തിരുവനന്തപുരം: സംയുക്ത ട്രേഡ് യൂണിയന്റെ നേതൃത്വത്തിലുള്ള രണ്ടു ദിവസത്തെ ദേശീയ പണിമുടക്കില് പങ്കെടുക്കുന്ന സര്ക്കാര് ജീവനക്കാര്ക്ക് ഡയസ്നോണ് പ്രഖ്യാപിച്ചു. ഹൈക്കോടതി വിധിയുടെ പശ്ചാത്തലത്തിലാണ് സര്ക്കാര് ഡയസ്നോണ് പ്രഖ്യാപിച്ചത്.
പണിമുടക്കില് സര്ക്കാര് ജീവനക്കാര് പങ്കെടുക്കുന്നത് നിയമവിരുദ്ധമാണെന്നും ഇതു വിലക്കിക്കൊണ്ട് ഉത്തരവിറക്കണമെന്നും ഹൈക്കോടതി ആവശ്യപ്പെട്ടിരുന്നു. ഇതിനുപിന്നാലെയാണ് സര്ക്കാര് ജീവനക്കാര്ക്ക് ഡയസ്നോണ് പ്രഖ്യാപിച്ചത്. ഇതോടെ സംസ്ഥാനത്തെ മുഴുവന് സര്ക്കാര് ജീവനക്കാരും ഇന്നു ജോലിക്ക് ഹാജരാകണം. അത്യാവശ്യസാഹചര്യത്തില് അല്ലാതെ ഇന്ന് ആര്ക്കും അവധി അനുവദിക്കില്ലെന്ന് വ്യക്തമാക്കി ചീഫ് സെക്രട്ടറി ഉത്തരവിറക്കി. ഹൈക്കോടതി വിധി പകര്പ്പ് പരിശോധിച്ച അഡ്വക്കറ്റ് ജനറല് നല്കിയ നിയമോപദേശത്തിന്റെ അടിസ്ഥാനത്തിലാണ് അവശ്യ സര്വീസ് നിയമമായ ഡയസ്നോണ് പ്രഖ്യാപിക്കാന് സംസ്ഥാന സര്ക്കാര് തീരുമാനിച്ചത്.
കോടതി ഉത്തരവിന്റെ അടിസ്ഥാനത്തില് തുടര്നടപടി സ്വീകരിക്കണം എന്ന് ആവശ്യപ്പെടുന്ന കുറിപ്പോടെ അഡ്വക്കറ്റ് ജനറല് ചീഫ് സെക്രട്ടറിക്ക് ഹൈക്കോടതി ഉത്തരവിന്റെ പകര്പ്പ് കൈമാറുകയായിരുന്നു. ഇതിനു പിന്നാലെയാണ് ചീഫ് സെക്രട്ടറി ഉത്തരവിറക്കിയത്. ഇന്നു ജോലിക്കെത്തുന്നവര്ക്കു സംരക്ഷണം നല്കണം. ജോലിക്കെത്താത്തവര്ക്കു ശന്പളം ലഭിക്കില്ല. പണിമുടക്കുന്ന താത്കാലിക ജീവനക്കാരെ പിരിച്ചുവിടും. ജീവനക്കാര്ക്ക് കെഎസ്ആര്ടിസിയും കളക്ടര്മാരും വാഹന സൗകര്യം ഒരുക്കണമെന്നും നിര്ദേശിച്ചിട്ടുണ്ട്.
കോടതി ഉത്തരവിന്റെ അടിസ്ഥാനത്തില് ദേശീയ പണിമുടക്കില്നിന്നു പിന്മാറില്ലെന്നു സര്ക്കാര് ജീവനക്കാരുടെ സംഘടനകള്. മുന്കൂട്ടി നോട്ടീസ് നല്കിയാണു പണിമുടക്കില് പങ്കാളികളാകുന്നതെന്ന് എന്ജിഒ യൂണിയന് നേതാക്കള് പറഞ്ഞു. അതേസമയം പണിമുടക്കില് സര്ക്കാര് ജീവനക്കാര് പങ്കെടുക്കരുതെന്ന ഹൈക്കോടതി ഉത്തരവ് അനുസരിക്കണമെന്നു ഗവര്ണര് ആരിഫ് മുഹമ്മദ് ഖാന്. സര്ക്കാരിനു മുന്നില് മറ്റു മാര്ഗങ്ങളില്ല. പണിമുടക്കുകളിലും മറ്റും ജനങ്ങള്ക്കുണ്ടാകുന്ന ബുദ്ധിമുട്ട് മനസിലാക്കേണ്ടതു തെരഞ്ഞെടുക്കപ്പെട്ട സര്ക്കാരാണെന്നും ഗവര്ണര് പറഞ്ഞു.
Discussion about this post