കൊച്ചി: മരടിലെ നാല് ഫ്ളാറ്റുകളില് രണ്ടെണ്ണം വിജയകരമായി പൊളിച്ചു. പുലര്ച്ചെ മുതല്തന്നെ ഇരുഫ്ളാറ്റുകള്ക്കും ഇരുന്നൂറ് മീറ്റര് ചുറ്റളവിലുള്ള മുഴുവന് പേരെയും ഒഴിപ്പിച്ചിരുന്നു. മുന് നിശ്ചയിച്ചപ്രകാരം ഹോളിഫെയ്ത്ത് എച്ച്ടുഒ ആണ് ആദ്യം പൊളിച്ചത്.
പതിനൊന്ന് മണിക്ക് ഹോളിഫെയ്ത്ത് എച്ച്ടുഒ ഫ്ളാറ്റും തുടര്ന്ന് അഞ്ച് മിനിറ്റുകള്ക്കുള്ളില് ആല്ഫ സരിന് ഫ്ളാറ്റ് പൊളിക്കാനുമായിരുന്നു നേരത്തെയുള്ള പദ്ധതി. എന്നാല് 10.45-ഓടെ ഇന്ത്യന് നേവിയുടെ ഹെലികോപ്ടര് ആകാശനിരീക്ഷണത്തിനായി മരടിലേക്ക് എത്തിയതിനാല് ഫ്ളാറ്റ് പൊളിക്കല് കുറച്ചു വൈകി.
10.30-ന് ഫ്ളാറ്റ് പൊളിക്കുന്നതിനു മുന്നോടിയായി ആദ്യസൈറണ് മുഴങ്ങി. രണ്ടാം സൈറണ് മുഴങ്ങിയതോടെ തേവര- കുണ്ടന്നൂര് പാലത്തിലൂടെയുള്ള ഗതാഗതം പൊലീസ് തടഞ്ഞു. 11.18ഓടെ മൂന്നാമത്തെ സൈറണ് മുഴങ്ങി. 11.19-ന് എച്ച്.ടു.ഒ ഫ്ളാറ്റില് സ്ഫോടനങ്ങളുണ്ടാവുകയും സെക്കന്ഡുകള് കൊണ്ട് കെട്ടിട്ടം ഒന്നാകെ നിലം പതിക്കുകയും ചെയ്തു.
തുടര്ന്ന്് 11.44-ന് ആല്ഫ സരിനിലെ ഇരട്ട ഫ്ളാറ്റുകളില് ചെറിയ ഫ്ളാറ്റ് സ്ഫോടനത്തില് തകര്ത്തു സെക്കന്ഡുകളുടെ ഇടവേളയില് രണ്ടാമത്തെ ഫ്ളാറ്റും തകര്ത്തു. ആല്ഫ സരിന് തകര്ക്കുമ്പോള് 10 മുതല് 20 ശതമാനം കെട്ടിട്ട അവശിഷ്ടങ്ങള് കായലിലേക്ക് വീണേക്കുമെന്ന് കെട്ടിട്ടം പൊളിക്കാനുള്ള കരാര് എടുത്ത വിജയ് സ്റ്റീല്സ്റ്റിന്റെ വക്താക്കള് നേരത്തെ തന്നെ അറിയിച്ചിരുന്നു. എന്നാല് എച്ച്ടുഒ ഫ്ളാറ്റ് തകര്ത്തപ്പോള് കെട്ടിടാവശിഷ്ടങ്ങള് പുറത്തേക്ക് തെറിച്ചു പോയില്ല.
തീരദേശപരിപാലന നിയമം ലംഘിച്ച് നിര്മ്മിച്ചതിനെ തുടര്ന്നാണ് സുപ്രീംകോടതി മരടിലെ നാല് ഫ്ളാറ്റുകള് പൊളിച്ചു നീക്കാന് ഉത്തരവിട്ടത്.
Discussion about this post