കണ്ണൂര്: സിപിഎം 23-ാം പാര്ട്ടി കോണ്ഗ്രസിനു കണ്ണൂരില് ഇന്നു തുടക്കമാകും. ഇന്നലെ രാത്രി 7.35ന് പൊതുസമ്മേളനവേദിയായ എകെജി നഗറില് സ്വാഗതസംഘം ചെയര്മാന്കൂടിയായ മുഖ്യമന്ത്രി പിണറായി വിജയന് പതാക ഉയര്ത്തി. പാര്ട്ടി ജനറല് സെക്രട്ടറി സീതാറാം യെച്ചൂരി, പോളിറ്റ് ബ്യൂറോ അംഗങ്ങളായ പ്രകാശ് കാരാട്ട്, എസ്. രാമചന്ദ്രന് പിള്ള, എം.എ. ബേബി, മണിക് സര്ക്കാര്, ബിമന് ബസു, ബൃന്ദ കാരാട്ട് തുടങ്ങിയവര് സംബന്ധിച്ചു. സംസ്ഥാന സെക്രട്ടറി കോടിയേരി ബാലകൃഷ്ണന് സ്വാഗതം പറഞ്ഞു.
പൊതുസമ്മേളന നഗറില് ഉയര്ത്താനുള്ള പതാക പുന്നപ്ര-വയലാറിന്റെ മണ്ണില്നിന്നും, കൊടിമരം കയ്യൂരില്നിന്നുമാണ് എത്തിച്ചത്. പതാക-കൊടിമര ജാഥകള് നഗരത്തില് സംഗമിച്ച് പ്രകടനമായി പൊതുസമ്മേളന നഗറിലെത്തിക്കുകയായിരുന്നു.
ഇന്നു രാവിലെ ഒന്പതിനു ബര്ണശേരി നായനാര് അക്കാദമിയിലെ ഇ.കെ. നായനാര് നഗറില് ആരംഭിക്കുന്ന പ്രതിനിധി സമ്മേളനം സിപിഎം ജനറല് സെക്രട്ടറി സീതാറാം യെച്ചൂരി ഉദ്ഘാടനം ചെയ്യും. സിപിഐ ജനറല് സെക്രട്ടറി ഡി. രാജ പ്രസംഗിക്കും. പ്രതിനിധികളും നിരീക്ഷകരും കേന്ദ്ര കമ്മിറ്റി അംഗങ്ങളും ഉള്പ്പെടെ 815 പേരാണു പാര്ട്ടി കോണ്ഗ്രസില് പങ്കെടുക്കുന്നത്.
സമ്മേളനത്തില് പങ്കെടുക്കാനുള്ള പ്രതിനിധികള് ഇന്നലെ ഉച്ചയോടെ എത്തിച്ചേര്ന്നു. സമ്മേളനത്തിന് മുന്നോടിയായി ഇന്നലെ വൈകുന്നേരം കണ്ണൂരില് പോളിറ്റ് ബ്യൂറോയും ചേര്ന്നിരുന്നു.
കേന്ദ്ര കമ്മിറ്റി അംഗം പി.കെ. ശ്രീമതിയുടെ നേതൃത്വത്തില് കയ്യൂരില്നിന്നെത്തിയ കൊടിമര ജാഥയും പുന്നപ്ര- വയലാറില്നിന്ന് സംസ്ഥാന സെക്രട്ടേറിയറ്റംഗം എം. സ്വരാജിന്റെ നേതൃത്വത്തിലുള്ള പതാകജാഥയും ഇന്നലെ വൈകുന്നേരം ഏഴോടെ കണ്ണൂര് കാള്ടെക്സില് സംഗമിച്ചു. തുടര്ന്ന് പുരുഷ- വനിതാ റെഡ് വോളന്റിയര്മാരുടെയും ബൈക്ക് റാലിയുടെയും അകമ്പടിയോടെ പ്രൗഢോജ്വല ഘോഷയാത്രയായി പൊതുസമ്മേളന നഗറിലേക്കു നീങ്ങി.
Discussion about this post