തിരുവനന്തപുരം: ഉത്തരകേരളത്തിലെ കാസര്കോട്, കണ്ണൂര്, കോഴിക്കോട്, മലപ്പുറം എന്നീ നാല് ജില്ലകള് റെഡ് സോണില് തുടരും. മറ്റു പത്ത് ജില്ലകള് ഓറഞ്ച് സോണിലാകും. റെഡ്സോണായി കണക്കാക്കുന്ന നാലു ജില്ലകളിലും നിയന്ത്രണങ്ങള് കര്ക്കശമായി തുടരും.
കണ്ണൂര് ജില്ലയില് നിരീക്ഷണത്തിലുള്ളത് 2592 പേരാണ്. കാസര്കോട്ട് 3126 ഉം, കോഴിക്കോട്ട് 2770 ഉം മലപ്പുറത്ത് 2465 പേരുമാണ് നിരീക്ഷണത്തിലുള്ളത്. കേസുകള് ഒന്നും ഇല്ലാതിരുന്നതിനാല് കോട്ടയം, ഇടുക്കി ജില്ലകളെ ഗ്രീന് സോണില് പെടുത്തി നേരത്തെ ചില ഇളവുകള് നല്കിയിരുന്നു. എന്നാല്, കോട്ടയം, ഇടുക്കി ജില്ലകളില് പുതിയ കേസുകള് വ്യാഴാഴ്ച വന്നതിനാല് ഈ ജില്ലകളെ ഗ്രീന് സോണില്നിന്ന് മാറ്റി ഓറഞ്ചില് ഉള്പ്പെടുത്തി.
ഹോട്ട്സ്പോട്ടുകളായ പഞ്ചായത്തുകള് ആകെ അടച്ചിടും. മുനിസിപ്പല് അതിര്ത്തിയില് ബന്ധപ്പെട്ട വാര്ഡുകളും കോര്പ്പറേഷനുകളില് ബന്ധപ്പെട്ട ഡിവിഷനുകളും മാത്രം അടച്ചിടുകയും ചെയ്യും. ഏതൊക്കെ പ്രദേശങ്ങളാണ് ഹോട്ട്സ്പോട്ട് പരിധിയില് വരിക എന്നത് അതത് ജില്ലാ ഭരണസംവിധാനം തീരുമാനിക്കും.
കണ്ണൂര് പരിയാരം സര്ക്കാര് മെഡിക്കല് കോളേജിലേയും കോട്ടയം മെഡിക്കല് കോളേജിലേയും കോവിഡ് 19 ലാബിന് ഐസിഎംആര് അംഗീകാരം ലഭിച്ചു. കണ്ണൂര് മെഡിക്കല് കോളേജിലെ കോവിഡ് ലാബില് വെള്ളിയാഴ്ച മുതല് കോവിഡ് പരിശോധന ആരംഭിക്കാനാകും. ഈ ലാബില് നാല് റിയല് ടൈം പിസിആര് മെഷീനുകളാണ് സജ്ജമാക്കിയിരിക്കുന്നത്. ആദ്യഘട്ടത്തില് 15 ഉം പിന്നീട് 60 വരെയും പരിശോധന ദിനംപ്രതി നടത്താനാകും. ഇതോടെ കേരളത്തില് 14 സര്ക്കാര് ലാബുകളിലാണ് കോവിഡ് 19 പരിശോധന നടത്തുന്നത്. രണ്ട് സ്വകാര്യ ലാബുകളിലും പരിശോധന നടന്നുവരുന്നു.
സംസ്ഥാനത്ത് കോവിഡ് 19 രോഗികളുടെ എണ്ണം വര്ധിച്ച സാഹചര്യത്തില് പരിശോധന വേഗത്തിലാക്കാന് 10 റിയല് ടൈം പിസിആര് മെഷീനുകള് വാങ്ങാനാണ് സര്ക്കാര് അനുമതി നല്കിയത്.
Discussion about this post