തിരുവനന്തപുരം: പണിമുടക്കിന്റെ പേരില് സംസ്ഥാനത്ത് ജന ജീവിതം ദുരിതത്തിലായി. തിരുവനന്തപുരം ലുലു മാളിന് മുന്നില് പ്രതിഷേധവുമായി സമരക്കാര് എത്തി. ജീവനക്കാരെ ഗേറ്റിന് മുന്നില് തടയുകയും ചെയ്തു. സമരാനുകൂലികള് ഗേറ്റിന് പുറത്ത് കുത്തിയിരിക്കുകയാണ്.
11 മണിക്ക് മാളില് ജോലിയ്ക്ക് എത്തണമെന്നാണ് തങ്ങള്ക്ക് നിര്ദ്ദേശം ലഭിച്ചതെന്ന് ലുലു ജീവനക്കാര് പറയുന്നു. പണിമുടക്കില് നിന്നും ലുലുമാളിനെ ഒഴിവാക്കിയത് വലിയ പ്രതിഷേധങ്ങള്ക്ക് വഴിയൊരുക്കിയിരുന്നു. ഈ സാഹചര്യത്തിലാണ് ജീവനക്കാരെ സമരക്കാര് തടഞ്ഞത്. വൈകുന്നേരം വരെ ലുലുവിന് മുന്നില് ഉണ്ടാകുമെന്നാണ് സമരാനുകൂലികള് അറിയിച്ചിരിക്കുന്നത്. പ്രതിഷേധം ശക്തമായപ്പോള് പോലീസ് ഇവരെ അറസ്റ്റ് ചെയ്ത് നീക്കി.
തിരുവനന്തപുരം ഉള്ളൂരില് പെട്രോള് പമ്പ് സമരാനുകൂലികള് അടപ്പിച്ചു. പോലീസ് സംരക്ഷണത്തില് തുറന്ന പമ്പാണ് സിഐടിയു അടപ്പിച്ചത്. കോഴിക്കോട് കാരന്തൂര്, കുന്തമംഗലം എന്നിവിടങ്ങളില് തുറന്ന കടകളും സമരക്കാര് അടപ്പിച്ചു. വിതുര ചന്തമുക്കില് ഗതാഗതം തടഞ്ഞു. കോഴിക്കോട് കെഎസ്ആര്ടിസി ബസ് സ്റ്റാന്ഡില് ബസ് തടയാനും ശ്രമം നടന്നിരുന്നു. കൊല്ലത്ത് കെഎസ്ആര്ടിസി ബസ് തടഞ്ഞ് യാത്രക്കാരെ ഇറക്കി വിടുകയും ചെയ്തു.
ജനങ്ങളെ സമരക്കാര് പരസ്യമായി ആക്രമിക്കുന്ന സാഹചര്യമുണ്ടായിട്ടും പോലീസ് നടപടിയെടുക്കാതെ നോക്കുകുത്തിയായി നില്ക്കുന്ന സാഹചര്യമാണ് പലയിടത്തും ഉണ്ടായത്. അതേസമയം ഇന്ന് കൂടുതല് സര്വീസുകള് നടത്തണമെന്ന് കെഎസ്ആര്ടിസി നിര്ദ്ദേശം നല്കിയിട്ടുണ്ട്. ജനങ്ങള്ക്ക് യാത്രാ സൗകര്യം ഒരുക്കണമെന്ന സര്ക്കാരിന്റെ ഉത്തരവ് പ്രകാരമാണ് നിര്ദ്ദേശം. 11 മണിക്കുള്ളില് ഇന്നത്തെ ഷെഡ്യൂളുകളുടെ എണ്ണം അറിയിക്കണമെന്ന് സിഎംഡി ബിജു പ്രഭാകര് അറിയിച്ചു.
