഞ്ചായത്തിലെ 15 വാര്‍ഡുകളിലെ എല്ലാ വീടുകളിലും കൃഷി നടത്തിയാണ് സമ്പൂര്‍ണ്ണ ഹരിത സമൃദ്ധി വാര്‍ഡ് എന്ന നേട്ടം കുന്നന്താനം കൈവരിച്ചത്. ഇതിനായി കൃഷി വകുപ്പില്‍ നിന്നും സൗജന്യമായി തൈകളുടെ വിതരണവും നടത്തിയിരുന്നു. ഓരോ കുടുംബശ്രീ കൂട്ടായ്മകളും കുറഞ്ഞത് 20 സെന്റ് ഭൂമിയിലും തൊഴിലുറപ്പ് പദ്ധതി വഴി ഓരോ വാര്‍ഡിലും 50 സെന്റ് ഭൂമിയിലും കൃഷി ഇറക്കി. വിവിധ ഇനം ജൈവ പച്ചക്കറികള്‍ക്ക് പുറമേ കപ്പ, വാഴ, ചേന, ചേമ്പ് എന്നിവയും കൃഷിക്കായി ഉപയോഗിച്ചു.
മല്ലപ്പള്ളി ബ്ലോക്ക് പഞ്ചായത്ത് പ്രസിഡന്റ് ശോശാമ്മ തോമസ്, കുന്നന്താനം ഗ്രാമ പഞ്ചായത്ത് പ്രസിഡന്റ് കെ.കെ രാധാകൃഷ്ണ കുറുപ്പ്, ബ്ലോക്ക് പഞ്ചായത്തംഗം ഷിനി കെ. പിള്ള, പത്തനംതിട്ട ഡി.ഡി.പി:എസ്.സൈമ, പ്രിന്‍സിപ്പല്‍ കൃഷി ഓഫീസര്‍ ഷീല പണിക്കര്‍, ഹരിത കേരളം മിഷന്‍ ജില്ലാ കോര്‍ഡിനേറ്റര്‍ ആര്‍.രാജേഷ്, കുടുംബശ്രീ മിഷന്‍ പ്രൊജക്ട് ഡയറക്ടര്‍ വിധു.കെ, മല്ലപ്പള്ളി കൃഷി അസി.ഡയറക്ടര്‍ സിബി ടി നീണ്ടിശ്ശേരി തുടങ്ങിയവര്‍ സംസാരിച്ചു.
Discussion about this post