കൊച്ചി: തിരുവിതാംകൂര്‍ ദേവസ്വം ബോര്‍ഡിനു കീഴിലുള്ള ക്ഷേത്രങ്ങളിലെ ഉത്സവങ്ങളിലും മറ്റു ചടങ്ങുകളിലും നിലവിലുള്ളതിലും കൂടുതല്‍ അകമ്പടി ആനകളെ അനുവദിക്കേണ്ടെന്ന സര്‍ക്കാര്‍ ഉത്തരവുകള്‍ ആനകളെ എഴുന്നള്ളിക്കുമ്പോള്‍ കര്‍ശനമായി പാലിക്കണമെന്ന് ഹൈക്കോടതി വ്യക്തമാക്കി.
ദേവസ്വം ബോര്‍ഡിന്റെ ഉടമസ്ഥതയിലുള്ള അമ്പലപ്പുഴ വിജയകൃഷ്ണന്‍ എന്ന ആന ചരിഞ്ഞ സംഭവത്തില്‍ കുറ്റക്കാര്‍ക്കെതിരേ നടപടിയെടുക്കണമെന്നാവശ്യപ്പെട്ട് അമ്പലപ്പുഴ സ്വദേശി പി. പ്രേമകുമാര്‍ നല്‍കിയ ഹര്‍ജിയിലാണു ഡിവിഷന്‍ ബെഞ്ച് ഇക്കാര്യം വ്യക്തമാക്കിയത്.
ആനയെഴുന്നള്ളത്തിനു കേരള നാട്ടാന പരിപാലന ചട്ടത്തില്‍ പറയുന്ന വ്യവസ്ഥകള്‍ പാലിക്കാന്‍ സിംഗിള്‍ ബെഞ്ച് നേരത്തെ ഹര്‍ജി പരിഗണിച്ചപ്പോള്‍ ഉത്തരവിട്ടിരുന്നു. മൂന്നു വര്‍ഷമെങ്കിലും പ്രവൃത്തിപരിചയമുള്ള പാപ്പാനെ നിയോഗിക്കണം, ആനകള്‍ക്കെതിരായ പീഡനങ്ങള്‍ പരിശോധിക്കാന്‍ ജില്ലാ കളക്ടര്‍ അധ്യക്ഷനായ സമിതികള്‍ വേണം എന്നിങ്ങനെയുള്ള വ്യവസ്ഥകളാണു നാട്ടാന പരിപാലന ചട്ടത്തിലുള്ളത്.
കഴിഞ്ഞ ദിവസം വീണ്ടും ഹര്‍ജി പരിഗണിച്ചപ്പോള്‍, എഴുന്നള്ളത്തിന് ആനകളുടെ എണ്ണം നിയന്ത്രിക്കാന്‍ 1998 ഒക്ടോബര്‍ 22നും 2000 ഒക്ടോബര്‍ 23നും ഉത്തരവുകളിറക്കിയിട്ടുണ്ടെന്ന് സര്‍ക്കാര്‍ വിശദീകരിച്ചു.
ഉത്സവങ്ങളില്‍ പതിവനുസരിച്ചുള്ള ആനകളെ എഴുന്നള്ളിക്കാന്‍ മാത്രമേ അനുമതി നല്‍കൂ എന്നും കൂടുതല്‍ ആനകളെ വേണമെങ്കില്‍ ചെലവു കമ്മിറ്റിക്കാര്‍ വഹിക്കണമെന്നും 1998 ഒക്ടോബര്‍ 22 ലെ ഉത്തരവില്‍ പറയുന്നു.
പതിവില്‍ കൂടുതല്‍ ആനകളെ അകമ്പടിക്കായി അനുവദിക്കില്ലെന്നാണ് 2000 ഒക്ടോബര്‍ 23ലെ ഉത്തരവില്‍ സൂചിപ്പിക്കുന്നത്.
Discussion about this post