തിരുവനന്തപുരം: വിവിധ സംസ്ഥാനങ്ങളില്‍നിന്നു തിരിച്ചെത്തിയവരുടെ ക്വാറന്റൈന്‍ കര്‍ശനമായി നടപ്പാക്കാന്‍ സര്‍ക്കാര്‍ തീരുമാനം. ക്വാറന്റൈന്‍ ലംഘിച്ചാല്‍ കടുത്ത നടപടി സ്വീകരിക്കുമെന്നാണ് സര്‍ക്കാരിന്റെ മുന്നറിയിപ്പ്. മറ്റു സംസ്ഥാനങ്ങളില്‍നിന്ന് എത്തുന്ന രോഗലക്ഷണമില്ലാത്തവരോടു വീടുകളില്‍ത്തന്നെ കഴിയാനാണ് നിര്‍ദേശിച്ചിരിക്കുന്നത്. എന്നാല്‍, കഴിഞ്ഞ ആഴ്ചകളില്‍ ഇങ്ങനെ എത്തിയവരില്‍ പലരും ക്വാറന്റൈന്‍ ലംഘിച്ചത് തലവേദന സൃഷ്ടിച്ചിരുന്നു. ഇവരില്‍ ചിലര്‍ കോവിഡ് ബാധിതരുമായിരുന്നെന്നു പിന്നീടു കണ്ടെത്തി. ഇതൊക്കെ പരിഗണിച്ചാണ് ക്വാറന്റൈന്‍ കര്‍ക്കശമായി നടപ്പാക്കാന്‍ സര്‍ക്കാര്‍ തീരുമാനിച്ചിരിക്കുന്നത്. നിര്‍ദേശം ലംഘിക്കുന്നവര്‍ക്കെതിരേ കടുത്ത നടപടിയുണ്ടാകുമെന്ന് ഇന്നലെ പത്രസമ്മേളനത്തിലും മുഖ്യമന്ത്രി പിണറായി വിജയന്‍ മുന്നറിയിപ്പ് നല്‍കി. അതേസമയം, ജില്ലകളില്‍നിന്നു ജില്ലകളിലേക്കു വരുന്നവര്‍ക്കു ക്വാറന്റൈന്‍ ഇല്ല.
അതേസമയം തിരിച്ചെത്തുന്ന പ്രവാസികള്‍ക്ക് ‘പ്രവാസികള്‍ക്ക് സിം‘ എന്നപേരില്‍ സൗജന്യ 4 ജി സിം സര്‍വീസ് നല്‍കാമെന്ന് എയര്‍ടെല്‍ അറിയിച്ചിട്ടുണ്ട്. സൗജന്യ ഡാറ്റാ ടോക്ക്‌ടൈം സേവനം ഉണ്ടാകുമെന്ന് ഭാരതി എയര്‍ടെല്‍ ലിമിറ്റഡ് അറിയിച്ചു. പ്രവാസികള്‍ക്ക് അടക്കം ക്വാറന്റൈന്‍ സൗകര്യം ഒരുക്കാന്‍ ഹോട്ടലുകള്‍ ദുരന്തനിവാരണ നിയമം അനുസരിച്ച് ഏറ്റെടുക്കുന്നുണ്ട്. ജോലിക്കു നിയോഗിക്കപ്പെട്ട ഉദ്യോഗസ്ഥര്‍ക്കല്ലാതെ മറ്റാര്‍ക്കും വിമാനത്താവളങ്ങളിലേക്കു പ്രവേശനം ഉണ്ടാകില്ല. ഭക്ഷ്യസുരക്ഷ, കരുതല്‍ ഭക്ഷ്യസുരക്ഷ ഉറപ്പാക്കാന്‍ ഉദ്ദേശിച്ചുള്ള ‘സുഭിക്ഷ കേരളം’ പദ്ധതി വഴി ഒരുവര്‍ഷം കൊണ്ട് 3,860 കോടി രൂപയുടെ പദ്ധതി നടപ്പാക്കും. മൃഗസംരക്ഷണം, ക്ഷീരവികസനം, മത്സ്യകൃഷി എന്നീ മേഖലകളിലാണ് പദ്ധതി.
വിശാഖപട്ടണത്തുണ്ടായ വിഷവാതകച്ചോര്‍ച്ചയുടെ പശ്ചാത്തലത്തില്‍ സംസ്ഥാനത്തെ രാസവസ്തു ശാലകളിലും ലോക്ക്ഡൗണിനു ശേഷം തുറക്കേണ്ട ഇതര വ്യവസായ സ്ഥാപനങ്ങളുടെയും സുരക്ഷാ മുന്‍കരുതലുകള്‍ ഉറപ്പുവരുത്തും. ഇക്കാര്യത്തില്‍ വ്യവസായവകുപ്പ് ആവശ്യമായ ഇടപെടല്‍ നടത്തുന്നുണ്ട്. കോവിഡ് രോഗവുമായി ബന്ധപ്പെട്ട വാക്‌സിന്‍, മരുന്നുകള്‍, ഉപകരണങ്ങള്‍ എന്നിവ കുത്തക കമ്പനികള്‍ വികസിപ്പിച്ചാല്‍ പേറ്റന്റ് ചെയ്ത് സാധാരണക്കാര്‍ക്കു താങ്ങാനാവാത്ത വന്‍ വിലയ്ക്കായിരിക്കും മാര്‍ക്കറ്റ് ചെയ്യുക. ഇതിനു ബദലായി പരസ്പര സഹകരണത്തിന്റെയും പങ്കിടലിന്റെയും അടിസ്ഥാനത്തില്‍ ശക്തിപ്പെടുന്ന ഓപ്പണ്‍ സോഴ്‌സ് കോവിഡ് പ്രസ്ഥാനത്തിന് കേരളം ഐക്യദാര്‍ഢ്യം പ്രഖ്യാപിക്കുന്നതായും മുഖ്യമന്ത്രി അറിയിച്ചു.
Discussion about this post